ಬೆಂಗಳೂರಿನಲ್ಲಿ ರಾಷ್ಟ್ರೀಯ ಆರೋಗ್ಯ ವಿಜ್ಞಾನ ಅಕಾಡೆಮಿಯ ಉದಯ

ಬೆಂಗಳೂರು : ನ್ಯೂಯಾರ್ಕ್‌ ಹಾಗೂ ವಾಷಿಂಗ್ಟನ್‌ ದುರಂತದ ಬಳಿಕ ಅಮೆರಿಕಕ್ಕೆ ನರ್ಸ್‌ಗಳ ಅಗತ್ಯವಿದ್ದು, ಭಾರತದಿಂದ ಅಮೆರಿಕೆಗೆ ತೆರಳುವ ವೈದ್ಯ ಸಿಬ್ಬಂದಿಗೆ ಪ್ರವೇಶ ಪರೀಕ್ಷೆ ನಡೆಸುವ ರಾಷ್ಟ್ರೀಯ ಆರೋಗ್ಯ ವಿಜ್ಞಾನ ಅಕಾಡೆಮಿ(ಎನ್‌ಎಎಚ್‌ಎಸ್‌) ನಗರದಲ್ಲಿ ಆರಂಭವಾಗಿದೆ.

ವೈದ್ಯರು, ನರ್ಸ್‌ಗಳು ಮತ್ತು ಆರೋಗ್ಯ ನಿರ್ವಹಣಾ ಅಧಿಕಾರಿಗಳನ್ನು ಎನ್‌ಎಎಚ್‌ಎಸ್‌ ಒಳಗೊಂಡಿದೆ. ವಿದೇಶಗಳಿಗೆ ತೆರಳ ಬಯಸುವ ವೈದ್ಯಾಧಿಕಾರಿಗಳಿಗೆ ತರಬೇತಿ ನೀಡುವ ಕೆಲಸವನ್ನು ಈ ಅಕಾಡೆಮಿ ಮಾಡಲಿದೆ. ಈವರೆಗೆ ಅಮೆರಿಕಾದಲ್ಲಿ ಕೆಲಸ ಮಾಡಲು ತೆರಳುವ ಅಧಿಕಾರಿಗಳಿಗೆ ಕೊಲಂಬೊ, ಕರಾಚಿ, ಬ್ಯಾಂಕಾಕ್‌ನಲ್ಲಿ ಮಾತ್ರ ತರಬೇತಿ ಮತ್ತು ಪರೀಕ್ಷೆಗಳನ್ನು ನಡೆಸಲಾಗುತ್ತಿತ್ತು.

ಲಾರ್ಡ್‌ ಆಸ್ಪತ್ರೆಯ ಡಾ. ಜೊಸೆಫ್‌ ಬೆನವೆನ್‌ ಅಕಾಡೆಮಿಯ ನಿರ್ದೇಶಕರಾಗಿ ಕೆಲಸ ಮಾಡುತ್ತಾರೆ. ಅಮೆರಿಕಾಕ್ಕೆ ತೆರಳಬಯಸುವ ನರ್ಸ್‌ಗಳು ಭಾರತದಲ್ಲಿಯೇ ಪರೀಕ್ಷೆ ಬರೆಯಬಹುದು. ಈ ಪರೀಕ್ಷಾ ಕೇಂದ್ರ ಬರುವ ವರ್ಷದ ಮಾರ್ಚ್‌ನಿಂದ ಕೆಲಸ ಆರಂಭಿಸಲಿದೆ ಎಂದು ಜೊಸೆಫ್‌ ತಿಳಿಸಿದ್ದಾರೆ.

ಭವಿಷ್ಯದಲ್ಲಿ ಅಮೆರಿಕಾಗೆ ಸುಮಾರು ಎರಡು ಲಕ್ಷ ಮಂದಿ ನರ್ಸ್‌ಗಳ ಅವಶ್ಯಕತೆ ಇದೆ ಎಂದು ಹೇಳಿದೆ. ಸಾಫ್ಟವೇರ್‌ ಇಂಜಿನಿಯರ್‌ಗಳಿಗೆ ಬೇಡಿಕೆ ಇದ್ದಷ್ಟೇ ನರ್ಸ್‌ಗಳಿಗೂ ಅಲ್ಲಿ ಬೇಡಿಕೆ ಇದೆ. ಪ್ರಸ್ತುತ ಅಮೆರಿಕಾದಲ್ಲಿ ಪರಿಣತಿ ಹೊಂದಿದ ವೈದ್ಯರು ಮತ್ತು ಅಧಿಕಾರಿಗಳು ಅಕಾಡೆಮಿಯಲ್ಲಿ ವಿದೇಶಕ್ಕೆ ತೆರಳಬಯಸುವವರಿಗೆ ತರಬೇತಿ ನೀಡಲಿದ್ದಾರೆ. ಅಕಾಡೆಮಿಯು ಅಮೆರಿಕಾದ ಕೆಲವು ಕಂಪೆನಿಗಳೊಂದಿಗೆ ಒಪ್ಪಂದಗಳನ್ನು ಮಾಡಿಕೊಂಡಿದೆ. ಇದರಿಂದ ಇಲ್ಲಿ ತರಬೇತಿ ಪಡೆದವರು ಅಮೆರಿಕಾದಲ್ಲಿ ಉದ್ಯೋಗ ಗಿಟ್ಟಿಸಿಕೊಳ್ಳುವುದು ಸುಲಭವಾಗುತ್ತದೆ ಎಂದು ಜೊಸೆಫ್‌ ಹೇಳಿದ್ದಾರೆ.

ತರಬೇತಿಯ ಹೊರತಾಗಿ ಅಕಾಡೆಮಿಯು ನರ್ಸಿಂಗ್‌, ನಿರ್ವಹಣೆ ಮತ್ತು ವೈದ್ಯಕೀಯ ಕಾನೂನುಗಳ ತರಬೇತಿಯನ್ನೂ ನಿರಂತರವಾಗಿ ನೀಡುವುದನ್ನು ಮುಂದುವರೆಸಲಿದೆ.

(ಇನ್ಫೋ ವಾರ್ತೆ)