ಮುಂದಿನ ವಾರ ಅಮೆರಿಕಾ ಸೆಕ್ರೆಟರಿ ಆಫ್‌ ಸ್ಟೇಟ್‌ ಪೊವೆಲ್‌ ಭಾರತಕ್ಕೆ

ವಾಷಿಂಗ್ಟನ್‌ : ಆಫ್ಘಾನಿಸ್ತಾನದ ಮೇಲೆ ಭಾನುವಾರ ಪ್ರಾರಂಭವಾಗಿರುವ ದಾಳಿಗೆ ಸಂಪೂರ್ಣ ಬೆಂಬಲ ಪಡೆಯುವ ಸಲುವಾಗಿ ಅಮೆರಿಕಾ ಕಾರ್ಯದರ್ಶಿ (ಸೆಕ್ರೆಟರಿ ಆಫ್‌ ಸ್ಟೇಟ್‌) ಕೊಲಿನ್‌ ಪೊವೆಲ್‌ ಮುಂದಿನ ವಾರ ಭಾರತ ಮತ್ತು ಪಾಕಿಸ್ತಾನಕ್ಕೆ ಭೇಟಿ ನೀಡಲಿದ್ದಾರೆ.

ಇಲಾಖಾ ಕಚೇರಿ ಮೂಲಗಳು ಈ ವಿಷಯವನ್ನು ಸ್ಪಷ್ಟಪಡಿಸಿದ್ದು, ಪ್ರಯಾಣದ ದಿನಾಂಕ ಇನ್ನೂ ನಿಗದಿಯಾಗಿಲ್ಲ. ಅಕ್ಟೋಬರ್‌ 17 ಹಾಗೂ 18ರಂದು ಶಾಂಘೖನಲ್ಲಿ ನಡೆಯಲಿರುವ ಏಷ್ಯಾ- ಪೆಸಿಫಿಕ್‌ ಆರ್ಥಿಕ ಸಹಕಾರಿ ಸಂಘದ ವಿದೇಶಾಂಗ ಸಚಿವರ ಸಭೆಗೆ ಮುನ್ನ ಪೊವೆಲ್‌ ಭಾರತ ಹಾಗೂ ಪಾಕ್‌ಗೆ ಭೇಟಿ ನೀಡುವ ನಿರೀಕ್ಷೆಯಿದೆ. ಯಾಕೆಂದರೆ ಆ ಸಭೆಯಲ್ಲಿ ಪೊವೆಲ್‌ ಹಾಜರಿ ಖಾತರಿಯಾಗಿದೆ.

ಜೈಷ್‌-ಇ-ಮೊಹಮ್ಮದ್‌ಗೂ ಗುರಿ : ಆಫ್ಘಾನಿಸ್ತಾನದ ಮೇಲೆ ದಾಳಿ ಘೋಷಿಸುವ ಮುನ್ನ ಅಮೆರಿಕಾ ಅಧ್ಯಕ್ಷ ಜಾರ್ಜ್‌ ಡಬ್ಲ್ಯು ಬುಷ್‌ ಭಾರತದ ಪ್ರಧಾನಿ ಎ.ಬಿ.ವಾಜಪೇಯಿ ಅವರ ಜೊತೆ 15 ನಿಮಿಷಗಳ ಮಾತುಕತೆ ನಡೆಸಿದರು. ಅಮೆರಿಕಾ ಗುರಿಯಿಟ್ಟಿರುವ ಉಗ್ರರಲ್ಲಿ ಜೈಷ್‌-ಇ-ಮೊಹಮ್ಮದ್‌ ಕೂಡ ಒಬ್ಬ ಎಂದು ಬುಷ್‌, ವಾಜಪೇಯಿ ಅವರಿಗೆ ತಿಳಿಸಿದ್ದಾರೆ.

(ಪಿಟಿಐ)