ನಂದಗಡ ಬಳಿ ಬಸ್‌ನಲ್ಲಿ ಹಠಾತ್‌ ಬೆಂಕಿ : 8 ಮಂದಿ ಸುಟ್ಟು ಕರಕಲು

ಬೆಳಗಾವಿ : ವಾಯುವ್ಯ ರಸ್ತೆ ಸಾರಿಗೆ ಸಂಸ್ಥೆಯ ಬಸ್‌ವೊಂದಕ್ಕೆ ಇದ್ದಕ್ಕಿದ್ದಂತೆ ಬೆಂಕಿ ಹತ್ತಿಕೊಂಡ ಪರಿಣಾಮ ಮಕ್ಕಳೂ ಸೇರಿದಂತೆ 8 ಮಂದಿ ಸತ್ತಿದ್ದು, 13 ಮಂದಿಗೆ ಗಾಯಗಳಾಗಿವೆ. ಬಸ್‌ನಲ್ಲಿದ್ದ ಅನೇಕ ಪ್ರಯಾಣಿಕರು ಕಕ್ಕೇರಿಯ ಬಿಷ್ಠಮ್ಮ ದೇವಿ ಜಾತ್ರೆಗೆ ಹೊರಟಿದ್ದರು.

ಬುಧವಾರ ಮಧ್ಯಾಹ್ನ 1.40ರ ಸುಮಾರಿನಲ್ಲಿ ಖಾನಾಪುರ- ಯಲ್ಲಾಪುರ ರಸ್ತೆಯ ನಂದಗಡ ಸಮೀಪ ಈ ದುರಂತ ಸಂಭವಿಸಿದೆ. ಸತ್ತವರ ಪೈಕಿ ನಾಲ್ವರನ್ನು ಸಿದ್ದವ್ವ ಬಾಳಪ್ಪ ನಾಯಕ್‌(50), ಬೋರಾಜೆ ಯಲ್ಲಪ್ಪ ರಾಮನಕಟ್ಟೆ (11), ಶೃತಿ ಪರಶುರಾಮ ಸಿಂಧೆ(8) ಹಾಗೂ ಶುಭ ಪರಶುರಾಮ ಸಿಂಧೆ (5) ಎಂದು ಗುರುತಿಸಲಾಗಿದೆ. ಉಳಿದ ನಾಲ್ವರ ಗುರುತು ಇನ್ನೂ ಪತ್ತೆಯಾಗಿಲ್ಲ.

ಬೆಳಗಾವಿಯಿಂದ ಶಿರಸಿಗೆ ಹೊರಟಿದ್ದ ಬಸ್‌ನಲ್ಲಿ 96 ಮಂದಿ ಪ್ರಯಾಣಿಕರಿದ್ದರು. ಇದ್ದಕ್ಕಿದ್ದಂತೆ ಭಗ್ಗನೆ ಬೆಂಕಿ ಹೊತ್ತಿಕೊಂಡಿತು. ಚಾಲಕ ಬಸ್‌ ನಿಲ್ಲಿಸಿ, ಗಾಜನ್ನು ಒಡೆದು, 30 ಪ್ರಯಾಣಿಕರನ್ನು ಹೊರಕ್ಕೆ ಕಳುಹಿಸಿದ. ವ್ಯಾಪಕವಾಗಿದ್ದ ಬೆಂಕಿಯಿಂದ ತಪ್ಪಿಸಿಕೊಳ್ಳಲು ಜನರ ನೂಕುನುಗ್ಗಲಿನ ನಡುವೆ ಅನೇಕರಿಗೆ ಗಾಯಗಳಾದವು. ಸತ್ತಿರುವ ಎಲ್ಲರ ದೇಹಗಳೂ ಸುಟ್ಟು ಕರಕಲಾಗಿವೆ. ಬಸ್‌ನಲ್ಲಿ ಯಾವುದೋ ಸ್ಫೋಟಕ ಅಥವಾ ಸೀಮೆಎಣ್ಣೆಯಂತಹ ವಸ್ತು ಇದ್ದದ್ದೇ ಬೆಂಕಿ ಅನಾಹುತಕ್ಕೆ ಕಾರಣ ಎಂದು ಶಂಕಿಸಲಾಗಿದೆ. ಆದರೆ ನಿಖರ ಕಾರಣವೇನು ಎಂಬುದು ಇನ್ನೂ ತಿಳಿದು ಬಂದಿಲ್ಲ. ಈ ದುರಂತದಲ್ಲಿ ಮೃತಪಟ್ಟವರ ಕುಟುಂಬಗಳಿಗೆ ತಲಾ 15 ಸಾವಿರ ರುಪಾಯಿ ಹಾಗೂ ಗಾಯಾಳುಗಳಿಗೆ ತಲಾ 5 ಸಾವಿರ ರುಪಾಯಿ ನೆರವನ್ನು ಸಾರಿಗೆ ಸಂಸ್ಥೆ ಅಧಿಕಾರಿಗಳು ತಕ್ಷಣವೇ ವಿತರಿಸಿದ್ದಾರೆ.

(ಇನ್ಫೋ ವಾರ್ತೆ)