ಶಿರಹಟ್ಟಿ ತಾಲೂಕು ಕುಡಿವ ನೀರು ಯೋಜನೆಗೆ ಚಾಲನೆ

ಶಿರಹಟ್ಟಿ : ಲಕ್ಷ್ಮೇಶ್ವರಕ್ಕೆ ಕುಡಿಯುವ ನೀರು ಒದಗಿಸುವ ಯೋಜನೆಗೆ ಕೊನೆಗೂ ಚಾಲನೆ ಸಿಕ್ಕಿದೆ. ಬಹುದಿನಗಳಿಂದ ನೆನೆಗುದಿಗೆ ಬಿದ್ದಿದ್ದ ಈ ಯೋಜನೆಯ ಉದ್ಘಾಟನೆ ನೆರವೇರಿದೆ. ಶಾಸಕ ಜಿ.ಎಸ್‌. ಗಡ್ಡದೇವರಮಠ ಇತ್ತೀಚೆಗೆ ಶಿರಹಟ್ಟಿ ತಾಲೂಕಿನ ಮೇವುಂಡಿ ಗ್ರಾಮದಲ್ಲಿ ಈ ಯೋಜನೆ ಉದ್ಘಾಟಿಸಿದ್ದಾರೆ.

ಮದ್ದೂರು ಮತ್ತು ಲಕ್ಷ್ಮೇಶ್ವರ ಮುನಿಸಿಪಾಲಿಟಿಗಳು ಈ ಕುಡಿಯುವ ನೀರಿನ ಯೋಜನೆಗೆ ಅಂಗೀಕಾರ ನೀಡಿವೆ. ಯೋಜನೆಯ ಅಂದಾಜುವೆಚ್ಚ 15.19 ಕೋಟಿ ರುಪಾಯಿಗಳು. ಈ ಪೈಕಿ ರಾಜ್ಯ ಸರಕಾರವು 5.51 ಕೋಟಿ ರುಪಾಯಿಗಳನ್ನು ಯೋಜನೆಗೆ ಒದಗಿಸುತ್ತಿದ್ದರೆ, ಭಾರತೀಯ ಜೀವವಿಮಾ ನಿಗಮವು 5.50 ಕೋಟಿ ರುಪಾಯಿಗಳನ್ನು ನೀಡಲಿದೆ.

ಗ್ರಾಮೀಣಾಭಿವೃದ್ಧಿ ಇಲಾಖೆ ಯೋಜನೆಗೆ 4.18 ಕೋಟಿ ರುಪಾಯಿ ಒದಗಿಸುತ್ತಿದೆ. ಈ ವಿಷಯವನ್ನು ತಿಳಿಸಿರುವ ಶಾಸಕ ಗಡ್ಡದೇವರ ಮಠ ಅವರು, ರಾಜ್ಯ ಸರಕಾರವು ಎಲ್ಲರಿಗೂ ಉತ್ತಮ ಕುಡಿಯುವ ನೀರು ಒದಗಿಸುವ ಕಳಕಳಿ ಹೊಂದಿದ್ದು, ಯೋಜನೆಯು ಎರಡು ವರ್ಷಗಳೊಳಗೆ ಜಾರಿಗೆ ಬರಲಿದೆ ಎಂದರು.

ಇಲ್ಲಿನ ಪಂಚಲಿಂಗೇಶ್ವರ ದೇವಾಲಯದಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಶಂಕರಪ್ಪ ಮೆಡ್ಲೇರಿ, ಸಿರಾಜುದ್ದೀನ್‌, ನರಸಿಂಹ ಹೊಂಬಾಳ್‌ ಮೊದಲಾದವರು ಹಾಜರಿದ್ದರು.

ಪ್ರತಿಭಟನೆ : ಯೋಜನೆಗಾಗಿ ಸಣ್ಣ ನೀರಾವರಿ ಇಲಾಖೆ ವಶಪಡಿಸಿಕೊಂಡಿರುವ ಭೂ ಮಾಲಿಕರು, ಆದಷ್ಟು ಶೀಘ್ರವಾಗಿ ಪರಿಹಾರ ಧನ ವಿತರಿಸುವಂತೆ ಆಗ್ರಹಿಸಿ, ಕಚೇರಿಯ ಎದುರು ಧರಣಿ ನಡೆಸಿದರು. ವರದಿಗಳ ರೀತ್ಯ 19 ರೈತರಿಗೆ ಪರಿಹಾರ ಧನ ನೀಡಲಾಗಿದೆ.

(ಇನ್‌ಫೋ ವಾರ್ತೆ)