ಜಂಬೂಸವಾರಿ ನಂತರ, ಅ.29ರಂದು ಕೃಷ್ಣ ಸಂಪುಟ ಪುನರ್ರಚನೆ?

ಬೆಂಗಳೂರು : ದೀರ್ಘಕಾಲದಿಂದ ನೆನಗುದಿಗೆ ಬಿದ್ದಿರುವ ಸಂಪುಟ ಪುನರ್ರಚನೆ ಕಸರತ್ತಿಗೆ ಕೊನೆಗಾಣಿಸಲು ಉದ್ದೇಶಿಸಿರುವ ಮುಖ್ಯಮಂತ್ರಿ ಎಸ್‌.ಎಂ.ಕೃಷ್ಣ , ಅಕ್ಟೋಬರ್‌ 29 ರ ಸೋಮವಾರ ಸಂಪುಟ ಪುನರ್ರಚಿಸುವ ಸಂಭವವಿದೆ ಎಂದು ವಿಧಾನಸೌಧ ಮೊಗಸಾಲೆಯ ವರದಿಗಳು ತಿಳಿಸಿವೆ.

ಅಕ್ಟೋಬರ್‌ 22 ರಂದೇ ಸಂಪುಟ ಪುನರ್ರಚನೆೆ ನಡೆಯಬೇಕಿದ್ದರೂ, ವರಿಷ್ಠರೊಂದಿಗಿನ ಮಾತುಕತೆ ಪೂರ್ಣವಾಗಿಲ್ಲದ ಕಾರಣ ಸಂಪುಟ ಪುನರ್ರಚನೆ ವಾರಕಾಲ ಮುಂದೆಹೋಗಿದೆ. ವಿಜಯದಶಮಿ ನಂತರ ದೆಹಲಿಗೆ ತೆರಳುವ ಕೃಷ್ಣ , ಸಂಪುಟ ಪುನರ್ರಚನೆ ಕುರಿತು ಕಾಂಗ್ರೆಸ್‌ ಅಧ್ಯಕ್ಷೆ ಸೋನಿಯಾಗಾಂಧಿ ಅವರೊಂದಿಗೆ ಚರ್ಚಿಸುವರು.

ಮಾಜಿ ಸಚಿವ ಪಾಟೀಲ್‌ ಸಾಸನೂರ್‌ ಈ ಬಾರಿ ಸಂಪುಟಕ್ಕೆ ಸೇರ್ಪಡೆಗೊಳ್ಳುವ ನಿರೀಕ್ಷೆಯಿದೆ. ಬಿಜಾಪುರ ಜಿಲ್ಲೆಗೆ ಸಂಪುಟದಲ್ಲಿ ಪ್ರಾತಿನಿಧ್ಯವಿಲ್ಲ ದಿರುವುದು ಅವರಿಗೆ ವರವಾಗುವ ನಿರೀಕ್ಷೆಯಿದೆ. ಉಳಿದಂತೆ ಹಾವೇರಿಯಿಂದ ಕೋಳಿವಾಡ್‌, ಬೀದರ್‌ನಿಂದ ಬಸವರಾಜ ಪಾಟೀಲ್‌, ಉಡುಪಿಯಿಂದ ವಸಂತ ಸಾಲಿಯಾನ ಸಂಪುಟ ಸೇರುವ ಸಾಧ್ಯತೆಯಿದೆ. ಪರಿಶಿಷ್ಟ ವರ್ಗದಿಂದ ಕರಿಯಣ್ಣ ಹಾಗೂ ಆಂಜನಮೂರ್ತಿ ಸಚಿವರಾದರೆ ಆಶ್ಚರ್ಯವಿಲ್ಲ .

ಗೃಹಮಂತ್ರಿ ಮಲ್ಲಿಕಾರ್ಜುನ ಖರ್ಗೆ ಅವರ ಖಾತೆ ಬದಲಾಗುವ ಸಾಧ್ಯತೆಯೂ ಇದೆ. ಗೃಹ ಖಾತೆ ಬಗೆಗೆ ಬೇಸತ್ತಿರುವ ಖರ್ಗೆ ಕಂದಾಯ ಖಾತೆ ಅಪೇಕ್ಷಿಸಿದ್ದಾರೆಂದು ಸುದ್ದಿ .

(ಇನ್ಫೋ ವಾರ್ತೆ)