ಟ್ರಿನಿಟಿ ಪ್ರತಿಷ್ಠಾನದಿಂದ ಉಚಿತ ಹೃದಯ ಚಿಕಿತ್ಸಾ ಶಿಬಿರ

ಬೆಂಗಳೂರು : ವಿಶ್ವ ಹೃದಯ ದಿನದ ಪ್ರಯುಕ್ತ ನಗರದ ಟ್ರಿನಿಟಿ ಆಸ್ಪತ್ರೆಯ ಹಾರ್ಟ್‌ ಅಂಡ್‌ ಟ್ರೌಮ ಫೌಂಡೇಷನ್‌ ಬೆಂಗಳೂರಿನ ಬಸವನಗುಡಿಯಲ್ಲಿ ಉಚಿತ ಹೃದಯ ರೋಗ ತಪಾಸಣೆ ಮತ್ತು ಚಿಕಿತ್ಸಾ ಶಿಬಿರವನ್ನು ಏರ್ಪಡಿಸಿತ್ತು.

ಇದೇ ಮೊದಲ ಬಾರಿಗೆ ದೊಡ್ಡ ಪ್ರಮಾಣದಲ್ಲಿ ನಡೆದ ಉಚಿತ ಹೃದಯ ತಪಾಸಣೆ ಹಾಗೂ ಚಿಕಿತ್ಸಾ ಶಿಬಿರದಲ್ಲಿ ಭಾನುವಾರ ಮಧ್ಯಾಹ್ನದವರೆಗೆ ಸುಮಾರು 300ಕ್ಕೂ ಹೆಚ್ಚು ಜನ ತಮ್ಮ ಹೆಸರು ನೋಂದಾಯಿಸಿಕೊಂಡು, ಉಚಿತವಾಗಿ ಹೃದಯ ತಪಾಸಣೆ ಮಾಡಿಸಿಕೊಂಡರು.

ತಪಾಸಣೆಗೆ ಒಳಪಟ್ಟವರಲ್ಲಿ ಶೇಕಡಾ 10 ರಷ್ಟು ಮಂದಿಗೆ ಹೃದಯ ಸಂಬಂಧಿ ಕಾಯಿಲೆಗಳು ಇರುವುದನ್ನು ಪತ್ತೆಹಚ್ಚಿದ ವೈದ್ಯರು, ಉಚಿತ ಚಿಕಿತ್ಸೆ ಹಾಗೂ ಸಲಹೆ ಸೂಚನೆಗಳನ್ನೂ ನೀಡಿದರು. ಹೆಸರಾಂತ ತಜ್ಞ ವೈದ್ಯರಾದ ಡಾ. ಬಿ.ಜಿ. ಮುರಳೀಧರರಾವ್‌ ನೇತೃತ್ವದ ಮೂವರು ವೈದ್ಯರ ತಂಡ ರೋಗಿಗಳ ಪರೀಕ್ಷೆ ನಡೆಸಿತು.

ತಜ್ಞ ವೈದ್ಯರಿಗೆ ಐವರು ಸಹವೈದ್ಯರು ಹಾಗೂ 20ಕ್ಕೂ ಹೆಚ್ಚು ನರ್ಸ್‌ ಹಾಗೂ ತಾಂತ್ರಿಕ ತಜ್ಞರು ನೆರವಾದರು. ಶಿಬಿರದಲ್ಲಿ ಹೃದಯ ಸಂಬಂಧಿ ಕಾಯಿಲೆಗಳ ಬಗ್ಗೆ ಸಾರ್ವಜನಿಕರಿಗೆ ತಿಳಿವಳಿಕೆ ಮೂಡಿಸಲಾಯಿತು.

ಜಯದೇವ : ವಿಶ್ವ ಹೃದಯ ದಿನದ ನಿಮಿತ್ತ ಜಯದೇವ ಹೃದ್ರೋಗ ಆಸ್ಪತ್ರೆಯಲ್ಲಿ ‘ಆರೋಗ್ಯವಂತ ಹೃದಯಕ್ಕಾಗಿ ನಡಿಗೆ’ ಎಂಬ ಕಾರ್ಯಕ್ರಮ ಆಯೋಜಿಸಿದ್ದರೆ, ನಾರಾಯಣ ಹೃದಯಾಲಯವು ವಿಶೇಷ ಹೃದಯ ರೋಗ ತಪಾಸಣೆ ಶಿಬಿರ ಏರ್ಪಡಿಸಿತ್ತು. ಕಾರ್ಯಕ್ರಮದ ಅಂಗವಾಗಿ ರಸಪ್ರಶ್ನೆ ಹಾಗೂ ಉಪನ್ಯಾಸ ಕಾರ್ಯಕ್ರಮಗಳೂ ನಡೆದವು.

ಮಿಲ್ಲರ್ಸ್‌ ರಸ್ತೆಯಲ್ಲಿರುವ ಭಗವಾನ್‌ ಮಹಾವೀರ ಜೈನ್‌ ಹೃದಯ ಕೇಂದ್ರದಲ್ಲಿ ಸಹ ಉಚಿತ ಹೃದಯ ತಪಾಸಣ ಶಿಬಿರ ನಡೆಯಿತು. ಕೇಂದ್ರದ ಅಧ್ಯಕ್ಷ ಡಾ. ಎಸ್‌.ಎಸ್‌. ರಮೇಶ್‌ ನೇತೃತ್ವದಲ್ಲಿ ತಜ್ಞ ವೈದ್ಯರು ಶಿಬಿರದಲ್ಲಿ ರೋಗಿಗಳ ಹೃದಯ ಚಿಕಿತ್ಸೆ ನಡೆಸಿದರು.

ಮಣಿಪಾಲ್‌ ಆಸ್ಪತ್ರೆಯಲ್ಲಿ ಬೆಳಗ್ಗೆ 10ರಿಂದ ಮಧ್ಯಾಹ್ನ 1ಗಂಟೆವರೆಗೆ ಹೃದಯ ರೋಗ ತಪಾಸಣೆ ನಡೆಸಲಾಯಿತು. ವಿಶ್ವ ಹೃದಯ ದಿನದ ಅಂಗವಾಗಿ ರಿಯಾಯಿತಿ ದರದಲ್ಲಿ ಇಸಿಜಿ, ಹೃದಯ ಎಕ್ಸ್‌ರೇ ಮತ್ತು ಇಸಿಎಚ್‌ಓ ಪರೀಕ್ಷೆಗಳನ್ನು ನಡೆಸಲಾಯಿತು. ಎಲ್ಲ ಶಿಬಿರಗಳಲ್ಲೂ ತಂಬಾಕು ಸೇವನೆ ಹೆಚ್ಚುತ್ತಿರುವ ಬಗ್ಗೆ ಆಂತಕ ವ್ಯಕ್ತವಾಯಿತು. ‘ತಂಬಾಕು- ಮದ್ಯ ತ್ಯಜಿಸಿ, ಆರೋಗ್ಯವಂತರಾಗಿ ಬದುಕಿ’ ಎಂಬ ಸಂದೇಶಗಳು ರಾರಾಜಿಸುತ್ತಿದ್ದವು.

(ಇನ್‌ಫೋ ವಾರ್ತೆ)

ಮುಖಪುಟ / ಇವತ್ತು... ಈ ಹೊತ್ತು...