ಅಮೆರಿಕಾ ದಾಳಿಗೆ ಲ್ಯಾಡೆನ್‌ ನೇತೃತ್ವದಲ್ಲಿ ತಾಲಿಬಾನ್‌ ಪ್ರತ್ಯುತ್ತರ ?

ಮಾಸ್ಕೋ : ಅಮೆರಿಕದ ವಿಶ್ವ ವ್ಯಾಪಾರ ಕೇಂದ್ರದ ಅವಳಿ ಕಟ್ಟಡಗಳ ಮೇಲಿನ ದಾಳಿಯ ಸೂತ್ರಧಾರ ಎನ್ನಲಾದ ಬಿನ್‌ ಲ್ಯಾಡೆನ್‌ ಅಮೆರಿಕಾ ವಿರುದ್ಧದ ಯುದ್ಧದಲ್ಲಿ ತಾಲಿಬಾನ್‌ ಪಡೆಗಳನ್ನು ಮುನ್ನಡೆಸುವ ಸಾಧ್ಯತೆಯಿದೆ.

ಪಾಕ್‌ ಗಡಿಗೆ ಹೊಂದಿಕೊಂಡಿರುವ ಆಫ್ಘನ್‌ನ ಜಲಹಾಬಾದ್‌ನ ಅಡಗುತಾಣಗಳಲ್ಲಿ ಲ್ಯಾಡೆನ್‌ ಅಡಗಿಕೊಂಡಿದ್ದು , ಆಪ್ಘಾನಿಸ್ತಾನದ ಮೇಲೆ ಅಮೆರಿಕಾ ದಾಳಿ ಮಾಡಿದಲ್ಲಿ , ಸ್ವತಃ ಲ್ಯಾಡೆನ್‌ ತಾಲಿಬಾನ್‌ ಪಡೆಗಳನ್ನು ನಿರ್ದೇಶಿಸುವನೆಂದು ಇಂಟೆಲಿಜೆನ್ಸ್‌ ಮೂಲಗಳನ್ನುಲ್ಲೇಖಿಸಿ ರಷ್ಯಾದ ಇತಾರ್‌-ಟಸ್ಸ್‌ ವರದಿ ಮಾಡಿದೆ.

ಈ ನಡುವೆ, ಲ್ಯಾಡೆನ್‌ ಇದುವರೆಗೂ ಎಲ್ಲಿ ಅಡಗಿಕೊಂಡಿದ್ದಾನೆ ಎನ್ನು ವ ಬಗ್ಗೆ ಮಾಹಿತಿ ಸಿಕ್ಕಿಲ್ಲ . ದೇಶ ಬಿಟ್ಟುಹೋಗುವಂತೆ ತಿಳಿಸುವ ಉಲೇಮಾಗಳ ಆದೇಶವನ್ನು ತಲುಪಿಸಲು ಲ್ಯಾಡೆನ್‌ಗಾಗಿ ಹುಡುಕಲಾಗುತ್ತಿದೆ ಎಂದು ತಾಲಿಬಾನ್‌ ಆಡಳಿತ ಸೋಮವಾರ ತಿಳಿಸಿದೆ.

(ಏಜೆನ್ಸೀಸ್‌)