ಸೇಲಂ- ಬೆಂಗಳೂರು ರೈಲಿಗೆ ಸಿಕ್ಕಿ ಮೂವರು ಹೆಂಗಸರ ಸಾವು

ಬೆಂಗಳೂರು : ಹೊಸದಾಗಿ ಮದುವೆಯಾಗಿದ್ದ ಒಬ್ಬ ಹೆಂಗಸೂ ಸೇರಿದಂತೆ ಮೂವರು ಮಹಿಳೆಯರು ಚಲಿಸುತ್ತಿದ್ದ ರೈಲಿಗೆ ಸಿಕ್ಕಿ ಸತ್ತಿದ್ದು, ಇತರ ನಾಲ್ವರು ತೀವ್ರವಾಗಿ ಗಾಯಗೊಂಡಿರುವ ಘಟನೆ ನಗರ ಹೊರವಲಯದಲ್ಲಿ ಬುಧವಾರ ರಾತ್ರಿ ನಡೆದಿದೆ.

ಎಚ್‌ಎಎಲ್‌ ಸಮೀಪದ ದೊಡ್ಡಾನೆಕುಂದಿಯ ಭಾರತಿ (30), ದೇವೀರಮ್ಮ (25) ಹಾಗೂ ರತ್ನ (18) ಎಂಬುವರೇ ಮೃತಪಟ್ಟ ನತದೃಷ್ಟರು. ಇವರೆಲ್ಲಾ ಎಚ್‌ಎಲ್‌ ಸಮೀಪದ ಗಾರ್ಮೆಂಟ್ಸ್‌ ಕಾರ್ಖಾನೆಯ ಕಾರ್ಮಿಕರು. ಕೆಲಸ ಮುಗಿಸಿ ಮನೆಗೆ ಮರಳುತ್ತಿದ್ದಾಗ ರೈಲ್ವೆ ಸೇತುವೆ ಬಳಿ ಈ ದುರಂತ ಸಂಭವಿಸಿದೆ.

ಸೇಲಂನಿಂದ ಬೆಂಗಳೂರಿಗೆ ತಲುಪುತ್ತಿದ್ದ ರೈಲಿಗೆ ಸುಮಾರು 7.30ರ ವೇಳೆಗೆ ಸಿಕ್ಕಿರುವ ಮೂವರ ಪೈಕಿ ಇಬ್ಬರ ದೇಹಗಳು ಛಿದ್ರಛಿದ್ರವಾಗಿವೆ. ರತ್ನ ಎಂಬುವರ ಎರಡೂ ಕಾಲುಗಳು ಮುರಿದಿದ್ದು, ರಕ್ತಸ್ರಾವದಿಂದ ಮೃತ ಪಟ್ಟಿದ್ದಾರೆ. ಇವರ ಜೊತೆಯಲ್ಲಿಯೇ ಮನೆಗೆ ತೆರಳುತ್ತಿದ್ದ ಇತರೆ ನಾಲ್ವರು ಹೆಂಗಸರು ರೈಲನ್ನು ನೋಡಿ ಭಯದಿಂದ ಸೇತುವೆಯಿಂದ ರಿಂಗ್‌ ರಸ್ತೆಗೆ ಜಿಗಿದ ಕಾರಣ ಗಾಯಗಳಾಗಿವೆ ಎಂದು ಪೊಲೀಸರು ತಿಳಿಸಿದ್ದಾರೆ.

(ಇನ್ಫೋ ವಾರ್ತೆ)