ದಾಂಡೇಲಿ ಪೇಪರ್‌ ಮಿಲ್ಸ್‌ ಮೈದಾನದಲ್ಲಿ ರಾಮಲೀಲಾ ಉತ್ಸವ

ದಾಂಡೇಲಿ : ಇಲ್ಲಿನ ದಾಂಡೇಲಿ ಪೇಪರ್‌ ಮಿಲ್‌ ಮೈದಾನದಲ್ಲಿ ಅಕ್ಟೋಬರ್‌ 26ರಂದು ರಾಮಲೀಲಾ ಉತ್ಸವವನ್ನು ಆಯೋಜಿಸಲಾಗಿದೆ.

ಸಾಮಾನ್ಯವಾಗಿ ಉತ್ತರ ಭಾರತದಲ್ಲಿ ಆಚರಿಸಲಾಗುವ ಈ ಹಬ್ಬ ರಾವಣನ ವಿರುದ್ಧ ರಾಮನ ವಿಜಯೋತ್ಸವದ ಸಂಕೇತ. ದಾಂಡೇಲಿ ಪೇಪರ್‌ ಮಿಲ್‌ ಮೈದಾನದಲ್ಲಿ 1960ರಿಂದಲೂ ಈ ಹಬ್ಬವನ್ನು ಆಚರಿಸುತ್ತಾ ಬರಲಾಗುತ್ತಿದೆ. ಈ ಸಂದರ್ಭದಲ್ಲಿ ರಾವಣ, ಕುಂಭಕರ್ಣ, ಮೇಘನಾದ ರಾಕ್ಷಸರ 38ರಿಂದ 42 ಅಡಿ ಎತ್ತರದ ಪ್ರತಿಮೆಗಳನ್ನು ದಹಿಸಿ ಹಬ್ಬ ಆಚರಿಸಲಾಗುತ್ತದೆ. ದೀಪಾವಳಿ ಹಬ್ಬದಷ್ಟೇ ಸಂಭ್ರಮದಲ್ಲಿ ಆಚರಿಸಲಾಗುವ ಈ ಹಬ್ಬದಲ್ಲಿಯೂ ಪಟಾಕಿಗಳ ಭರಾಟೆಯಿರುತ್ತದೆ.

ದಾಂಡೇಲಿಯ ಹತ್ತಿರದ ಊರಿನ ಜನರಿಗೆಲ್ಲ ಇದು ಮಹತ್ವದ ಹಬ್ಬವಾಗಿದ್ದು, ಸುಮಾರು 40 ಸಾವಿರ ಮಂದಿ ವಿಜಯದಶಮಿಯಂದು ದಾಂಡೇಲಿ ಪೇಪರ್‌ ಮಿಲ್‌ ಮೈದಾನದಲ್ಲಿ ಸೇರುವ ನಿರೀಕ್ಷೆಯಿದೆ. ದಾಂಡೇಲಿಯ ದೇವರು, ದಾಂಡೇಲಿಯಪ್ಪನ ಜಾತ್ರೆಯೂ ಇದೇ ಸಂದರ್ಭದಲ್ಲಿ ನಡೆಯುವುದು.

(ಇನ್ಫೋ ವಾರ್ತೆ)