ರಾಯಚೂರು: 350 ಹಾಸಿಗೆ ಸಾಮರ್ಥ್ಯದ ಹೈಟೆಕ್‌ ಆಸ್ಪತ್ರೆಗೆ ಅಪೊಲೊ ರಂಗು

ಬೆಂಗಳೂರು : 350 ಹಾಸಿಗೆಗಳ ಸಾಮರ್ಥ್ಯದ ಉತ್ತರ ಕರ್ನಾಟಕದ ರಾಯಚೂರಿನ ಹೈಟೆಕ್‌ ಆಸ್ಪತ್ರೆಯ ನಿರ್ವಹಣೆಗೆ ಸಂಬಂಧಿಸಿದಂತೆ ಕರ್ನಾಟಕ ಆರೋಗ್ಯ ಇಲಾಖೆ ಹಾಗೂ ಅಪೊಲೊ ಹಾಸ್ಪಿಟಲ್ಸ್‌ ಎಂಟರ್‌ಪ್ರೆೃಸ್‌ ಲಿಮಿಟೆಡ್‌ ಮಹತ್ವದ ಒಪ್ಪಂದವೊಂದಕ್ಕೆ ಸೋಮವಾರ ಸಹಿ ಹಾಕಿವೆ.

ಒಪ್ಪಂದದ ಪ್ರಕಾರ-
ಸಾಮಾನ್ಯ ಸೇವೆಗಳ ಜೊತೆಗೆ ಕಾರ್ಡಿಯಾಲಜಿ, ನ್ಯೂರಾಲಜಿ, ನ್ಯೂರೋ ಸರ್ಜರಿ, ಯೂರಾಲಜಿ, ನೆಫ್ರಾಲಜಿ ಹಾಗೂ ಗ್ಯಾಸ್ಟ್ರೋಎಂಟರಾಲಜಿ ಕ್ಷೇತ್ರಗಳಲ್ಲಿ ತೃತೀಯ ಹಂತದಲ್ಲಿ ಸೇವೆಗಳನ್ನು ಅಪೊಲೊ ಆಸ್ಪತ್ರೆ ಲಿಮಿಟೆಡ್‌ ಒದಗಿಸಲಿದೆ ಎಂದು ಆರೋಗ್ಯ ಸಚಿವ ಡಾ.ಮಲಕರೆಡ್ಡಿ ಒಪ್ಪಂದದ ನಂತರ ಸುದ್ದಿಗಾರರಿಗೆ ತಿಳಿಸಿದರು.

ವಿಯೆನ್ನಾದ ಪೆಟ್ರೋಲಿಯಂ ರಫ್ತು ರಾಷ್ಟ್ರಗಳ ನಿಧಿ ಸಹಕಾರದಲ್ಲಿ , 35 ಕೋಟಿ ರುಪಾಯಿಗಳ ವೆಚ್ಚದಲ್ಲಿ ರಾಯಚೂರು ಆಸ್ಪತ್ರೆಯನ್ನು ನಿರ್ಮಿಸಲಾಗಿದೆ. ಅಪೊಲೊದ ಐವರು ಹಾಗೂ ಸರ್ಕಾರದ ಆರು ಮಂದಿ ಸದಸ್ಯರು ಈ ಆಸ್ಪತ್ರೆಯ ನಿರ್ವಹಣಾ ಸಮಿತಿಯಲ್ಲಿರುತ್ತಾರೆ. ಹಾಸಿಗೆಗಳ ಶುಲ್ಕದಲ್ಲಿ ಬಡರೋಗಿಗಳು ಪ್ರತಿಶತ 40 ರ ರಿಯಾಯಿತಿ ಪಡೆಯಲಿದ್ದು , ರಾಜ್ಯ ಸರ್ಕಾರ ರಿಯಾಯಿತಿ ದರವನ್ನು ಭರಿಸಲಿದೆ ಎಂದು ಸಚಿವರು ಹೇಳಿದರು.

ವೈದ್ಯಕೀಯ ಕಾಲೇಜುಗಳಿಂದ ಗ್ರಾಮೀಣ ಆರೋಗ್ಯ ಕೇಂದ್ರಗಳ ನಿರ್ವಹಣೆ?

ಗ್ರಾಮೀಣ ಪ್ರದೇಶಗಳಲ್ಲಿನ ಪ್ರಾಥಮಿಕ ಆರೋಗ್ಯ ಕೇಂದ್ರಗಳ ನಿರ್ವಹಣೆಯನ್ನು ವೈದ್ಯಕೀಯ ಕಾಲೇಜುಗಳಿಗೆ ವಹಿಸಿಕೊಡುವ ಸಾಧ್ಯಾಸಾಧ್ಯತೆಯನ್ನು ಸರ್ಕಾರ ಪರಿಶೀಲಿಸುತ್ತಿದೆ. ಮುಂದಿನ ಸಂಪುಟ ಸಭೆಯಲ್ಲಿ ಈ ಕುರಿತಾದ ತೀರ್ಮಾನವನ್ನು ಕೈಗೊಳ್ಳಲಾಗುವುದು ಎಂದು ಮಲಕರೆಡ್ಡಿ ತಿಳಿಸಿದರು.

(ಪಿಟಿಐ)