ಗೆರಿಲ್ಲಾ ತಂತ್ರಕ್ಕೆ ಜಿಬಿಯು- 28 ಬಾಂಬ್‌ಗಳು ಉತ್ತರವಾದಾವೆ?

ನ್ಯೂಯಾರ್ಕ್‌ : ಆಪ್ಘಾನಿಸ್ತಾನದ ಗಿರಿ ಕಂದರಗಳಲ್ಲಿ ಅಡಗಿರುವ ಒಸಾಮ ಬಿನ್‌ ಲ್ಯಾಡೆನ್‌ನನ್ನು ಶಿಕ್ಷಿಸಲು ಹಾಗೂ ಗೆರಿಲ್ಲಾ ಯುದ್ಧದಲ್ಲಿ ಕುಖ್ಯಾತಿ ಗಳಿಸಿರುವ ಆಪ್ಘನ್‌ ಭಯೋತ್ಪಾದಕರ ಹುಟ್ಟಗಿಸಲು ಹೊಸ ಜಮಾನದ ಗುಹೆ ಸ್ಫೋಟಕಗಳನ್ನು ಬಳಸಲು ಅಮೆರಿಕ ಉದ್ದೇಶಿಸಿದೆ.

ಜೀವಂತವಾಗಿ ಅಥವಾ ಹೆಣವಾಗಿ ಬಿನ್‌ ಲ್ಯಾಡೆನ್‌ನ ವಶಕ್ಕೆ ಪಡೆದುಕೊಳ್ಳಲು ಪಣ ತೊಟ್ಟಿರುವ ಅಮೆರಿಕ ಮಿಲಿಟರಿ, ಯುದ್ಧದಲ್ಲಿ ಜಿಬಿಯು- 28 ಅಸ್ತ್ರ ಸೇರಿದಂತೆ, ಎಲ್ಲ ರೀತಿಯ ಆಧುನಿಕ ಯುದ್ಧದ ತಾಂತ್ರಿಕ ಮಜಲುಗಳನ್ನು ವೈರಿ ನಿಗ್ರಹಕ್ಕೆ ಬಳಸಲಿದೆ ಎಂದು ಇಂಟೆಲಿಜೆನ್ಸ್‌ ಮಾಹಿತಿಯನ್ನಾಧರಿಸಿ ‘ನ್ಯೂಯಾರ್ಕ್‌ ಪೋಸ್ಟ್‌’ ಪತ್ರಿಕೆ ವರದಿ ಮಾಡಿದೆ.

ಲ್ಯಾಡೆನ್‌ನ ಬೆಂಗಾವಲಿನ ಹೊಣೆ ಹೊತ್ತಿರುವ ಸುಮಾರು 3 ರಿಂದ 4 ಸಾವಿರ ಫೈಟರ್‌ಗಳು ಉತ್ತರ ಆಪ್ಘಾನಿಸ್ತಾನದ ಗಿರಿ ಕಂದರಗಳಲ್ಲಿ ಅಡಗಿದ್ದಾರೆ ಎನ್ನಲಾಗಿದೆ. ಅಡಗುತಾಣಗಳಲ್ಲಿ ಅಡಗಿರುವ ಈ ಉಗ್ರರನ್ನು ಹೊರಗೆಡಹುವ ‘ಅರ್ಥ್‌ ಪೆನೆಟ್ರೇಟರ್‌’ ಎನ್ನುವ ಬಾಂಬ್‌ಗಳನ್ನು ಪೆಂಟಗನ್‌ ಅಭಿವೃದ್ಧಿಪಡಿಸಿದೆ ಎಂದು ವರದಿ ತಿಳಿಸಿದೆ.

2000 ಪೌಂಡ್‌ ತೂಕವನ್ನು ಹೊಂದಿರುವ ಜಿಬಿಯು-28 , ಪರ್ಷಿಯನ್‌ ಗಲ್ಫ್‌ ಯುದ್ಧದಲ್ಲಿ ಬಳಸಿದ ಬಂಕರ್‌ ಬಸ್ಟರ್ಸ್‌ನ ಸುಧಾರಿತ ರೂಪವಾಗಿದೆ. ಬಿ-2 ಸ್ಟೀಲ್ತ್‌ ಬಾಂಬರ್ಸ್‌ ನಿಂದ ಪ್ರಯೋಗಿಸುವ ಬಿಜಿಯು-20 ಬಾಂಬ್‌ಗಳು ಲೇಸರ್‌ ಟೆಕ್ನಾಲಜಿಯ ಮೂಲಕ ನಿರ್ದೇಶಿತ ಗಮ್ಯವನ್ನು ತಲುಪುತ್ತವೆ. ಈ ಬಾಂಬ್‌ಗಳಿಗೆ ಆಫ್ಘನ್‌ ಉಗ್ರರು ಬಗ್ಗುತ್ತಾರಾ ಅನ್ನುವುದನ್ನು ಕಾದು ನೋಡಬೇಕು!!

(ಪಿಟಿಐ)