ಷೋರೂಂ ಆಗಬೇಕಿದ್ದ ಗೋದಾಮಿಗೆ ಬೆಂಕಿ :50 ಹೀರೋಹೋಂಡಾ ಭಸ್ಮ

ಬೆಂಗಳೂರು : ಹೊಸ ಷೋ ರೂಂ ಪ್ರಾರಂಭಿಸುವ ಉದ್ದೇಶದಿಂದ ಗೋದಾಮೊಂದರಲ್ಲಿ ಸಂಗ್ರಹಿಸಿಡಲಾಗಿದ್ದ ಹೀರೋಹೋಂಡಾ ಮೋಟಾರು ಬೈಕ್‌ಗಳು ಶನಿವಾರ ರಾತ್ರಿ ಬೆಂಕಿ ಅನಾಹುತದಿಂದ ಸುಟ್ಟು, ಸುಮಾರು 30 ಲಕ್ಷ ರುಪಾಯಿ ನಷ್ಟವಾಗಿದೆ.

ಆರ್‌.ವಿ ರಸ್ತೆಯ ಮೆಜೆಸ್ಟಿಕ್‌ ಪ್ಲಾಜಾದ ಮೊದಲನೇ ಮಹಡಿಯಲ್ಲಿ ರಾತ್ರಿ 9.30ರ ಹೊತ್ತಿಗೆ ಇದ್ದಕ್ಕಿಂದ್ದಂತೆ ಬೆಂಕಿ ಹತ್ತಿಕೊಂಡಿತು. ಭದ್ರತಾ ಸಿಬ್ಬಂದಿ ತಕ್ಷಣವೇ ಅಗ್ನಿ ಶಾಮಕ ದಳಕ್ಕೆ ಫೋನಾಯಿಸಿದರು. ದಳದವರು ಕ್ಷಿಪ್ರ ಗತಿಯಲ್ಲೇ ಬಂದರಾದರೂ, ಅಷ್ಟು ಹೊತ್ತಿಗೆ 25ಕ್ಕೂ ಹೆಚ್ಚು ಹೀರೋಹೋಂಡಾಗಳು ಸಂಪೂರ್ಣ ಸುಟ್ಟು ಹೋಗಿದ್ದವು. ಬೆಂಕಿ ನಂದಿಸುವ ಹೊತ್ತಿಗೆ 50 ಹೀರೋಹೋಂಡಾಗಳು ಸುಟ್ಟು ಕರಕಲಾಗಿದ್ದವು.

ಸದ್ಯದಲ್ಲೇ ಅದೇ ಸ್ಥಳದಲ್ಲಿ ಹೊಸ ಷೋರೂಂ ಪ್ರಾರಂಭವಾಗಬೇಕಿತ್ತು. ಗೋದಾಮಿಗೆ ವಿದ್ಯುತ್‌ ಸಂಪರ್ಕ ಕೂಡ ಇರಲಿಲ್ಲ. ಬೆಂಕಿ ಅನಾಹುತಕ್ಕೆ ಕಾರಣವೇನು ಎಂಬುದು ಇನ್ನೂ ತಿಳಿದಿಲ್ಲ.

(ಇನ್ಫೋ ವಾರ್ತೆ)