ಬಾಂಬ್‌ ದಾಳಿಗೆ ತತ್ತರಿಸಿದ ಆಪ್ಘಾನಿಸ್ತಾನ, ಸಾವು ನೋವು ಸಂಭವ

ಇಸ್ಲಮಾಬಾದ್‌: ಆಪ್ಘಾನಿಸ್ತಾನದ ಮೇಲೆ ಭಾನುವಾರ ರಾತ್ರಿಯಿಂದ ಅಮೆರಿಕ- ಬ್ರಿಟನ್‌ ಪಡೆಗಳು ನಡೆಸುತ್ತಿರುವ ಬಾಂಬ್‌ ದಾಳಿಯಲ್ಲಿ ಆಪ್ಘನ್‌ ನಾಗರಿಕರು ಸಾವಿಗೀಡಾಗಿದ್ದಾರೆಂದು ಪಾಕಿಸ್ತಾನದಲ್ಲಿನ ತಾಲಿಬಾನ್‌ ರಾಯಭಾರಿ ಹೇಳಿದ್ದಾರೆ.

ಇದೊಂದು ಭಾರೀ ದಾಳಿ. ಈ ದಾಳಿಯಲ್ಲಿ ನಾಗರಿಕರು ಸಾವಿಗೀಡಾಗಿದ್ದಾರೆ ಎಂದು ರಾಯಭಾರಿ ಅಬ್ದುಲ್‌ ಸಲಾಂ ಝಹೀಫ್‌ ಮಾಧ್ಯಮಗಳಿಗೆ ತಿಳಿಸಿದ್ದಾರೆ. ಆದರೆ, ಆಪ್ಘಾನಿಸ್ತಾನದ ಯಾವ ಭಾಗದಲ್ಲಿ ಸಾವು ನೋವುಗಳು ಸಂಭವಿಸಿವೆ ಎಂದು ಅವರು ಸ್ಪಷ್ಟಪಡಿಸಿಲ್ಲ .

ಕಂದಹಾರ್‌ನಲ್ಲಿ ವಿಮಾನ ನಿಯಂತ್ರಣ ಗೋಪುರಕ್ಕೆ ಹಾನಿ

ಅಮೆರಿಕ- ಬ್ರಿಟನ್‌ಗಳು ನಡೆಸಿರುವ ಬಾಂಬ್‌ ದಾಳಿಯಲ್ಲಿ ಕಂದಹಾರ್‌ನ ವಿಮಾನ ನಿಯಂತ್ರಣ ಗೋಪುರಕ್ಕೆ ಭಾರೀ ಹಾನಿ ಸಂಭವಿಸಿದೆ. ಆಪ್ಘಾನಿಸ್ತಾನದ ಮೇಲೆ ಈವರೆಗೆ ಕನಿಷ್ಠ 50 ಕ್ಷಿಪಣಿಗಳನ್ನು ಉಡಾಯಿಸಿದ್ದು , ಇವುಗಳ ಸದ್ದು ಇಸ್ಲಾಮಾಬಾದ್‌ವರೆಗೂ ಕೇಳಿಸುತ್ತಿತ್ತು ಎಂದು ವರದಿಗಳು ತಿಳಿಸಿವೆ.

ಮುಲ್ಲಾ ಮೊಹಮದ್‌ ಓಮರ್‌ ಮನೆಯ ಮೇಲೂ ದಾಳಿ

ತಾಲಿಬಾನ್‌ನ ಮುಖ್ಯಸ್ಥ ಮುಲ್ಲಾ ಮೊಹಮದ್‌ ಓಮರ್‌ ನಿವಾಸದ ಮೇಲೂ ಅಮೆರಿಕ- ಬ್ರಿಟನ್‌ ಬಾಂಬ್‌ ದಾಳಿಯನ್ನು ನಡೆಸಿವೆ. ಆದರೆ, ಓಮರ್‌ಗೆ ಯಾವುದೇ ಹಾನಿ ಸಂಭವಿಸಿಲ್ಲ ಎನ್ನಲಾಗಿದೆ.

ದಾಳಿಗೆ ಸ್ಪೇನ್‌, ಇರಾಕ್‌ ವಿರೋಧ

ಆಪ್ಘನಿಸ್ತಾನ ವಿರುದ್ಧ ವೈಮಾನಿಕ ದಾಳಿ ಆರಂಭಿಸಿರುವ ಅಮೆರಿಕ ಹಾಗೂ ಮಿತ್ರರಾಷ್ಟ್ರಗಳ ಕ್ರಮಕ್ಕೆ ಸ್ಪೇನ್‌ ಹಾಗೂ ಇರಾಕ್‌ಗಳು ತಮ್ಮ ವಿರೋಧ ವ್ಯಕ್ತಪಡಿಸಿವೆ. ಆದರೆ, ಜಪಾನ್‌ ಬಾಂಬ್‌ ದಾಳಿಯನ್ನು ಸಮರ್ಥಿಸಿದೆ.

(ಏಜೆನ್ಸೀಸ್‌)