ಯುದ್ಧ ಪರಿಸ್ಥಿತಿ: ಪ್ರಧಾನಿಯಿಂದ ಹೊಸ ರಕ್ಷಣಾ ಸಚಿವರ ನೇಮಕ?

ನವದೆಹಲಿ : ಆಪ್ಘಾನಿಸ್ತಾನದ ಮೇಲೆ ಅಮೆರಿಕಾ ದಾಳಿ ಆರಂಭಿಸಿದ್ದು, ಬದಲಾದ ಜಾಗತಿಕ ಸಂದರ್ಭದ ಕಾರಣ ಹೊಸ ರಕ್ಷಣಾ ಸಚಿವರನ್ನು ಪ್ರಧಾನಿ ವಾಜಪೇಯಿ ಅಕ್ಟೋಬರ್‌ ತಿಂಗಳಲ್ಲಿಯೇ ನೇಮಿಸುವ ಸಾಧ್ಯತೆಯಿದೆ ಎಂದು ಏಷ್ಯನ್‌ ಏಜ್‌ ಪತ್ರಿಕೆ ವರದಿ ಮಾಡಿದೆ.

ತಾಲಿಬಾನ್‌- ಅಮೆರಿಕಾ ಯುದ್ಧದ ಸಂದರ್ಭದಲ್ಲಿ ಭಾರತ ತನ್ನ ಪಡೆಗಳನ್ನು ಕಟ್ಟೆಚ್ಚರದಲ್ಲಿ ಇಟ್ಟಿರಲು ಉದ್ದೇಶಿಸಿದ್ದು , ಈ ಕಾರಣಕ್ಕಾಗಿ ಪೂರ್ಣಕಾಲಿಕ ರಕ್ಷಣಾ ಸಚಿವರನ್ನು ನೇಮಿಸಲು ವಾಜಪೇಯಿ ಉದ್ದೇಶಿಸಿದ್ದಾರೆ. ಅಕ್ಟೋಬರ್‌ 17 ರಂದು ವಾಜಪೇಯಿ ಅವರ ಸಂಪುಟ ವಿಸ್ತರಣೆ ನಡೆಯಬಹುದೆಂದು ನಿರೀಕ್ಷಿಸಲಾಗಿದೆ.

ಪ್ರಸ್ತುತ ವಿದೇಶಾಂಗ ವ್ಯವಹಾರಗಳ ಸಚಿವ ಜಸ್ವಂತ್‌ ಸಿಂಗ್‌ ಅವರು ಹೆಚ್ಚುವರಿಯಾಗಿ ರಕ್ಷಣಾ ಖಾತೆಯನ್ನು ನಿರ್ವಹಿಸುತ್ತಿದ್ದಾರೆ. ತೆಹಲ್ಕಾ ಹಗರಣ ಸಂದರ್ಭದಲ್ಲಿ ರೂಪುಗೊಂಡ ಒತ್ತಡದ ಹಿನ್ನೆಲೆಯಲ್ಲಿ ರಕ್ಷಣಾ ಸಚಿವ ಜಾರ್ಜ್‌ ಫರ್ನಾಂಡಿಸ್‌ ರಾಜೀನಾಮೆ ನೀಡಿದ್ದರು ಹಾಗೂ ರಕ್ಷಣಾ ಖಾತೆಯನ್ನು ಜಸ್ವಂತ್‌ ಅವರಿಗೆ ಪ್ರಧಾನಿ ಹೆಚ್ಚುವರಿ ಖಾತೆಯಾಗಿ ವಹಿಸಿಕೊಟ್ಟಿದ್ದರು.

ಬದಲಾದ ಅಂತರರಾಷ್ಟ್ರೀಯ ಸಂದರ್ಭದಲ್ಲಿ ಜಸ್ವಂತ್‌ ಸಿಂಗ್‌ ಅವರು ಎರಡೂ ಖಾತೆಗಳನ್ನು ಪರಿಣಾಮಕಾರಿಯಾಗಿ ನಿರ್ವಹಿಸುವುದು ಕಷ್ಟ ಎಂದು ಬಿಜೆಪಿಯ ಹಿರಿಯ ಮುಖಂಡರೊಬ್ಬರು ಅಭಿಪ್ರಾಯಪಟ್ಟಿದ್ದಾರೆ. 16 ಪಕ್ಷಗಳ ಒಕ್ಕೂಟವಾದ ರಾಷ್ಟ್ರೀಯ ಪ್ರಜಾಸತ್ತಾತ್ಮಕ ಒಕ್ಕೂಟದ ನೇತಾರರಾಗಿರುವ ವಾಜಪೇಯಿ ಸಂಪುಟದಲ್ಲಿ ಪ್ರಸ್ತುತ 76 ಮಂದಿ ಸಚಿವರಿದ್ದಾರೆ.

(ಏಜೆನ್ಸೀಸ್‌)