ಕರ್ನಾಟಕದಲ್ಲಿ ಸಾಕಷ್ಟು ಮಳೆಯಾಗಿದೆಯಂತೆ, ಆದರೆ ಬೆಳೆಯಾಗಿದೆಯಾ?

ನವದೆಹಲಿ : ರಾಜ್ಯ ಬರದಿಂದ ತತ್ತರಿಸುತ್ತಿದೆ ಎಂದು ಸರಕಾರ ಬಾಯಿ ಬಡಿದುಕೊಳ್ಳುತ್ತಿದ್ದರೂ, ಉತ್ತರ ಕರ್ನಾಟಕ ಸೇರಿದಂತೆ ಶಿವಮೊಗ್ಗದ ಮಂದಿಯೂ ಕಡಿಮೆಯಾಗಿರುವ ಮಳೆಗೆ ಶಾಪ ಹಾಕುವಷ್ಟು ರೋಸಿ ಹೋಗಿದ್ದರೂ, ಭಾರತೀಯ ಹವಾಮಾನ ಇಲಾಖೆಯು ಕರ್ನಾಟಕದಲ್ಲಿ ಮಳೆಯ ಪ್ರಮಾಣ ಸಹಜ ಸ್ಥಿತಿಯಲ್ಲಿದೆ ಎಂದು ವರದಿ ಮುಂದಿಟ್ಟು ತಣ್ಣಗೆ ಕುಳಿತಿದೆ.

ಭಾರತೀಯ ಹವಾಮಾನ ಇಲಾಖೆಯ ಪ್ರಕಾರ ರಾಜ್ಯದಲ್ಲಿ ಮಳೆ ಒಂದಿಷ್ಟು ಕಡಿಮೆಯಾಗಿದ್ದರೂ ಅಂತಹ ತತ್ವಾರವೇನೂ ತಂದಿಟ್ಟಿಲ್ಲ. ಸರಾಸರಿ ಲೆಕ್ಕದಲ್ಲಿ ದೇಶದಲ್ಲಿ ಶೇ 92ರಷ್ಟು ಮಳೆಯಾಗಿದೆ. ದೇಶದ ಆಗ್ನೇಯ ಭಾಗ ಮತ್ತು ನೈರುತ್ಯ ಭಾಗದಲ್ಲಿ ನಿರೀಕ್ಷೆಗಿಂತ ಸ್ವಲ್ಪ ಕಡಿಮೆ ಮಳೆ ಬಿದ್ದಿದೆ.

ರಾಜ್ಯದ ಉತ್ತರ ಒಳನಾಡು , ದಕ್ಷಿಣ ಒಳನಾಡು ಪ್ರದೇಶ ಮತ್ತು ಕರಾವಳಿಯಲ್ಲಿ ಸರಾಸರಿ ಮಳೆಗಿಂತ ಅನುಕ್ರಮವಾಗಿ ಶೇ 15, 8 ಹಾಗೂ 6ರಷ್ಟು ಕಡಿಮೆಯಾಗಿದೆ. ಇದು ಹವಾಮಾನ ಇಲಾಖೆಗೆ ಕನಿಷ್ಠ ಮಳೆ ಎಂದು ಘೋಷಿಸುವಷ್ಟು ತೀರಾ ಕಡಿಮೆಯೇನಲ್ಲ. 2000-2001ನೇ ಇಸವಿಯಲ್ಲಿ ರಾಜ್ಯದ ಯಾವ ಜಿಲ್ಲೆಯಲ್ಲಿಯೂ ಶೇ 25ಕ್ಕಿಂತ ಕಡಿಮೆ ಮಳೆ ಬಿದ್ದ ಪ್ರದೇಶ ಯಾವುದೂ ಇಲ್ಲ. ಮಾನ್‌ಸೂನ್‌ನ ಕೊನೆಗೆ 35 ಹವಾಮಾನ ಉಪವಿಭಾಗಗಳಲ್ಲಿ 30 ವಿಭಾಗಗಳ ಶೇ 86ರಷ್ಟು ಪ್ರದೇಶಗಳು ಮಳೆ ಕಂಡಿವೆ. ಅಂದರೆ ಸುಮಾರು ಶೇ. 68 ಜಿಲ್ಲೆಗಳು ಸಾಕಷ್ಟು ಮಳೆ ಪಡೆದಿವೆ.

(ಇನ್ಫೋ ವಾರ್ತೆ)