ಇಂಟೆಲ್‌ನ ಪ್ರಮುಖ ಅಂಗಡಿಯಾಂದು ಅಮೆರಿಕಾದಿಂದ ಬೆಂಗಳೂರಿಗೆ?

ಬೆಂಗಳೂರು: ಅಮೆರಿಕಾದ ಸಾಫ್ಟ್‌ವೇರ್‌ ದೈತ್ಯ ಎಂದೇ ಪ್ರಸಿದ್ಧವಾದ ಇಂಟೆಲ್‌, ತನ್ನ ಪ್ರಮುಖ ಸಂಶೋಧನಾ ಹಾಗೂ ಅಭಿವೃದ್ಧಿ ಚಟುವಟಿಕೆಗಳ ಕೇಂದ್ರ(research and development operations)ವೊಂದನ್ನು ಅಮೆರಿಕದಿಂದ ಬೆಂಗಳೂರಿಗೆ ಸ್ಥಳಾಂತರಿಸುವ ಸಾಧ್ಯತೆಯಿದೆ. ಸೆಪ್ಟಂಬರ್‌ 11 ರಂದು ಅಮೆರಿಕ ಮೇಲೆ ನಡೆದ ಭಯೋತ್ಪಾದಕರ ದಾಳಿಯ ಹಿನ್ನೆಲೆಯಲ್ಲಿ ಇಂಟೆಲ್‌ ಈ ನಿರ್ಣಯಕ್ಕೆ ಬಂದಿದೆ ಎನ್ನಲಾಗಿದೆ.

ಇಂಟೆಲ್‌ನ ಬೆಂಗಳೂರು ಪ್ರವೇಶಕ್ಕೆ ಬೆಂಗಳೂರು ಐಟಿ.ಕಾಂ-2001 ಮೇಳ ವೇದಿಕೆಯಾದರೂ ಆಶ್ಚರ್ಯವಿಲ್ಲ . ತಮ್ಮ ಕಾರ್ಯಯೋಜನೆಯ ಬಗ್ಗೆ ಮುಖ್ಯಮಂತ್ರಿ ಎಸ್‌.ಎಂ.ಕೃಷ್ಣ ಹಾಗೂ ಮಾಹಿತಿ ತಂತ್ರಜ್ಞಾನ ಸಚಿವ ಬಿ.ಕೆ. ಚಂದ್ರಶೇಖರ್‌ ಅವರೊಂದಿಗೆ ಚರ್ಚಿಸಲು ಇಂಟೆಲ್‌ ಅಧಿಕಾರಿಗಳು ನವಂಬರ್‌ ಮೊದಲ ವಾರದಲ್ಲಿ ಬೆಂಗಳೂರಿಗೆ ಆಗಮಿಸುವರು ಎಂದು ಸಚಿವಾಲಯದ ಮೂಲಗಳು ತಿಳಿಸಿವೆ.

ಅಮೆರಿಕಾದ ವಾಷಿಂಗ್ಟನ್‌, ಕ್ಯಾಲಿಫೋರ್ನಿಯಾ, ಇಲಿನಾಯ್ಸ್‌, ಒರೆಗಾನ್‌ ಹಾಗೂ ಅರಿಜೋನಾ ಸೇರಿದಂತೆ ಪ್ರಸ್ತುತ ವಿಶ್ವದ 80 ಪ್ರದೇಶಗಳಲ್ಲಿ ಸಂಶೋಧನಾ ಮತ್ತು ಅಭಿವೃದ್ಧಿ ಕೇಂದ್ರಗಳನ್ನು ಇಂಟೆಲ್‌ ಹೊಂದಿದೆ. ಇಸ್ರೇಲ್‌, ಸ್ವೀಡನ್‌, ಟೋಕಿಯಾ ಹಾಗೂ ಚೀನಾಗಳಲ್ಲೂ ಇಂಟೆಲ್‌ ಪ್ರಯೋಗಾಲಯಗಳನ್ನು ಹೊಂದಿದೆ.

ಬೆಂಗಳೂರಿಗೆ ಇಂಟೆಲ್‌ ಪ್ರವೇಶ ಹೊಸತೇನೂ ಅಲ್ಲ . ಸಾಫ್ಟ್‌ವೇರ್‌ ಅಭಿವೃದ್ಧಿ ಸೌಲಭ್ಯ ಮಾತ್ರವಲ್ಲದೆ, ಇತ್ತೀಚೆಗಷ್ಟೇ ಭಾರತೀಯ ವಿಜ್ಞಾನ ಕೇಂದ್ರದಲ್ಲಿ ಪ್ರಯೋಗಾಲಯವೊಂದನ್ನು ಇಂಟೆಲ್‌ ಪ್ರಾರಂಭಿಸಿದೆ.

(ಇನ್ಫೋ ವಾರ್ತೆ)