ಕರಾವಳಿ ಜಿಲ್ಲೆಯ 10 ಪಟ್ಟಣ ಅಭಿವೃದ್ಧಿಗೆ 1056 ಕೋ.ರು. ಯೋಜನೆ

ಬೆಂಗಳೂರು : ಕರ್ನಾಟಕ ನಗರ ಮೂಲಭೂತ ಸೌಕರ್ಯ ಅಭಿವೃದ್ಧಿ ಮತ್ತು ಹಣಕಾಸು ನಿಗಮ ಕೈಗೆತ್ತಿಕೊಂಡಿರುವ ಎಲ್ಲ ಮೂಲಭೂತ ಸೌಕರ್ಯಗಳ ಕಾಮಗಾರಿಗಳನ್ನೂ ಪೂರ್ಣಗೊಳಿಸಲು ರಾಜ್ಯ ಸರಕಾರ ಕ್ರಮ ಕೈಗೊಂಡಿದೆ. ಈ ವಿಷಯವನ್ನು ಕಾನೂನು ಸಚಿವ ಡಿ.ಬಿ. ಚಂದ್ರೇಗೌಡ ತಿಳಿಸಿದ್ದಾರೆ.

ಕಾಮಗಾರಿಗಳ ಪ್ರಗತಿ ಪರಿಶೀಲನೆ ನಡೆಸಿದ ಬಳಿಕ ಸುದ್ದಿಗೋಷ್ಠಿಯನ್ನುದ್ದೇಶಿಸಿ ಮಾತನಾಡುತ್ತಿದ್ದ ಅವರು, ಈ ವರ್ಷದ ಡಿಸೆಂಬರ್‌ ಅಂತ್ಯದ ವೇಳೆಗೆ ಎ.ಡಿ.ಬಿ. ಒದಗಿಸಿರುವ 510 ಕೋಟಿ ರುಪಾಯಿಗಳ ನೆರವಿನ ಸದ್ಬಳಕೆಗೆ ಕ್ರಮ ಕೈಗೊಳ್ಳಲಾಗುವುದು ಎಂದರು.

ಎಡಿಬಿ ನೆರವಿನಲ್ಲಿ ಕೈಗೆತ್ತಿಕೊಳ್ಳಲಾಗಿರುವ ಬಹುತೇಕ ಕಾಮಗಾರಿಗಳು ಮುಗಿದಿವೆ. ಈಗಾಗಲೇ 374 ಕೋಟಿ ರುಪಾಯಿಗಳನ್ನು ಮೈಸೂರು, ತುಮಕೂರು, ರಾಮನಗರ ಮತ್ತು ಚನ್ನಪಟ್ಟಣ ನಗರಗಳ ಅಭಿವೃದ್ದಿಗೆ ಬಳಸಲಾಗಿದೆ ಎಂದು ವಿವರಿಸಿದರು.

ಗುತ್ತಿಗೆದಾರರು ಸೃಷ್ಟಿಸಿರುವ ಸಮಸ್ಯೆಗಳಿಂದಾಗಿ ಕೆಲವು ಕಾಮಗಾರಿಗಳು ಪೂರ್ಣವಾಗದೇ ಹಾಗೇ ಉಳಿದಿವೆ ಎಂದು ಹೇಳಿದ ಅವರು, ವಿವರ ನೀಡಲು ನಿರಾಕರಿಸಿದರು. ಒಂದೊಮ್ಮೆ ನಿಗದಿತ ಅವಧಿಯಾಳಗೆ ಕಾಮಗಾರಿಗಳು ಪೂರ್ಣಗೊಳ್ಳದಿದ್ದರೆ, ಎಡಿಬಿ ನೆರವಿನ ಬಳಕೆಗೆ ಸರಕಾರ ಕಾಲಾವಕಾಶ ಕೋರಬೇಕಾಗುತ್ತದೆ ಎಂದರು.

ಕೆಲಸ ಪೂರ್ಣಗೊಳಿಸದ ಗುತ್ತಿಗೆದಾರರನ್ನು ಬದಲಾಯಿಸಲೂ ರಾಜ್ಯ ಸರಕಾರ ಹಿಂಜರಿಯುವುದಿಲ್ಲ ಎಂದು ಅವರು ಎಚ್ಚರಿಕೆ ನೀಡಿದರು. ಕರಾವಳಿ ಜಿಲ್ಲೆಗಳ 10 ಪಟ್ಟಣಗಳ ಅಭಿವೃದ್ಧಿಗೆ ಸಂಬಂಧಿಸಿದಂತೆ 1056 ಕೋಟಿ ರುಪಾಯಿಗಳ ಹೊಸ ಯೋಜನೆಯಾಂದು ಜಾರಿಯ ಹಂತದಲ್ಲಿದೆ ಎಂದೂ ಚಂದ್ರೇಗೌಡ ಹೇಳಿದರು.

(ಪಿ.ಟಿ.ಐ)