‘12000 ಭಾರತೀಯ ವಿದ್ಯಾರ್ಥಿಗಳಿಗೆ ಇಂಗ್ಲೆಂಡಿನಲ್ಲಿ ಓದುವ ಅವಕಾಶ’

ಬೆಂಗಳೂರು : ಇಂಗ್ಲೆಂಡಿಗೆ ಬನ್ನಿ. ಓದಿ. ಕೆಲಸ ಗಿಟ್ಟಿಸಿಕೊಳ್ಳಿ. ಇನ್ನು 5 ವರ್ಷಗಳಲ್ಲಿ 12 ಸಾವಿರ ವಿದ್ಯಾರ್ಥಿಗಳಿಗೆ ನಮ್ಮ ದೇಶದಲ್ಲಿ ಪ್ರತಿಭೆ ಪ್ರದರ್ಶಿಸುವ ಅವಕಾಶ ಮಾಡಿಕೊಡುತ್ತೇವೆ ಎಂದು ಬ್ರಿಟನ್‌ ಇ- ಕಾಮಸ4ರ್ ಸಚಿವ ಡೌಗ್ಲಾಸ್‌ ಅಲೆಕ್ಸಾಂಡರ್‌ ಹೇಳಿದರು.

ಬೆಂಗಳೂರುಐಟಿ ಡಾಟ್‌ ಕಾಂ ಮೇಳದ ಎರಡನೇ ದಿನವಾದ ಶುಕ್ರವಾರ ಸುದ್ದಿಗಾರರೊಂದಿಗೆ ಮಾತಾಡುತ್ತಿದ್ದ ಅವರು, ಮೊದಲು ಓದಲು ಅವಕಾಶ. ವಿದ್ಯಾರ್ಥಿಗಳು ಪದವಿ ಮುಗಿಸಿದ ನಂತರ ಉದ್ಯೋಗಾವಕಾಶವನ್ನೂ ಕಲ್ಪಿಸಿಕೊಡುವ ಇರಾದೆ ಇದೆ ಎಂದರು.

ಪ್ರಸ್ತುತ 11 ಸಾವಿರ ಭಾರತೀಯ ಐಟಿ ಪರಿಣತರು ಬ್ರಿಟನ್ನಿನಲ್ಲಿ ಕೆಲಸ ಮಾಡುತ್ತಿದ್ದಾರೆ. ಬ್ರಿಟನ್ನೇತರ ರಾಷ್ಟ್ರಗಳ ಐಟಿ ಮಾನವ ಸಂಪನ್ಮೂಲದ ಅರ್ಧದಷ್ಟು ಸಂಖ್ಯೆ ಇದಾಗಿದೆ. ಅವಕಾಶಗಳ ಕಣಜವಾಗಿ ಭಾರತ ಹೊಮ್ಮಿದೆ. ಜಾಗತಿಕ ಮಾರುಕಟ್ಟೆಯಲ್ಲಿ ಬ್ರಿಟನ್‌ ಮಾಹಿತಿ ತಂತ್ರಜ್ಞಾನ ಕ್ಷೇತ್ರದಲ್ಲಿ ದಿನೇದಿನೇ ಅಭಿವೃದ್ಧಿ ಕಾಣುತ್ತಿದೆ. ಆರ್ಥಿಕ ಹಿನ್ನಡೆಯ ಸವಾಲನ್ನು ಸ್ವೀಕರಿಸಿ ಬರುವ ಭಾರತೀಯರಿಗೆ, ಭಾರತೀಯ ಕಂಪನಿಗಳಿಗೆ ಸುಸ್ವಾಗತ ಎಂದು ಆಮಂತ್ರಣ ಕೊಟ್ಟರು.

ಇದೇ ದಿನ ಮೇಳದ ಭರಾಟೆಯಲ್ಲೂ ಬಿಡುವು ಮಾಡಿಕೊಂಡ ಡೌಗ್ಲಾಸ್‌ ಹಾಗೂ ಭಾರತದಲ್ಲಿನ ಬ್ರಿಟಿಷ್‌ ಹೈ ಕಮಿಷನರ್‌ ರಾಬ್‌ ಯಂಗ್‌ ವಿಪ್ರೋ ಕಂಪನಿಗೆ ಭೇಟಿ ಕೊಟ್ಟರು. ಇವರೊಟ್ಟಿಗೆ ಬ್ರಿಟನ್ನಿನ ಅಧಿಕಾರಿಗಳ ನಿಯೋಗವೂ ಇತ್ತು. ಇಲೆಕ್ಟ್ರಾನಿಕ್‌ ನಗರಿಯ ಎರಡನೇ ಹಂತದಲ್ಲಿರುವ ವಿಪ್ರೋ ಕಲಿಕಾ ಕೇಂದ್ರ ಮತ್ತು ಸಾಫ್ಟ್‌ವೇರ್‌ ಅಭಿವೃದ್ಧಿ ವಲಯಗಳಲ್ಲಿನ ಕೆಲಸವನ್ನು ನಿಯೋಗ ನೋಡಿ, ತಿಳಿಯಿತು.

(ಪಿಟಿಐ)