ಅಮೆರಿಕನ್ನರು ಎಲ್ಲಿದ್ದಾರೆ? ಗೊಂದಲದಲ್ಲಿ ಆಪ್ಘನ್‌ನ ಬಂಡು ಬಣಗಳು

ನ್ಯೂಯಾರ್ಕ್‌ : ನಿಧಾನನೀತಿಯನ್ನು ಅನುಸರಿಸುತ್ತಿರುವ ಅಮೆರಿಕಾದ ಯುದ್ಧತಂತ್ರದ ಸುಳಿವೇ ಗೊತ್ತಾಗದೆ ಆಪ್ಘಾನಿಸ್ತಾನದ ಬಂಡು ಬಣಗಳ ನಾಯಕರು ಚಕಿತರಾಗಿದ್ದಾರೆ. ಆಪ್ಘಾನಿಸ್ತಾನದಲ್ಲಿನ ಆಡಳಿತಾರೂಢ ತಾಲಿಬಾನ್‌ ಸರ್ಕಾರದ ವಿರುದ್ಧದ ದಾಳಿಗೆ ತಮ್ಮ ಸಲಹೆ, ಸಹಾಯವನ್ನು ಅಮೆರಿಕ ಕೋರದಿರುವ ಬಗೆಗೆ ಇವರಿಗೆಲ್ಲ ಅಚ್ಚರಿ. ಜೊತೆಗೆ ತಮ್ಮ ನೆರವು ಪಡೆಯದಿದ್ದಲ್ಲಿ ಅಮೆರಿಕನ್ನರು ಗೆಲುವು ಸಾಧಿಸಲಾರರು ಎನ್ನುವ ವಿಶ್ವಾಸ.

ತಾಲಿಬಾನ್‌ ಮಿಲಿಟರಿ ಹಾಗೂ ಅದರ ಯುದ್ಧತಂತ್ರದ ಬಗ್ಗೆ ಪೂರ್ಣ ಮಾಹಿತಿಯಿಲ್ಲದೆ ಅಮೆರಿಕನ್ನರ ದಾಳಿ ಯಶಸ್ವಿಯಾಗುವುದು ಕಷ್ಟ. ಗೊತ್ತು ಗುರಿಯಿಲ್ಲದೆ ಬಾಂಬ್‌ ದಾಳಿಯ ಉಪಯೋಗವೂ ಅಷ್ಟಕ್ಕಷ್ಟೇ ಎಂದು ಬಂಡುಕೋರರ ಅಧಿಕೃತ ಪ್ರತಿನಿಧಿಗಳು ಹೇಳಿರುವುದಾಗಿ ನ್ಯೂಯಾರ್ಕ್‌ ಟೈಮ್ಸ್‌ ಶನಿವಾರ ವರದಿ ಮಾಡಿದೆ.

ನಾವಿಲ್ಲದೆ ಅಮೆರಿಕಾ ಏನನ್ನೂ ಮಾಡಲು ಸಾಧ್ಯವಿಲ್ಲ ಎಂದು ಉತ್ತರ ಒಕ್ಕೂಟದ ಜನರಲ್‌ ಬಾಬ ಖಾನ್‌ ಹೇಳಿರುವುದಾಗಿ ಪತ್ರಿಕೆಯ ವರದಿ ತಿಳಿಸಿದೆ.

ಗೆರಿಲ್ಲಾ ಕದನ ಕಷ್ಟ - ಬುಷ್‌

ಆಪ್ಘನಿಸ್ತಾನದ ಕಣಿವೆ ಕಂದರಗಳ ನಡುವೆ ತಾಲಿಬಾನ್‌ ಮಿಲಿಟರಿಯಾಂದಿಗೆ ಗೆರಿಲ್ಲಾ ಕದನ ಕಷ್ಟಕರವಾದುದು ಎನ್ನುವುದನ್ನು ಅಮೆರಿಕಾದ ಅಧ್ಯಕ್ಷ ಜಾರ್ಜ್‌ ಬುಷ್‌ ಒಪ್ಪಿಕೊಂಡಿದ್ದಾರೆ. ಕದನ ಕಷ್ಟ ಎನ್ನುವುದರ ಅರಿವು ನಮಗಿದೆ. ಆದರೆ, ಆಪ್ಘಾನಿಸ್ತಾನ ಹಾಗೂ ರಷ್ಯಾ ನಡುವಣ ತಿಕ್ಕಾಟದ ಸಂದರ್ಭದಲ್ಲಿ ಈ ಬಗೆಯ ಯುದ್ಧದ ಬಗೆಗೆ ನಾವು ಅನುಭವ ಹೊಂದಿದ್ದೇವೆ ಎಂದು ಬುಷ್‌ ಹೇಳಿದ್ದಾರೆ.

(ಏಜೆನ್ಸೀಸ್‌)