ಜೈವಿಕ ಸಮರದ ಸವಾಲೆದುರಿಸಲು ಸಿದ್ಧ- ಜಾರ್ಜ್‌ ಡಬ್ಲ್ಯು ಬುಷ್‌

ವಾಷಿಂಗ್ಟನ್‌ : ಉದ್ಯಮಶೀಲತೆ, ಅಭಿವೃದ್ಧಿಗೆ ವ್ಯತಿರಿಕ್ತವಾಗಿ ಪ್ರಜಾತಾಂತ್ರಿಕ ವ್ಯವಸ್ಥೆಯ ಬುಡಕ್ಕೆ ಕೈಯಿಟ್ಟಿರುವ ಭಯೋತ್ಪಾದನೆ ಜೈವಿಕ ಸಮರದ ಸವಾಲನ್ನು ಒಡ್ಡಿದರೂ ಅದಕ್ಕೆ ಎದೆಗೊಡಲು ನಾವು ಸಿದ್ಧ ಎಂದು ಅಮೆರಿಕಾ ಅಧ್ಯಕ್ಷ ಜಾರ್ಜ್‌ ಡಬ್ಲ್ಯು ಬುಷ್‌ ಶನಿವಾರ ತಿಳಿಸಿದ್ದಾರೆ.

ಶಾಂಘೖನಲ್ಲಿ ನಡೆಯುತ್ತಿರುವ ಏಷ್ಯಾ ಪೆಸಿಫಿಕ್‌ ಆರ್ಥಿಕ ಸಹಕಾರಿ ಒಕ್ಕೂಟದ 21 ಸದಸ್ಯರ ಸಭೆಯನ್ನು ಉದ್ದೇಶಿಸಿ ಅವರು ಮಾತಾಡುತ್ತಿದ್ದರು. ಅಮೆರಿಕ ನಾಗರಿಕರ ನಿದ್ದೆಗೆಡಿಸುತ್ತಿರುವ ಆ್ಯಂಥ್ರಾಕ್ಸ್‌ ರೋಗಕ್ಕೂ ಸೆಪ್ಟೆಂಬರ್‌ 11ರಂದು ನಡೆದ ಉಗ್ರರ ದಾಳಿಗೂ ಸಂಪರ್ಕ ಇದೆಯೋ ಇಲ್ಲವೋ ಎಂಬ ಬಗ್ಗೆ ಇನ್ನೂ ಯಾವುದೇ ಪುರಾವೆ ಸಿಕ್ಕಿಲ್ಲ. ಯಾರು ಆ್ಯಂಥ್ರಾಕ್ಸ್‌ ದಾಳಿ ನಡೆಸುತ್ತಿದ್ದಾರೋ ಅವರು ಅಪರಾಧಿಗಳು. ವ್ಯಗ್ರತೆಯ ಇನ್ನೊಂದು ರೂಪ ಇದು. ಉಗ್ರರ ಹೃದಯದ ಕೆಡುಕಿನ ಪರಮಾವಧಿಗೆ ಇದು ಉದಾಹರಣೆ. ಅಮಾಯಕ ಜನರನ್ನು ಆತಂಕಕ್ಕೆ ತಳ್ಳಿರುವ ಇಂಥಾ ದಾಳಿಗಳನ್ನು ಎದುರಿಸಲು ಅಮೆರಿಕಾ ಸರ್ವ ಸನ್ನದ್ಧ ಎಂದರು.

(ಎಎಫ್‌ಪಿ)