ವೀರಪ್ಪನ್‌ನ 7 ಸಹಚರರಿಗೆ ಜೀವಾವಧಿ ಜೈಲು, 6 ಮಂದಿ ಬಿಡುಗಡೆ

ಮೈಸೂರು: ದೀರ್ಘ ವಿಚಾರಣೆಯ ನಂತರ ಕೊಲೆ ಹಾಗೂ ಸ್ಫೋಟಕಗಳ ಬಳಕೆಯ ಅಪರಾಧದ ಮೇಲೆ ಏಳು ಮಂದಿ ವೀರಪ್ಪನ್‌ ಸಹಚರರಿಗೆ ಇಲ್ಲಿನ ಟಾಡಾ ನ್ಯಾಯಾಲಯ ಶನಿವಾರ ಜೀವಾವಧಿ ಶಿಕ್ಷೆಯನ್ನು ವಿಧಿಸುವ ಮಹತ್ವದ ತೀರ್ಮಾನವನ್ನು ನೀಡಿತು.

ವಿವಿಧ ಪ್ರಕರಣಗಳಲ್ಲಿ ಬಂಧನಕ್ಕೊಳಗಾಗಿದ್ದ ಇತರ ಆರು ಮಂದಿ ವೀರಪ್ಪನ್‌ ಸಹಚರರನ್ನು ಮಾನವೀಯ ನೆಲೆಯ ಆಧಾರದ ಮೇಲೆ (ಜೈಲಿನಲ್ಲಿ ಕಾನೂನು ಬದ್ಧ ಅವಧಿ ಮುಗಿದ ಹಿನ್ನೆಲೆಯಲ್ಲಿ) ನ್ಯಾಯಾಲಯ ಬಿಡುಗಡೆ ಮಾಡಿತು. ಮತ್ತೊಬ್ಬ ಟಾಡಾ ಬಂಧಿಗೆ 2 ವರ್ಷಗಳ ಕಠಿಣ ಸೆರೆವಾಸವನ್ನು ನ್ಯಾಯಾಲಯ ವಿಧಿಸಿತು. ಟಾಡಾ ನ್ಯಾಯಾಲಯದ ನ್ಯಾಯಮೂರ್ತಿ ಡಿ.ಕೃಷ್ಣಪ್ಪ ಈ ಮಹತ್ವದ ತೀರ್ಪನ್ನು ನೀಡಿದರು.

ಟಾಡಾ ಕಾಯ್ದೆಯಡಿ ಬಂಧಿಸಲಾಗಿದ್ದ ಆರೋಪಿಗಳಲ್ಲಿ , 14 ಮಂದಿಯ ಮೇಲೆ ಕೊಲೆ ಸೇರಿದಂತೆ ವಿವಿಧ ಅಪರಾಧ ಕೃತ್ಯಗಳನ್ನು ಎಸಗಿರುವ ಆರೋಪಗಳನ್ನು ಹೊರಿಸಲಾಗಿತ್ತು . ರಾಜ್‌ ಅಪಹರಣದ ಸಂದರ್ಭದಲ್ಲಿ ಟಾಡಾ ಬಂಧಿಗಳನ್ನು ಬಿಡುಗಡೆ ಮಾಡುವಂತೆ ವೀರಪ್ಪನ್‌ ತಮಿಳುನಾಡು ಹಾಗೂ ಕರ್ನಾಟಕ ಸರ್ಕಾರಗಳ ಮೇಲೆ ತೀವ್ರ ಒತ್ತಡ ಹೇರಿದುದನ್ನು, ಸುಪ್ರಿಂಕೋರ್ಟ್‌ನ ಮಧ್ಯ ಪ್ರವೇಶದ ಹಿನ್ನೆಲೆಯಲ್ಲಿ ಟಾಡಾ ಬಂಧಗಳ ಬಿಡುಗಡೆ ಸಾಧ್ಯವಾಗದುದನ್ನು ಇಲ್ಲಿ ಸ್ಮರಿಸಬಹುದು.

ಜೀವಾವಧಿ ಶಿಕ್ಷೆಗೊಳಗಾದ ಖೈದಿಗಳು :
ಸೈಮನ್‌, ಶೇಖರ್‌, ಬಿಲ್ವೇಂದ್ರ, ಕಾಳಿಯಪ್ಪ , ಮೇಕೆ ಮಾದಯ್ಯ, ಜ್ಞಾನಪ್ರಕಾಶ್‌ ಹಾಗೂ ವೀರಸ್ವಾಮಿ.

(ಪಿಟಿಐ)