ಭಲೇ ಅದೃಷ್ಟವೋ ಅದೃಷ್ಟ !ನೆಹ್ರಾ ಜಾಗೆಗೆ ಅಜಿತ್‌ ಅಗರ್ಕರ್‌

ಮುಂಬಯಿ : ದೈಹಿಕ ಸಾಮರ್ಥ್ಯವನ್ನು ಸಿದ್ಧಪಡಿಸುವಲ್ಲಿ ವಿಫಲರಾದ ವೇಗಿ ಆಶಿಷ್‌ ನೆಹ್ರ ಬದಲಿಗೆ ಆಲ್‌ರೌಂಡರ್‌ ಅಜಿತ್‌ ಅಗರ್ಕರ್‌ ಅಕ್ಟೋಬರ್‌ 1 ರಿಂದ 27 ರವರೆಗೆ ದಕ್ಷಿಣ ಆಫ್ರಿಕಾದಲ್ಲಿ ನಡೆಯುವ ತ್ರಿಕೋಣ ಸರಣಿಗೆ ಆಯ್ಕೆಯಾಗಿದ್ದಾರೆ.

ಭಾರತ ಕ್ರಿಕೆಟ್‌ ಆಯ್ಕೆ ಮಂಡಳಿ ಅಧ್ಯಕ್ಷ ಚಂದುಬೋರ್ಡೆ ಭಾನುವಾರ ಸುದ್ದಿಗಾರರಿಗೆ ಈ ವಿಷಯ ತಿಳಿಸಿದರು. ವಾಂಖೆಡೆ ಕ್ರೀಡಾಂಗಣದಲ್ಲಿ ಅಗರ್ಕರ್‌, ಮೊಹಂತಿ ಹಾಗೂ ರಾಕೇಶ್‌ ಪಟೇಲ್‌ ಅವರನ್ನು ದೈಹಿಕ ಸಾಮರ್ಥ್ಯ ಪರೀಕ್ಷೆಗಾಗಿ ಭಾನುವಾರ ಹಾಜರಿರುವಂತೆ ಈ ಮುನ್ನ ತಿಳಿಸಲಾಗಿತ್ತು . ಈ ಮೂವರಲ್ಲಿ ಅರ್ಗರ್‌ ಅವರು ದಕ್ಷಿಣ ಆಫ್ರಿಕಾ ಪ್ರವಾಸಕ್ಕೆ ಸೂಕ್ತವೆಂದು ಆಯ್ಕೆ ಮಂಡಳಿ ತೀರ್ಮಾನಿಸಿರುವುದಾಗಿ ಬೋರ್ಡೆ ತಿಳಿಸಿದರು.

ಸುದ್ದಿಗೋಷ್ಠಿಯಲ್ಲಿ ಹಾಜರಿದ್ದ ನಾಯಕ ಸೌರವ್‌ ಗಂಗೂಲಿ, ಏಕದಿನ ಪಂದ್ಯಗಳಲ್ಲಿ ಅಗರ್ಕರ್‌ ತಂಡಕ್ಕೆ ಆಲ್‌ರೌಂಡರ್‌ ರೂಪದಲ್ಲಿ ಉಪಯುಕ್ತರಾಗಬಲ್ಲರೆಂದು ಅಭಿಪ್ರಾಯಪಟ್ಟರು. ಟೆಸ್ಟ್‌ ಪಂದ್ಯಗಳ ವೇಳೆಗೆ ನೆಹ್ರ ಹಾಗೂ ಜಹೀರ್‌ ಖಾನ್‌ ಗುಣಮುಖರಾಗುವ ಬಗೆಗೆ ಗಂಗೂಲಿ ಆಶಾಭಾವನೆ ವ್ಯಕ್ತಪಡಿಸಿದರು.

(ಪಿಟಿಐ)