ಏಷ್ಯನ್‌ ಪೆಸಿಫಿಕ್‌ ತೆಂಗು ಉದ್ಯಮಿಗಳ ವಾರ್ಷಿಕ ಸಮಾವೇಶ ಆರಂಭ

ಬೆಂಗಳೂರು : ನಾಲ್ಕು ದಿನಗಳ ಏಷ್ಯನ್‌ ಪೆಸಿಫಿಕ್‌ ತೆಂಗು ಉದ್ಯಮಿಗಳ ಸಂಘದ (ಎಪಿಸಿಸಿ) ವಾರ್ಷಿಕ ಸಮಾವೇಶವು ಸೋಮವಾರ ಆರಂಭವಾಗಿದ್ದು , 14 ರಾಷ್ಟ್ರಗಳ ಪ್ರತಿನಿಧಿಗಳು ಸಮಾವೇಶದಲ್ಲಿ ಭಾಗವಹಿಸಿದ್ದಾರೆ.

ಬೆಲೆ ಕುಸಿತ, ನಿರ್ವಹಣೆಯಂತಹ ಸಾಕಷ್ಟು ಸಮಸ್ಯೆಗಳನ್ನು ತೆಂಗು ಕೈಗಾರಿಕೆ ಎದುರಿಸುತ್ತಿದೆ. ಅಲ್ಲದೆ ಬೆಳೆಗೆ ರೋಗಗಳೂ ಬಾಧಿಸಿ ರೈತರನ್ನು ಸಂಕಷ್ಟಕ್ಕೀಡುಮಾಡಿದೆ. ಈ ನಿಟ್ಟಿನಲ್ಲಿ ರಾಷ್ಟ್ರ ರಾಷ್ಟ್ರಗಳ ನಡುವೆ ಸಹಕಾರ ಅಗತ್ಯ. ವಿಶ್ವ ವ್ಯಾಪಾರ ಒಕ್ಕೂಟದ ದೃಷ್ಠಿಯಿಂದ ಉದ್ಯಮ ತಂತ್ರಗಳನ್ನು ಬದಲಾಯಿಸುವ ಅಗತ್ಯವೂ ಇದೆ ಎಂದು ಎಪಿಸಿಸಿ ಅಧ್ಯಕ್ಷ ಮತ್ತು ಭಾರತೀಯ ತೋಟಗಾರಿಕಾ ಆಯುಕ್ತ ಎಚ್‌. ಪಿ. ಸಿಂಗ್‌ ಹೇಳಿದರು.

ತೆಂಗು ಮಾರುಕಟ್ಟೆಗೆ ಕಾಯಕಲ್ಪ- ಅಜಿತ್‌ಸಿಂಗ್‌

ವಿಶ್ವ ವ್ಯಾಪಾರ ಒಕ್ಕೂಟದಡಿ, ತೆಂಗು ಬೆಳೆ ನಿರ್ವಹಣೆಯಲ್ಲಿ ತಂತ್ರಗಳನ್ನು ಬದಲಾಯಿಸುವ ಜರೂರತ್ತಿದೆ. ಇದರಿಂದ ಕಡಿಮೆ ಬಂಡವಾಳದಿಂದ ಹೆಚ್ಚು ಉತ್ಪನ್ನ ಪಡೆಯಬಹುದಾಗಿದೆ ಎಂದು ಕೇಂದ್ರ ಕೃಷಿ ಮಂತ್ರಿ ಅಜಿತ್‌ಸಿಂಗ್‌ ತಮ್ಮ ಸಂದೇಶದಲ್ಲಿ ತಿಳಿಸಿದ್ದಾರೆ.

ತೆಂಗಿನ ಎಣ್ಣೆ ದೇಶದ ಎಲ್ಲೆಡೆಯೂ ಬಳಸುವಂತಹ ಎಣ್ಣೆಯಾಗಿದೆ. ತೆಂಗು ಉದ್ಯಮದ ಆರ್ಥಿಕತೆ, ಉತ್ಪಾದನಾ ವಿಕೇಂದ್ರೀಕರಣ ಮತ್ತು ಸಹ ಉತ್ಪನ್ನಗಳ ಬಳಕೆಯನ್ನು ನಿರ್ವಹಿಸುವತ್ತ ಗಮನ ಕೊಡಬೇಕಾಗಿದೆ. ತೆಂಗಿನ ಕ್ರೀಮ್‌, ಎಳೆನೀರು ಪ್ಯಾಕೆಟ್‌ಗಳು, ತೆಂಗಿನ ಹಾಲಿನಿಂದ ತಯಾರಿಸಿದ ಪೌಡರುಗಳನ್ನು ಉತ್ಪಾದಿಸಲು ಹೊಸ ತಂತ್ರಜ್ಞಾನಗಳನ್ನು ಆವಿಷ್ಕರಿಸಲಾಗಿದ್ದು, ಇವನ್ನು ತೆಂಗು ಮಾರುಕಟ್ಟೆಯಲ್ಲಿ ಗುಣಾತ್ಮಕವಾಗಿ ಬಳಸಿಕೊಳ್ಳಬೇಕು ಎಂದೂ ಅವರು ಸಂದೇಶದಲ್ಲಿ ತಿಳಿಸಿದ್ದಾರೆ.

(ಪಿಟಿಐ)