ಕೋಲಾರ: ಇಟ್ಟಿಗೆ ಗೂಡಿನ ಬೃಹತ್‌ ಚಿಮಣಿ ಕುಸಿದು ಐವರ ಸಾವು

ಕೋಲಾರ : ಭೀಕರ ಬರದಿಂದ ತತ್ತರಿಸಿದ್ದ ಕೋಲಾರ ಜಿಲ್ಲೆಯಲ್ಲಿ ಕಳೆದ ಕೆಲವು ದಿನಗಳಿಂದ ಭಾರಿ ಮಳೆ ಸುರಿಯುತ್ತಿದೆ. ಬುಧವಾರ ಸುರಿದ ಭಾರಿ ಮಳೆಗೆ ಇಲ್ಲಿನ ಇಟ್ಟಿಗೆ ಕಾರ್ಖಾನೆಯ 40 ಅಡಿ ಎತ್ತರದ ಚಿಮಣಿ ಕುಸಿದು ಐವರು ಸಾವನ್ನಪ್ಪಿದ್ದಾರೆ.

ಬುಧವಾರದ ಮಳೆಗೆ ಕೋಲಾರದ ಹೊರವಲಯದಲ್ಲಿರುವ ಸಂಗಂಡಹಳ್ಳಿ ಬಳಿಯ ಎಬಿಟಿ ಇಟ್ಟಿಗೆ ಕಾರ್ಖಾನೆಯ ಬೃಹತ್‌ ಚಿಮಣಿ ಕುಸಿದು ಮನೆಯ ಮೇಲೆ ಉರುಳಿತು. ಈ ಅಪಘಾತದಲ್ಲಿ ಮನೆಯಲ್ಲಿ ಮಲಗಿದ್ದ ಐವರು ಸಾವನ್ನಪ್ಪಿದರು ಎಂದು ಪೊಲೀಸರು ತಿಳಿಸಿದ್ದಾರೆ.

ಸತ್ತವರನ್ನು ಮುತ್ತಮ್ಮ (51), ವೆಂಕಟಲಕ್ಷ್ಮಮ್ಮ (30), ಯಲ್ಲಮ್ಮ (40) ಮುತ್ತಮ್ಮ, ಎರಡು ತಿಂಗಳ ಹೆಣ್ಣು ಮಗು ಹಾಗೂ 6 ವರ್ಷದ ಲೋಕೇಶ ಎಂದು ಗುರುತಿಸಲಾಗಿದೆ. ಈ ಎಲ್ಲರೂ ಇಟ್ಟಿಗೆ ಕಾರ್ಖಾನೆಯ ಕೂಲಿ ಕಾರ್ಮಿಕರ ಕುಟುಂಬಕ್ಕೆ ಸೇರಿದವರಾಗಿದ್ದಾರೆ.

ವಿಷಯ ತಿಳಿದ ಜಿಲ್ಲಾಧಿಕಾರಿ ಕೇಶವಾಚಾರಿ ಅವರು, ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದರು. ಮಳೆ ಅನಾಹುತದಿಂದ ಅಸುನೀಗಿದ ಕುಟುಂಬದ ಪ್ರಮುಖ ಸದಸ್ಯರಿಗೆ ತಲಾ 1 ಲಕ್ಷ ರುಪಾಯಿ ಪರಿಹಾರ ನೀಡುವುದಾಗಿಯೂ ಅವರು ಘೋಷಿಸಿದ್ದಾರೆ.

(ಇನ್‌ಫೋ ವಾರ್ತೆ)