ಇದು ಸಮೃದ್ಧ ದಸರಾ! ಲಕ್ಷ ಜನರನಿರೀಕ್ಷೆಯಲ್ಲಿ ಮಡಿಕೇರಿನಗರ

ಮಡಿಕೇರಿ : ಮೈಸೂರು ದಸರಾ ಸರಳವಾಗಿ ನಡೆಯಲಿರುವುದರಿಂದ ಈ ಬಾರಿಯ ಮಡಿಕೇರಿ ದಸರಾಕ್ಕೆ ಸುಮಾರು ಒಂದು ಲಕ್ಷಕ್ಕೂ ಹೆಚ್ಚು ಮಂದಿ ಬರುವ ನಿರೀಕ್ಷೆಯಿದೆಯೆಂದು ಜಿಲ್ಲಾ ದಸರಾ ಸಮಿತಿ ಹೇಳಿದೆ.

ಲಕ್ಷ ಸಂಖ್ಯೆಯ ಪ್ರೇಕ್ಷಕರನ್ನು ಬರಮಾಡಿಕೊಳ್ಳಲು ಮಡಿಕೇರಿ ಸಿದ್ಧವಾಗುತ್ತಿದೆ ಎಂದು ದಸರಾ ಸಮಿತಿಯ ಕಾರ್ಯದರ್ಶಿ ರಾಜೇಂದ್ರ ಸೋಮವಾರ ಹೇಳಿದ್ದಾರೆ. ಜಿಲ್ಲೆಯ ದಸರಾದಲ್ಲಿ ಕೊಡಗು ಸಂಸ್ಕೃತಿ ಸಮೃದ್ಧವಾಗಿ ಪ್ರಕಟಗೊಳ್ಳಲಿದೆ. ಹಿರಿಯ ಕಾಫಿ ಬೆಳೆಗಾರ ಕೆ. ವಿ. ಮಿತ್ತು ಚೆಂಗಪ್ಪ ಅಕ್ಟೋಬರ್‌ 24ರಂದು ಗಾಂಧಿ ಮೈದಾನದಲ್ಲಿ ದಸರಾ ಸಾಂಸ್ಕೃತಿಕ ಕಾರ್ಯಕ್ರಮಗಳನ್ನು ಉದ್ಘಾಟಿಸುವರು.

ಮರುದಿನ ನಡೆಯಲಿರುವ ಕಾರ್ಯಕ್ರಮಗಳಿಗೆ ಜಿಲ್ಲಾ ಪಂಚಾಯತ್‌ನ ಮುಖ್ಯ ನಿರ್ವಹಣಾಧಿಕಾರಿ ಕೆ. ಎಂ. ಬಲದೇವ ಕೃಷ್ಣ ಚಾಲನೆ ನೀಡುತ್ತಾರೆ. ಅಕ್ಟೋಬರ್‌ 26ರಂದು ವೈಭವದಿಂದ ನಡೆಯುವ ವಿಜಯದಶಮಿ ಸಾಂಸ್ಕೃತಿಕ ಆಚರಣೆಯನ್ನು ನ್ಯಾಯವಾದಿ ಕೆ. ಎಂ. ಪೊನ್ನಪ್ಪ ಉದ್ಘಾಟಿಸುತ್ತಾರೆ. ಅಂದು ಬೆಳಗ್ಗೆ 10.30ಕ್ಕೆ ಸಚಿವ ಎಂ. ಎಂ. ನಾಣಯ್ಯ ಅವರ ನೇತೃತ್ವದಲ್ಲಿ ನವರಾತ್ರಿ ಸಭಾ ಕಾರ್ಯಕ್ರಮಗಳು ನಡೆಯಲಿವೆ.

ಕೇಂದ್ರ ಸಚಿವ ವಿ. ಧನಂಜಯ ಕುಮಾರ್‌, ಮಾಜಿ ಮುಖ್ಯಮಂತ್ರಿ ಎಂ. ವೀರಪ್ಪ ಮೊಯಿಲಿ, ಸಚಿವ ಡಿ.ಬಿ. ಚಂದ್ರೇಗೌಡ, ಎಚ್‌. ಸಿ. ಶ್ರೀಕಂಠಯ್ಯ, ಕನ್ನಡ ಮತ್ತು ಸಂಸ್ಕೃತಿ ಸಚಿವೆ ರಾಣಿ ಸತೀಶ್‌ ಸಮಾರೋಪ ಕಾರ್ಯಕ್ರಮಕ್ಕೆ ಆಗಮಿಸುವರು. ಬೆಂಗಳೂರಿನ ಇಂಚರ ಬಳಗದಿಂದ ರಸಮಂಜರಿಯನ್ನು ವಿಜಯದಶಮಿಯ ಸಂಜೆ ಆಯೋಜಿಸಲಾಗಿದೆ ಎಂದು ರಾಜೇಂದ್ರ ಹೇಳಿದ್ದಾರೆ.

(ಇನ್ಫೋ ವಾರ್ತೆ)