ಪಾಕಿಸ್ತಾನಿ ಸೋದರರೇ, ಇಸ್ಲಾಂ ರಕ್ಷಿಸಲು ಮುಂದಾಗಿ- ಲ್ಯಾಡೆನ್‌

ಇಸ್ಲಮಾಬಾದ್‌ : ಅಮೆರಿಕಾ ಬೂತುಗಾಜಿನಿಂದ ತಪ್ಪಿಸಿಕೊಳ್ಳುತ್ತಿರುವ ಅಂತರರಾಷ್ಟ್ರೀಯ ಭಯೋತ್ಪಾದಕ ಒಸಾಮ ಬಿನ್‌ ಲ್ಯಾಡೆನ್‌ ಇಸ್ಲಾಂ ಧರ್ಮವನ್ನು ರಕ್ಷಿಸಲು ಮುಂದಾಗುವಂತೆ ಪಾಕಿಸ್ತಾನೀಯರಿಗೆ ಕರೆ ನೀಡಿದ್ದಾನೆ. ಅರಬ್‌ ಟೀವಿ ಚಾನಲ್‌ಗೆ ಕಳುಹಿಸಿರುವ ಫ್ಯಾಕ್ಸ್‌ ಸಂದೇಶದಲ್ಲಿ ಒಸಾಮ ಈ ಕರೆ ನೀಡಿದ್ದಾನೆ.

1996 ರಲ್ಲಿ ಆಪ್ಘಾನಿಸ್ತಾನದಲ್ಲಿ ಆಶ್ರಯ ಪಡೆದ ನಂತರ ಬಾಹ್ಯ ಪ್ರಪಂಚಕ್ಕೆ ಸಂದೇಶ ನೀಡಲು ಬಳಸಿಕೊಳ್ಳುವ ಖತಾರ್ಸ್‌ನ ಉಪಗ್ರಹ ವಾಹಿನಿಗೆ ಲ್ಯಾಡೆನ್‌ ಈ ಸಂದೇಶ ಕಳುಹಿಸಿದ್ದಾನೆ. ಸೋದರರೇ, ಆಫ್ಘನ್‌ ಜನತೆಯಾಂದಿಗೆ ನಾವು ಜೆಹಾದ್‌ನ ಹಾದಿಯಲ್ಲಿ ವೇಗವಾಗಿ ನಡೆಯುತ್ತಿದ್ದೇವೆ ಎಂದು ಸಹಿ ಹಾಗೂ ಭಾನುವಾರದ ದಿನಾಂಕವನ್ನುಳ್ಳ ಪತ್ರದಲ್ಲಿ ಲ್ಯಾಡೆನ್‌ ತಿಳಿಸಿದ್ದಾನೆ.

ಅಮೆರಿಕ ಪಡೆಗಳನ್ನು ಪಾಕಿಸ್ತಾನ ಹಾಗೂ ಆಪ್ಘಾನಿಸ್ತಾನದಿಂದ ಹೊಡೆದೋಡಿಸುವಂತೆ ಪಾಕ್‌ ಮುಸ್ಲಿಂರಿಗೆ ಲ್ಯಾಡೆನ್‌ ಕರೆ ನೀಡಿದ್ದಾನೆ. ಈ ನಡುವೆ ಆಪ್ಘಾನಿಸ್ತಾನದ ಮೇಲೆ ದಾಳಿ ಮಾಡಿದಲ್ಲಿ ಅಮೆರಿಕಾ ಉಂಟು ಮಾಡುವ ಬೆಂಕಿ ಅದನ್ನೇ ಬಲಿತೆಗೆದುಕೊಳ್ಳುತ್ತದೆ ಎಂದು ತಾಲಿಬಾನ್‌ ಎಚ್ಚರಿಸಿದೆ.

(ಏಜೆನ್ಸೀಸ್‌)