ಮಾಯಾರಾವ್‌ಗೆ ಗಾಯನ ಸಮಾಜ ಸಂಗೀತ ಸಮ್ಮೇಳನಾಧ್ಯಕ್ಷೆ ಗೌರವ

ಬೆಂಗಳೂರು : ಸೆಪ್ಟಂಬರ್‌ 30 ರಿಂದ ಅಕ್ಟೋಬರ್‌ 7 ರವರೆಗೆ ಬೆಂಗಳೂರು ಗಾಯನ ಸಮಾಜ ತನ್ನ 97 ನೇ ಕಲಾ ಸೇವೆಯ ಅಂಗವಾಗಿ 33 ನೇ ಸಂಗೀತ ಸಮ್ಮೇಳನವನ್ನು ಹಮ್ಮಿಕೊಂಡಿದೆ.

ಹಿರಿಯ ನೃತ್ಯ ಕಲಾವಿದೆ ಮಾಯಾರಾವ್‌ ಅವರ ಅಧ್ಯಕ್ಷತೆಯಲ್ಲಿ ಸಮ್ಮೇಳನ ನಡೆಯಲಿದೆ ಎಂದು ಸಮಾಜದ ಅಧ್ಯಕ್ಷ ಎಚ್‌.ಕಮಲ್‌ನಾಥ್‌ ಬುಧವಾರ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದರು. ಸಮ್ಮೇಳನದ ಕೊನೆಯ ದಿನ ಸಮ್ಮೇಳನಾಧ್ಯಕ್ಷೆ ಮಾಯಾರಾವ್‌ ಅವರಿಗೆ ನಾಟ್ಯ ಕಲಾರತ್ನ ಪ್ರಶಸ್ತಿ ನೀಡಲಾಗುವುದು ಹಾಗೂ ವಿವಿಧ ಕಲಾ ಪ್ರಕಾರಗಳಲ್ಲಿ ಸೇವೆ ಸಲ್ಲಿಸಿದ ಗಣ್ಯರನ್ನು ಗೌರವಿಸಲಾಗುವುದು.

ಆಕ್ಟೋಬರ್‌ 1 ರಿಂದ 6 ರವರೆಗೆ ನಾಟ್ಯ ಸಂಪ್ರದಾಯದಲ್ಲಿ ಸಂಗೀತ ಮತ್ತು ನೃತ್ಯ ಎಂಬ ವಿಷಯದ ಕುರಿತು ಚರ್ಚೆ ನಡೆಯಲಿದೆ. ಯಕ್ಷಗಾನ, ನಾಟ್ಯಶಾಸ್ತ್ರ, ಕಥಕಳಿ, ಕರಿಬಂಟನ ಕಾಳಗ, ಕುಚಿಪುಡಿ ಮತ್ತಿತರ ವಿಷಯಗಳ ಬಗೆಗೆ ವಿವಿಧ ವಿದ್ವಾಂಸರಿಂದ ಭಾಷಣ ಕಾರ್ಯಕ್ರಮವಿದೆ ಎಂದು ಕಮಲ್‌ನಾಥ್‌ ಹೇಳಿದರು.

(ಇನ್ಫೋ ವಾರ್ತೆ)