ಕಾಶ್ಮೀರ ಕೊಳ್ಳ : 8 ಮಂದಿ ಉಗ್ರರು +ಮೂವರು ಸೈನಿಕರ ಸಾವು

ಶ್ರೀನಗರ : ಬುಧವಾರ ರಾತ್ರಿಯಿಂದೀಚೆಗೆ ಕಾಶ್ಮೀರ ಕೊಳ್ಳದಲ್ಲಿ ನಡೆದ ಪ್ರತ್ಯೇಕ ಘಟನೆಗಳಲ್ಲಿ ಮೂವರು ಸೈನಿಕರು, 8 ಮಂದಿ ಉಗ್ರರು ಸೇರಿದಂತೆ 12 ಮಂದಿ ಸಾವಿಗೀಡಾಗಿದ್ದಾರೆ ಎಂದು ಅಧಿಕೃತ ಮೂಲಗಳು ಗುರುವಾರ ತಿಳಿಸಿವೆ.

ಉತ್ತರ ಕಾಶ್ಮೀರದ ಪುಲ್ವಾಮ ಜಿಲ್ಲೆಯ ಹರಿಪುರ್‌ನಲ್ಲಿ ಗುರುವಾರ ನಡೆದ ಘರ್ಷಣೆಗೆ ಮೂವರು ಸೈನಿಕರು ಹಾಗೂ ಮೂವರು ಉಗ್ರರು ಬಲಿಯಾಗಿದ್ದಾರೆ. ಗುರುವಾರ ಮುಂಜಾನೆ ನಡೆದ ಇನ್ನೊಂದು ಪ್ರಕರಣದಲ್ಲಿ - ಕುಪ್ವಾರ ಜಿಲ್ಲೆಯ ಗಡಿ ನಿಯಂತ್ರಣ ರೇಖೆಯ ಬಳಿ ಕಾಶ್ಮೀರ ಕೊಳ್ಳದೊಳಗೆ ನುಸುಳಲು ಪ್ರಯತ್ನಿಸಿದ ಇಬ್ಬರು ಪಾಕಿಸ್ತಾನೀಯರು ರಕ್ಷಣಾ ಪಡೆಗಳ ಗುಂಡಿಗೆ ತುತ್ತಾಗಿದ್ದಾರೆ.

ಬಾರಾಮುಲ್ಲಾ ಜಿಲ್ಲೆಯ ಬಂಡೀಪುರ ಪ್ರದೇಶದ ಕನನ್‌-ಬಾಬಾ-ಗುಂಡ್‌ ಎಂಬಲ್ಲಿ ನಡೆದ ಘರ್ಷಣೆಯಲ್ಲಿ ಕಮಾಂಡರ್‌ ಇರ್ಫಾನ್‌ ಅಹ್ಮದ್‌ ಸೇರಿದಂತೆ ಇಬ್ಬರು ಉಗ್ರರು ಸಾವಿಗೀಡಾಗಿದ್ದಾರೆ. ಇದೇ ಅವಧಿಯಲ್ಲಿ 26 ಕಿಲೋ ತೂಕದ ಆರ್‌ಡಿಎಕ್ಸ್‌ ಸ್ಪೋಟಕ, 2 ಎಕೆ ರೈಫಲ್ಸ್‌ , ಗ್ರೆನೇಡ್‌ಗಳು, ರಿಮೋಟ್‌ಗಳು ಸೇರಿದಂತೆ ಭಾರೀ ಪ್ರಮಾಣದ ವಿವಿಧ ಶಸ್ತ್ರಾಸ್ತ್ರಗಳನ್ನು ರಕ್ಷಣಾ ಸಿಬ್ಬಂದಿ ವಶಪಡಿಸಿಕೊಂಡಿದ್ದಾರೆ.

(ಪಿಟಿಐ)