ಮೈಕ್ರೋಸಾಫ್ಟ್‌ ತಯಾರಿಸಿದ ವಿಂಡೋಸ್‌ ಎಕ್ಸ್‌ಪಿಯಲ್ಲಿ ತಪ್ಪು ಕನ್ನಡ!

ಬೆಂಗಳೂರು: ಐಟಿ ಮೇಳದ ಮೊದಲ ದಿನ ಬಿಡುಗಡೆಯಾಗಿರುವ ಮೈಕ್ರೋಸಾಫ್ಟ್‌ ಕಂಪೆನಿಯ ಕನ್ನಡ ವಿಂಡೋಸ್‌ ಎಕ್ಸ್‌ಪಿಯಲ್ಲಿ ಕನ್ನಡವನ್ನು ತಪ್ಪುತಪ್ಪಾಗಿ ಅಳವಡಿಸಲಾಗಿದೆ ಎಂದು ಗಣಕ ಪರಿಷತ್ತಿನ ಕಾರ್ಯದರ್ಶಿ ಚಿ. ವಿ. ಶ್ರೀನಾಥ ಶಾಸ್ತ್ರಿ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ರಾಜ್ಯ ಸರಕಾರದ ಸಹಯೋಗದಲ್ಲಿ ನಿರ್ದಿಷ್ಟ ಕನ್ನಡ ಕೀಬೋರ್ಡನ್ನು ತಯಾರಿಸಿ ಕಳೆದ ವರ್ಷವೇ ಮೈಕ್ರೋಸಾಫ್ಟ್‌ ಕಂಪೆನಿಗೆ ಒದಗಿಸಲಾಗಿದೆ. ಆದರೆ ಕಂಪೆನಿಯು ರೆಮಿಂಗ್ಟನ್‌, ಇನ್‌ಸ್ಕಿೃಪ್ಟ್‌ ಮುಂತಾದ ಕೀಬೋರ್ಡ್‌ಗಳನ್ನು ಅಳವಡಿಸಿ ಬರವಣಿಗೆ ಕ್ಲಿಷ್ಟವಾಗುವಂತೆ ಮಾಡಿದೆ ಎಂದು ಶ್ರೀನಾಥ್‌ ಶಾಸ್ತ್ರಿ ಸಂದರ್ಶನವೊಂದರಲ್ಲಿ ಹೇಳಿದ್ದಾರೆ.

ಉದಾಹರಣೆಗೆ ಊ ಕಾರದ ಗುಣಿತಾಕ್ಷರಗಳು ಮತ್ತು ಆ ಕಾರದ ಗುಣಿತಾಕ್ಷರಗಳ ನಡುವೆ ಗೊಂದಲವಿದೆ. ‘ಮೂರ್ತಿ’ ಎಂಬ ಪದ ಟೈಪ್‌ ಮಾಡಿದರೆ ಅದನ್ನು ‘ಮಾರ್ತಿ ’ ಎಂದು ಓದಬೇಕಾಗುತ್ತದೆ. ಅಲ್ಲದೆ ಅನಗತ್ಯ ಕಡೆ ಅಕ್ಷರಗಳಿಗೆ ಕೊಂಬುಗಳನ್ನು ಕೊಡಲಾಗಿದೆ. ಸಾಫ್ಟವೇರ್‌ ಅಭಿವೃದ್ಧಿ ಪಡಿಸುವ ಕಾರ್ಯ ನಡೆದುದು ಅಮೆರಿಕಾದಲ್ಲಿ. ಅಲ್ಲಿ ಕನ್ನಡ ಬಲ್ಲ ಸಿಬ್ಬಂದಿ ಇಲ್ಲದೇ ಇದ್ದುದರಿಂದ ಹೀಗಾಗಿರಬಹುದು ಎಂದು ಶಾಸ್ತ್ರಿ ಅಭಿಪ್ರಾಯಪಟ್ಟರು.

ಈ ತಪ್ಪುಗಳನ್ನು ಸರಿಪಡಿಸುವವರೆಗೂ ವಿಂಡೋಸ್‌ ಎಕ್ಸ್‌ಪಿ ಮತ್ತು ಆಫೀಸ್‌ ಎಕ್ಸ್‌ಪಿಯನ್ನು ಖರೀದಿಸಬಾರದು ಎಂದು ಗಣಕ ಪರಿಷತ್‌ ಸರಕಾರಕ್ಕೆ ಸಲಹೆ ಮಾಡಿದ್ದು ಸರಕಾರ ಅದನ್ನು ಒಪ್ಪಿಕೊಂಡಿದೆ. ಈ ಎಲ್ಲ ಗೊಂದಲಗಳನ್ನು ನಿವಾರಿಸಲು ಒಂದು ವರ್ಷ ಹಿಂದೆಯೇ ಸರಕಾರ ಅಧಿಕೃತ ಎಂದು ಘೋಷಿಸಿರುವ ಕೀಬೋರ್ಡ್‌ನ್ನು ಅಳವಡಿಸುವುದು ಉತ್ತಮ ಎಂದು ಶಾಸ್ತ್ರಿ ಸರಕಾರಕ್ಕೆ ಸಲಹೆ ಮಾಡಿದರು.

(ಇನ್ಫೋ ವಾರ್ತೆ)