ಕರ್ನಾಟಕ ಐ.ಟಿ. ಕಂಪನಿಗಳ ಕುರಿತ ‘ಮಾಹಿತಿ ಭಂಡಾರ’ ಸಿದ್ಧ
ಬೆಂಗಳೂರು : ಕರ್ನಾಟಕದಲ್ಲಿರುವ ಎಲ್ಲ ಮಾಹಿತಿ ತಂತ್ರಜ್ಞಾನ ಉದ್ಯಮಗಳ ಸಮಗ್ರ ಮಾಹಿತಿ ಒದಗಿಸುವ ‘ಮಾಹಿತಿ ಭಂಡಾರ’ವೊಂದನ್ನು ಬೆಂಗಳೂರಿನ ಸಿಟಿ ಇನ್ಫೋ ಸರ್ವೀಸಸ್ ಸಂಸ್ಥೆ ಸಿದ್ಧಪಡಿಸಿದೆ. ಈ ಮಾಹಿತಿ ಭಂಡಾರವು ಸಿಡಿ ಹಾಗೂ ಮುದ್ರಿತ ಸಾಮಗ್ರಿಯ ರೂಪದಲ್ಲಿ ಲಭ್ಯ.
ನವೆಂಬರ್ 1ರಿಂದ 5ನೇ ತಾರೀಖಿನವರೆಗೆ ಬೆಂಗಳೂರಿನಲ್ಲಿ ನಡೆಯಲಿರುವ ಬೆಂಗಳೂರು ಐಟಿ.ಕಾಂ ಮೇಳದಲ್ಲಿ ಮಾಹಿತಿ ಭಂಡಾರದ ಸಿ.ಡಿ.ಯನ್ನು ಬಿಡುಗಡೆ ಮಾಡಲಾಗುವುದು. ಈ ವಿಷಯವನ್ನು ಸಂಸ್ಥೆಯ ವ್ಯವಸ್ಥಾಪಕ ನಿರ್ದೇಶಕ ಕೆ.ಜೆ. ಶೆಟ್ಟಿ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದ್ದಾರೆ.
ಇದರೊಂದಿಗೆ ಗ್ಲೋಬಲ್ ಇನ್ಫರ್ಮೇಷನ್ ಪದ್ಧತಿ ಆಧಾರಿತ ನಕಾಶೆಯನ್ನೂ ಸಿದ್ಧಪಡಿಸಲಾಗಿದ್ದು, ಇದು ಯಾವ ಕಂಪನಿ, ಯಾವ ಪ್ರದೇಶದಲ್ಲಿದೆ ಎಂಬ ಮಾಹಿತಿಯ ಜೊತೆಗೆ ಐ.ಟಿ. ಕಂಪನಿಗಳು ಮತ್ತು ಐ.ಟಿ. ಆಧಾರಿತ ಇನ್ನಿತರ ಕಂಪನಿಗಳ ಮಾಹಿತಿಯನ್ನೂ ಒದಗಿಸುತ್ತದೆ ಎಂದರು.
ಬೆಂಗಳೂರಿನಲ್ಲಿರುವ ಕಂಪನಿಗಳು ಯಾವ ಸ್ಥಳದಲ್ಲಿದೆ. ಅಲ್ಲಿಗೆ ಹೋಗುವುದು ಹೇಗೆ ಎಂಬುದನ್ನೂ ಕಂಪ್ಯೂಟರ್ ತೆರೆಯ ಮೇಲೆ ತಿಳಿದುಕೊಳ್ಳಲು ಗ್ಲೋಬಲ್ ಇನ್ಫರ್ಮೇಷನ್ ಸಿಸ್ಟಮ್ನ ನಕಾಶೆ ನೆರವಾಗುತ್ತದೆ. ಈ ಮಾಹಿತಿಗಳನ್ನು ಕಾಲಕಾಲಕ್ಕೆ ಪರಿಷ್ಕರಿಸಲಾಗುತ್ತದೆ ಎಂದೂ ಅವರು ವಿವರಿಸಿದರು.
ಪರಿಷ್ಕೃತ ಮಾಹಿತಿಯನ್ನು ಸಿ.ಡಿ. ಕೊಂಡವರಿಗೆ ಮಾತ್ರ ಇಂಟರ್ನೆಟ್ ಮೂಲಕ ಪಡೆದುಕೊಳ್ಳುವ ವ್ಯವಸ್ಥೆ ಮಾಡಲಾಗಿದೆ ಎಂದರು.