ಲ್ಯಾಡೆನ್‌ ಪತ್ತೆ, ಉಲೇಮಾಗಳ ಆದೇಶ ಆತನಿಗೆ ಮುಟ್ಟಿದೆ- ತಾಲಿಬಾನ್‌

ಕಾಬೂಲ್‌ : ಅಂತರರಾಷ್ಟ್ರೀಯ ಪಾತಕಿ ಒಸಾಮ ಬಿನ್‌ ಲ್ಯಾಡೆನ್‌ ಪತ್ತೆಯಾಗಿದ್ದು , ದೇಶ ಬಿಟ್ಟು ಹೋಗುವಂತೆ ಆದೇಶಿಸಿರುವ ಉಲೇಮಾಗಳ ನಿರ್ಣಯವನ್ನು ಆತನಿಗೆ ತಲುಪಿಸಲಾಗಿದೆ ಎಂದು ಆಪ್ಘಾನಿಸ್ತಾನದ ತಾಲಿಬಾನ್‌ ಆಡಳಿತ ಗುರುವಾರ ರಾತ್ರಿ ಹೇಳಿಕೊಂಡಿದೆ.

ತಾಲಿಬಾನ್‌ ರಾಯಭಾರಿ ಮುಲ್ಲಾ ಅಬ್ದುಲ್‌ ಸಲೀಂ ಝಹೀಫ್‌ ಅವರ ಹೇಳಿಕೆಯನ್ನುಲ್ಲೇಖಿಸಿ ಎನ್‌ಎನ್‌ಐ ಸುದ್ದಿಸಂಸ್ಥೆ ಈ ವಿಷಯವನ್ನು ವರದಿ ಮಾಡಿದೆ. ತಾಲಿಬಾನ್‌ ತೊರೆಯುವಂತೆ ಒಸಾಮಾಗೆ ತಿಳಿಸಿರುವ ಉಲೇಮಾಗಳ ಸಭೆಯ ನಿರ್ಣಯವನ್ನು ತಾಲಿಬಾನ್‌ ಮುಖ್ಯಸ್ಥ ಮುಲ್ಲಾ ಮೊಹಮದ್‌ ಓಮರ್‌ ಕೂಡ ಅನುಮೋದಿಸಿದ್ದಾರೆಂದು ಎನ್‌ಎನ್‌ಐ ತಿಳಿಸಿದೆ.

ಬಿನ್‌ ಲ್ಯಾಡೆನ್‌ ಕುರಿತು ಯಾವುದೇ ರಾಜಿ ಮಾಡಿಕೊಳ್ಳುವ ಮೂಲಕ ಸಂಭವನೀಯ ಯುದ್ಧವನ್ನು ತಡೆಗಟ್ಟುವ ಯಾವುದೇ ಯೋಚನೆ ಇಲ್ಲವೆಂದೂ, ಇಂಥ ಯೋಚನೆ ಇಸ್ಲಾಂ ಸಂಪ್ರದಾಯಕ್ಕೆ ವಿರುದ್ಧವೆಂದೂ ಝಹೀಫಾ ಹೇಳಿರುವುದಾಗಿ ವರದಿ ತಿಳಿಸಿದೆ.

(ಏಜೆನ್ಸೀಸ್‌)