ಭೂದಾಳಿ ಆರಂಭ, ನ್ಯಾಯ ಸಿಗುವ ತನಕ ಹೋರಾಟ - ಬುಷ್‌

ಇಸ್ಲಾಮಾಬಾದ್‌ : ಅಮೆರಿಕದ ಯೋಧರನ್ನು ಹೊತ್ತೊಯ್ಯುತ್ತಿದ್ದ ಹೆಲಿಕಾಪ್ಟರ್‌ ದುರಂತಕ್ಕೀಡಾಗಿ, ಇಬ್ಬರು ಸಾವನ್ನಪ್ಪಿದ್ದಾರೆ. ಶುಕ್ರವಾರ ರಾತ್ರಿ ಪಾಕಿಸ್ತಾನದಲ್ಲಿ ಈ ಅಪಘಾತ ಸಂಭವಿಸಿದೆ ಎಂದು ಸಿಎನ್‌ಎನ್‌ ಸುದ್ದಿಸಂಸ್ಥೆ ವರದಿ ಮಾಡಿದೆ.

ತಾಂತ್ರಿಕ ದೋಷದಿಂದ ಈ ಹೆಲಿಕಾಪ್ಟರ್‌ ಅಪಘಾತಕ್ಕೀಡಾಯಿತು ಎಂದು ಅಮೆರಿಕಾ ಹೇಳಿದ್ದರೆ, ತಾನೇ ಹೆಲಿಕಾಪ್ಟರ್‌ ಅನ್ನು ಹೊಡೆದುರುಳಿಸಿದ್ದಾಗಿ ತಾಲಿಬಾನ್‌ ಘೋಷಿಸಿದೆ. ತಾಲಿಬಾನ್‌ನ ಈ ಹೇಳಿಕೆಯನ್ನು ತಳ್ಳಿಹಾಕಿರುವ ಪೆಂಟಗಾನ್‌, ದುರಂತದ ಬಗ್ಗೆ ಸಮಗ್ರ ತನಿಖೆ ನಡೆಸುವುದಾಗಿಯೂ ಹೇಳಿದೆ.

ಈ ಮಧ್ಯೆ ಅಮೆರಿಕ ಯೋಧರ ಬಲಿದಾನ ಯಾವುದೇ ಕಾರಣಕ್ಕೂ ವ್ಯರ್ಥ ಆಗದು ಎಂದು ಶಾಂಘೖನಲ್ಲಿ ಅಮೆರಿಕಾ ಅಧ್ಯಕ್ಷ ಜಾರ್ಜ್‌ ಡಬ್ಲ್ಯು ಬುಷ್‌ ಘೋಷಿಸಿದ್ದಾರೆ. ಭಯೋತ್ಪಾದನೆಯ ಮೂಲೋತ್ಪಾಟನೆ ಆಗುವವರೆಗೆ ಹಾಗೂ ನಮಗೆ ನ್ಯಾಯ ಸಿಗುವ ತನಕ ಸಮರ ಕಾರ್ಯಾಚರಣೆ ನಿಲ್ಲದು ಎಂದೂ ಅವರು ಹೇಳಿದ್ದಾರೆ.

• ಅಮೆರಿಕ ವಿಶೇಷ ಭೂಸೇನಾ ಪಡೆ, ಆಫ್ಘನ್‌ ನೆಲದಲ್ಲಿ ತನ್ನ ಕಾರ್ಯಾಚರಣೆ ಆರಂಭಿಸಿದೆ. ಅತ್ಯಾಧುನಿಕ ಶಸ್ತ್ರಾಸ್ತ್ರ ಹೊಂದಿದ ಹಾಗೂ ವಿಶೇಷ ತರಬೇತಿ ಪಡೆದ ಈ ಪಡೆ ಯಶಸ್ವಿಯಾಗಿ ಮುನ್ನುಗ್ಗುತ್ತಿದೆ ಎಂದು ವರದಿಗಳು ಹೇಳಿವೆ.
• ತಾಲಿಬಾನ್‌ ತಾನೂ ಕೂಡ ಕಾರ್ಯಾಚರಣೆ ತೀವ್ರಗೊಳಿಸಿದ್ದು, ಮಿತ್ರಪಡೆಗಳಿಗೆ ಹಿನ್ನಡೆ ಉಂಟಾಗಿದೆ ಎಂದಿದೆ. ಈ ಹೇಳಿಕೆಯನ್ನು ಅಮೆರಿಕಾ ತಳ್ಳಿಹಾಕಿದೆ.
• ಶನಿವಾರವೂ ಅಮೆರಿಕ ಯುದ್ಧ ವಿಮಾನಗಳು ಆಫ್ಘಾನಿಸ್ತಾನದ ಆಲ್‌ಖೈದಾ ನೆಲೆಗಳ ಮೇಲೆ ಬಾಂಬ್‌ ದಾಳಿ ಮುಂದುವರಿಸಿವೆ.
• ಅಮೆರಿಕದ ಬಾಂಬ್‌ ದಾಳಿಯಿಂದ 600 ನಾಗರಿಕರು ಸಾವನ್ನಪ್ಪಿರುವುದಾಗಿ ತಾಲಿಬಾನ್‌ ಹೇಳಿಕೊಂಡಿದೆ.
• ಈ ಮಧ್ಯೆ ಯುದ್ಧಾನಂತರ ಅಸ್ತಿತ್ವಕ್ಕೆ ಬರುವ ವಿಸ್ತಾರ ತಳಹದಿಯ ಸರಕಾರಕ್ಕೆ 500 ಕೋಟಿ ರುಪಾಯಿ ಸಾಲ ನೀಡುವುದಾಗಿ ಭಾರತ ಪ್ರಕಟಿಸಿದೆ. ಆಫ್ಘಾನಿಸ್ತಾನದ ಪುನರ್‌ ನಿರ್ಮಾಣಕ್ಕೆ ನೆರವು ನೀಡುವುದು ಭಾರತದ ಉದ್ದೇಶವಾಗಿದೆ.
• ಬಾಂಬ್‌ ದಾಳಿಯಿಂದ ನಲುಗುತ್ತಿದ್ದರೂ ಕೂಡ ಆಫ್ಘಾನಿಸ್ತಾನ ಲಾಡೆನ್‌ನನ್ನು ಹಸ್ತಾಂತರಿಸಲು ಸಿದ್ಧವಿಲ್ಲ ಎಂದು ಪಾಕಿಸ್ತಾನದ ಆಫ್ಘನ್‌ ರಾಯಭಾರಿ ಅಬ್ದುಲ್‌ ಸಲಾಂ ಜಯೀಫ್‌ ಪುನರುಚ್ಚರಿಸಿದ್ದಾರೆ.

(ಪಿ.ಟಿ.ಐ/ಇನ್‌ಫೋ ವಾರ್ತೆ)