ಬಹುಕೋಟಿ ಬೋಪೋರ್ಸ್‌ ಹಗರಣದ ಆರೋಪಿ ಛಡ್ಡಾ ನಿಧನ

ನವದೆಹಲಿ : 64 ಕೋಟಿ ರುಪಾಯಿಗಳ ಬೋಪೋರ್ಸ್‌ ಫಿರಂಗಿ ಹಗರಣದ ಪ್ರಮುಖ ಆರೋಪಿಗಳಲ್ಲೊಬ್ಬರಾದ ವಿನ್‌ ಛಡ್ಡಾ ನವದೆಹಲಿಯ ತಮ್ಮ ನಿವಾಸದಲ್ಲಿ ಮಂಗಳವಾರ ರಾತ್ರಿ ಹೃದಯಾಘಾತದಿಂದ ನಿಧನರಾದರು. ಅವರಿಗೆ 77 ವರ್ಷ ವಯಸ್ಸಾಗಿತ್ತು .

ಛಡ್ಡಾ ಅವರ ಸಾವು ಮಂಗಳವಾರ ರಾತ್ರಿ 12.15 ಕ್ಕೆ ಸಂಭವಿಸಿದೆ ಎಂದು ಅನಾಟ್ರೊನಿಕ್‌ ಗ್ರೂಪ್‌ ಆಫ್‌ ಕಂಪನೀಸ್‌ನ ಜನರಲ್‌ ಮೇನೇಜರ್‌ ಶೈಲೇಶ್‌ ಬಾಬು ಸುದ್ದಿಗಾರರಿಗೆ ತಿಳಿಸಿದ್ದಾರೆ. ಮೃತರ ಅಂತ್ಯಕ್ರಿಯೆ ಅಕ್ಟೋಬರ್‌ 25 ರಂದು ದೆಹಲಿಯ ಲೋಧಿ ರಸ್ತೆಯಲ್ಲಿನ ಚಿತಾಗಾರದಲ್ಲಿ ನಡೆಯಲಿದೆ.

ಛಡ್ಡಾ ಅವರು ಕೆಲವು ದಿನಗಳಿಂದ ಅನಾರೋಗ್ಯದಿಂದ ನರಳುತ್ತಿದ್ದರು. ರಾಜಕೀಯವಾಗಿ ಅತ್ಯಂತ ಸೂಕ್ಷ್ಮವಾದುದೆಂದು ಭಾವಿಸಲಾಗಿರುವ ಬಹುಕೋಟಿ ಬೋಪೋರ್ಸ್‌ ಹಗರಣದ ಆರೋಪಿಗಳಲ್ಲಿ ಸಾವಿಗೀಡಾಗುತ್ತಿರುವ ಎರಡನೆಯವರು, ಛಡ್ಡಾ . ಕೆಲವು ದಿನಗಳ ಹಿಂದೆ, ಹಗರಣದ ಇನ್ನೊಬ್ಬ ಪ್ರಮುಖ ಆರೋಪಿ ಹಾಗೂ ಮಾಜಿ ರಕ್ಷಣಾ ಕಾರ್ಯದರ್ಶಿ ಎಸ್‌.ಕೆ.ಭಟ್ನಾಗರ್‌ ಕ್ಯಾನ್ಸರ್‌ನಿಂದ ನಿಧನರಾಗಿದ್ದರು.

(ಪಿಟಿಐ)