ವಾಯುದಾಳಿಗೆ ತಾಲಿಬಾನ್‌ ವಾಯುಪಡೆ ಮುಖ್ಯಸ್ಥ ಬಲಿ-ಐಆರ್‌ಎನ್‌ಎ

ಟೆಹರಾನ್‌: ಅಮೆರಿಕ ಹಾಗೂ ಬ್ರಿಟನ್‌ ಪಡೆಗಳು ಆಫ್ಘಾನಿಸ್ತಾನದ ಮೇಲೆ ನಡೆಸಿರುವ ವಾಯು ದಾಳಿಗೆ ತಾಲಿಬಾನ್‌ ವಾಯುಪಡೆಗಳ ಮುಖ್ಯಸ್ಥ ಬಲಿಯಾಗಿದ್ದಾರೆಂದು ಇರಾನಿಯನ್‌ ನ್ಯೂಸ್‌ ಏಜೆನ್ಸಿ (ಐಆರ್‌ಎನ್‌ಎ) ವರದಿ ಮಾಡಿದೆ.

ವಾಯುಪಡೆಗಳ ಮುಖ್ಯಸ್ಥ ಅಖ್ತರ್‌ ಮೊಹಮದ್‌ ಮನ್ಸೂರ್‌ ಅವರು ಸೋಮವಾರ ಅಮೆರಿಕ ಹಾಗೂ ಬ್ರಿಟನ್‌ ಪಡೆಗಳು ನಡೆಸಿದ ವಾಯು ದಾಳಿಯಾಂದರಲ್ಲಿ ಬಾಂಬ್‌ಗೆ ಬಲಿಯಾಗಿದ್ದಾರೆ ಎಂದು ಮಾಹಿತಿ ಮೂಲಗಳನ್ನುಲ್ಲೇಖಿಸಿ ಐಆರ್‌ಎನ್‌ಎ ವರದಿ ಮಾಡಿದೆ. ಮತ್ತೊಬ್ಬ ಉನ್ನತ ಮಿಲಿಟರಿ ಅಧಿಕಾರಿ ನಂಗರ್‌ಹಾರ್ಸ್‌ನ ಪ್ರಥಮ ಬೆಟಾಲಿಯನ್‌ನ ಕಮಾಂಡರ್‌ ಜನರಲ್‌ ಉಮರ್‌ ಅಟ್ಜೆ ಅವರು ಕೂಡ ಬಾಂಬ್‌ ದಾಳಿಗೆ ಬಲಿಯಾಗಿದ್ದಾರೆಂದು ಐಆರ್‌ಎನ್‌ಎ ತಿಳಿಸಿದೆ.

ಆಪ್ಘಾನಿಸ್ತಾನದಿಂದ ದೂರವಾಣಿ ಮೂಲಕ ಈ ಮಾಹಿತಿಯನ್ನು ಪಡೆಯಲಾಗಿದ್ದು , ತಾಲಿಬಾನ್‌ನ ಉನ್ನತ ಅಧಿಕಾರಿಗಳು ಬಾಂಬ್‌ ದಾಳಿಗೆ ಬಲಿಯಾಗಿರುವ ವಿಷಯವನ್ನು ಇತರ ಮೂಲಗಳು ಖಚಿತ ಪಡಿಸಿಲ್ಲ ಎಂದೂ ಐಆರ್‌ಎನ್‌ಎ ತಿಳಿಸಿದೆ. ಸೋಮವಾರದ ವಾಯುದಾಳಿಗಳು ತಾಲಿಬಾನ್‌ ಆಡಳಿತದ ಶಕ್ತಿಯನ್ನು ಹಾಗೂ ಭಯೋತ್ಪಾದಕರ ಜಾಲಗಳನ್ನು ದುರ್ಬಲಗೊಳಿಸಿದೆ ಎನ್ನಲಾಗಿದೆ.

(ಪಿಟಿಐ)