ಮನೆ ಕಟ್ಟಿಕೊಡಲಾಗುತ್ತದೆ, ರಿಟೈರಾದವರಿಗೆ ಮಾತ್ರ-ಎಲ್‌ಐಸಿ ಮನೆ ಘಟಕ

ಬೆಂಗಳೂರು : ಮನೆಯಿಂದ ದೂರ, ಇನ್ನೊಂದು ಮನೆ ಇವತ್ತಿನ ಹೆಚ್ಚುತ್ತಿರುವ ಬೇಡಿಕೆಗಳಲ್ಲೊಂದು. ಮನೆಯಾಳಗೆ ಮನೆಯಾಡೆಯನಿದ್ದರೂ ಇಲ್ಲ. ಮುಪ್ಪಡರಿತಲ್ಲ. ಈ ಮನೆ ಸುಮ್ಮನೆ. ಅಲ್ಲೊಂದಿದೆ ನಿಮ್ಮನೆ. ನಗರೀಕರಣ ತಂದ ನಾಜೂಕುತನದಲ್ಲಿ ಹೆತ್ತವರ ಹೊರೆಯೂ ಭಾರ. ಕಳ್ಳ ತಲೆ ಒಡೆವ. ಕರೆಂಟು ಬಿಲ್‌ ಕಟ್ಟಲು ಕ್ಯೂನಿಂತರೆ ಕುಸಿದು ಬೀಳುವ. ವೃದ್ಧಾಶ್ರಮ ಸೇರಿಸಲು ಇವೆಲ್ಲಾ ನೆವ. ಇಂಥಾ ಕರಳುಬಳ್ಳಿ ಕಳಚುವಿಕೆಗೂ ಒಂದರ್ಥ ಕೊಡಲು ಎಲ್‌ಐಸಿ ಹೌಸಿಂಗ್‌ ಫೈನಾನ್ಸ್‌ ಲಿಮಿಟೆಡ್‌ ನಿರ್ಧರಿಸಿದೆ.

ಸಹಕಾರಿ ಜೀವನ ಸಾಮೂಹಿಕ ಕೇಂದ್ರಗಳನ್ನು ಕಟ್ಟಲು ಹುಟ್ಟಿದೆ ಎಲ್‌ಐಸಿ ಹೌಸಿಂಗ್‌ ಫೈನಾನ್ಸ್‌ ಲಿಮಿಟೆಡ್‌ನ ಉಪಘಟಕ ಎಲ್‌ಐಸಿ ಹೌಸಿಂಗ್‌ ಫೈನಾನ್ಸ್‌ ಲಿಮಿಟೆಡ್‌ ಹೋಂ ಕೇರ್‌. ಹಿರಿಯ ನಾಗರಿಕರಿಗಾಗಿ ನಗರದ ಹೊರ ವಲಯಗಳಲ್ಲಿ ಸಮುಚ್ಚಯಗಳನ್ನು ಕಟ್ಟಿಕೊಡುವುದು ಈ ಉಪಘಟಕದ ಉಮೇದಿ ಎಂದು ಎಲ್‌ಐಸಿ ಹೌಸಿಂಗ್‌ ಫೈನಾನ್ಸ್‌ ಲಿಮಿಟೆಡ್‌ನ ನಿರ್ದೇಶಕ ಕ್ರಾಂತಿ ಸಿನ್ಹ ಮಂಗಳವಾರ ಸುದ್ದಿಗಾರರಿಗೆ ಹೇಳಿದರು.

ಈ ನಿವೃತ್ತರ ಮನೆಗಳನ್ನು ಕಟ್ಟಿಸಿಕೊಳ್ಳುವ ಭಾಗ್ಯ ಈ ವರ್ಷ ಸಂದಿರುವುದು ಪುಣೆ ಮತ್ತು ನೋಯಿಡಾಗೆ. 50ರಿಂದ 60 ಮನೆಗಳ ಕಟ್ಟಲು 10 ಕೋಟಿ ರುಪಾಯಿ ಸುರಿಯುತ್ತದಂತೆ ಸಂಸ್ಥೆ. ಮುಂಬಯಿಯಲ್ಲೂ ಈ ಯೋಜನೆ ಜಾರಿಗೆ ತರಲು ಜಾಗೆಯ ತಲಾಷು ನಡೆದಿದೆ. ಸಿಲಿಕಾನ್‌ ಸಿಟಿ ಬೆಂಗಳೂರಿಗೂ ಈ ಯೋಜನೆ ತೀರಾ ದೂರವೇನಿಲ್ಲ.

ವಿದೇಶೀ ಸಂಸ್ಕೃತಿಯನ್ನು ಅನಾಮತ್ತು ಎತ್ತಿಕೊಂಡು ಬಂದಿರುವ ಕಂಪನಿಯ ಈ ಸೌಕರ್ಯ ಪಡೆಯಲು ಬೇಕಾದ ಅರ್ಹತೆಗಳು...

• ವಯಸ್ಸು 60 ದಾಟಿರಬೇಕು
• ಥೈಲಿಯಲ್ಲೋ ತಿಜೋರಿಯಲ್ಲೋ ಸಾಕಷ್ಟು ಹಣ ಇರಬೇಕು

(ಪಿಟಿಐ)