ಉಕ್ಕಿ ಹರಿಯುತಿಹಳು ಭೀಮೆ, ಉತ್ತರ ಕರ್ನಾಟಕದಲ್ಲಿ ಪ್ರವಾಹ

ಬಿಜಾಪುರ: ಕೆಲವೇ ತಿಂಗಳುಗಳ ಹಿಂದೆ ಭೀಮೆ ಬತ್ತಿದ್ದಾಗ, ಬಿಜಾಪುರ ಜಿಲ್ಲೆ ಹಾಗೂ ಸುತ್ತಮುತ್ತಲ ಜನತೆ ಕುಡಿಯುವ ನೀರಿಗೂ ಪರದಾಡಿದ್ದು, ನಿಮಗೂ ಗೊತ್ತು. ಆಗ ಮಹಾರಾಷ್ಟ್ರದ ಉಜ್ಜಿನಿ ಜಲಾಶಯದಿಂದ ಭೀಮೆಗೆ ನೀರು ಬಿಡುವಂತೆ ಕರ್ನಾಟಕ ಸರಕಾರ ಮಹಾರಾಷ್ಟ್ರ ಸರಕಾರಕ್ಕೆ ಪದೇ ಪದೇ ಮನವಿ ಮಾಡಿತು.

ಉದ್ರಿಕ್ತ ರೈತರು ಹೋರಾಟವನ್ನೂ ಕೈಗೊಂಡರು. ಬ್ಯಾರೇಜ್‌ ಗೇಟೂ ಮುರಿದರು. ಕರ್ನಾಟಕದ ಮನವಿಯನ್ನು ಮನ್ನಿಸಿದ ಮಹಾರಾಷ್ಟ್ರ ನೀರೂ ಬಿಡುಗಡೆ ಮಾಡಿತು. ಗುಲ್ಬರ್ಗಾ, ಬಿಜಾಪುರ ಜಿಲ್ಲೆಗಳ ಜಲಕ್ಷಾಮ ನಿವಾರಿಸಲು ಬ್ಯಾರೇಜ್‌ ನಿರ್ಮಿಸುವ ಆಶ್ವಾಸನೆಯನ್ನೂ ನೀಡಿತು.

ಮೇ ತಿಂಗಳಿನಲ್ಲಿ ಬತ್ತಿದ್ದ ಭೀಮೆ ಇಂದು ತುಂಬಿ ಹರಿಯುತ್ತಿದೆ. ಬೇಸಿಗೆಯಲ್ಲಿ ಬೆಳೆದ ಪೈರಿಗೆ ನೀರೊದಗಿಸದ ಭೀಮೆ. ಈ ಹೊತ್ತು, ಬೆಳೆದು ನಿಂತಿರುವ ಫಸಲನ್ನು ಕೊಚ್ಚಿಕೊಂಡು ಹೋಗುತ್ತಿದೆ. ನೀರಿಗಾಗಿ ಅಂದು ಕಣ್ಣೀರು ಹಾಕಿದ ರೈತ ಇಂದು ಕೊಚ್ಚಿಹೋಗುತ್ತಿರುವ ಬೆಳೆಯನ್ನು ಕಂಡು ಕಣ್ಣೀರುಗರೆಯುತ್ತಾ ತಲೆಯ ಮೇಲೆ ಕೈಹೊತ್ತು ಕುಳಿತಿದ್ದಾನೆ.

ಭೀಮಾ ನದಿ ಜಲಾನಯನ ಪ್ರದೇಶದಲ್ಲಿ ಕಳೆದ 10 ದಿನಗಳಿಂದಲೂ ಧಾರಾಕಾರವಾಗಿ ಮಳೆ ಸುರಿಯುತ್ತಿದೆ. ಪುಟ್ಟ ಹಳ್ಳ ಕೊಳ್ಳಗಳೆಲ್ಲಾ ತುಂಬಿದ್ದು, ಆ ನೀರು ಭೀಮೆಗೆ ಹರಿದುಬರುತ್ತಿರುವ ಕಾರಣ ಭೀಮೆ ಉಕ್ಕಿ ಹರಿಯುತ್ತಿದೆ. ಈ ಮಧ್ಯೆ ಇಂಡಿ ತಾಲೂಕಿನ ಗುಬ್ಬೇವಾಡದ ಬಳಿ ಮಹಾರಾಷ್ಟ್ರ ನಿರ್ಮಿಸಿರುವ ಹಿಳ್ಳಿ ಬ್ಯಾರೇಜ್‌ ಗೇಟ್‌ ಮುಚ್ಚಿರುವ ಕಾರಣ ನೀರು ಕರ್ನಾಟಕ ಗಡಿ ಭಾಗದ ಹಳ್ಳಿಗಳ ಹೊಲ ಗದ್ದೆಗಳಿಗೆ ನುಗ್ಗುತ್ತಿದೆ.

ಉಕ್ಕಿ ಹರಿಯುತಿಹ ನೀರಿನಿಂದ ದಡದಲ್ಲಿರುವ 25 ಎಕರೆ ಜಮೀನಲ್ಲಿ ಬೆಳೆದು ನಿಂತಿದ್ದ ಬಾಳೆ, ಕಬ್ಬು ಹಾಗೂ ಪಂಪ್‌ಸೆಟ್‌ಗಳು ಕೊಚ್ಚಿ ಹೋಗಿವೆ. ನೀರಿನ ರಭಸಕ್ಕೆ ತೋಟ, ಹೊಲ, ಗದ್ದೆಗಳ ಮಣ್ಣು ಕುಸಿಯುತ್ತಿದೆ. ಸುಮಾರು 50 ಲಕ್ಷ ಕ್ಕೂ ಹೆಚ್ಚು ಹಾನಿ ಆಗಿದೆ ಎಂದು ಅಂದಾಜು ಮಾಡಲಾಗಿದೆ.

ಭೂ ಕೊರೆತದಿಂದ ಜಮೀನಿನ ಪಕ್ಕದಲ್ಲಿ 30 ಅಡಿ ಆಳದ ಹೊಂಡ ನಿರ್ಮಾಣವಾಗಿದೆ. ಮಹಾರಾಷ್ಟ್ರ ನೀರಾವರಿ ಅಧಿಕಾರಿಗಳೊಂದಿಗೆ ಬಿಜಾಪುರ ಜಿಲ್ಲಾಧಿಕಾರಿ ರಾಕೇಶ್‌ ಸಿಂಗ್‌ ಮಾತುಕತೆ ನಡೆಸಿದ್ದಾರೆ. ಆಗಿರುವ ನಷ್ಟಕ್ಕೆ ಪರಿಹಾರ ನೀಡುವಂತೆ ಜಿಲ್ಲೆಯ ರೈತರು ಒತ್ತಾಯಿಸುತ್ತಿದ್ದಾರೆ.

(ಇನ್‌ಫೋ ವಾರ್ತೆ)

ವಾರ್ತಾ ಸಂಚಯ
ಮುಖಪುಟ / ಇವತ್ತು... ಈ ಹೊತ್ತು...