ಮುಖ್ಯಮಂತ್ರಿಯಾಗಿ ಜಯಾ ನೇಮಕ ರದ್ದು-ಸುಪ್ರೀಂ ಕೋರ್ಟ್‌ ತೀರ್ಪು

ನವದೆಹಲಿ : ತಮಿಳುನಾಡು ಮುಖ್ಯಮಂತ್ರಿಯಾಗಿ ಎ.ಐ.ಎ.ಡಿ.ಎಂ.ಕೆ. ನಾಯಕಿ ಜಯಲಲಿತಾ ಅವರ ನೇಮಕವನ್ನು ಸುರ್ಪಿಂಕೋರ್ಟ್‌ ರದ್ದು ಮಾಡಿದೆ. ಮೇ 14,2001ರಂದು ಅಧಿಕಾರವಹಿಸಿಕೊಂಡ ಜಯಲಲಿತಾ ಅವರ ನೇಮಕವು ಸಂವಿಧಾನ ಬಾಹಿರವಾಗಿದೆ ಎಂದು ನ್ಯಾಯಪೀಠ ಅಭಿಪ್ರಾಯಪಟ್ಟಿದೆ.

ಈ ನೇಮಕ ನ್ಯಾಯಸಮ್ಮತವಲ್ಲದ ಕಾರಣ ಮತ್ತು ಸಂವಿಧಾನದ ಪರಿಧಿಯಾಳಗೆ ಬಾರದ ಕಾರಣ ಈ ನೇಮಕವನ್ನು ನಾವು ರದ್ದುಪಡಿಸುತ್ತೇವೆ ಎಂದು ನ್ಯಾಯಪೀಠ ಹೇಳಿದೆ. ಐವರು ಸದಸ್ಯರ ನ್ಯಾಯಪೀಠ ಬಹುಮತದಿಂದ ಈ ತೀರ್ಮಾನ ಕೈಗೊಂಡಿದೆ. ಈ ನೇಮಕವನ್ನು ಸರ್ವೋನ್ನತ ನ್ಯಾಯಾಲಯ ಅಸಿಂಧು ಎಂದು ಘೋಷಿಸಿದೆ.

ನ್ಯಾಯಮೂರ್ತಿಗಳಾದ ಭರೂಚ, ನ್ಯಾಯಮೂರ್ತಿ ವೈ.ಕೆ. ಸಬರ್‌ವಾಲ್‌ ಮತ್ತು ನ್ಯಾಯಮೂರ್ತಿ ರುಮಾಪಾಲ್‌ ಅವರ ಬಹುಮತದ ಈ ಅಭಿಪ್ರಾಯಕ್ಕೆ ಉಳಿದಿಬ್ಬರು ನ್ಯಾಯಾಯಮೂರ್ತಿಗಳಾದ ನ್ಯಾಯಾಧೀಶ ಜಿ.ಬಿ. ಪಟ್ಟನಾಯಕ್‌ ಮತ್ತು ನ್ಯಾಯಾಧೀಸ ಬ್ರಿಜೇಶ್‌ ಕುಮಾರ್‌ ತಮ್ಮ ಅನುಮೋದನೆ ನೀಡಿದರು. ಈ ಮಹತ್ವದ ತೀರ್ಪು ಸರ್ವಸಮ್ಮತ ತೀರ್ಮಾನವಾಗಿ ಹೊರಬಿದ್ದಿದೆ.

ರಾಜ್ಯಪಾಲರ ಬಳಿಗೆ ಜಯಾ : ಸುಪ್ರೀಂಕೋರ್ಟ್‌ ಶುಕ್ರವಾರ ಬೆಳಗ್ಗೆ ನೀಡಿರುವ ಮಹತ್ವದ ತೀರ್ಪಿನ ಹಿನ್ನೆಲೆಯಲ್ಲಿ ಕುಮಾರಿ ಜಯಲಲಿತಾ ಅವರು, ಶುಕ್ರವಾರ ಮಧ್ಯಾಹ್ನ ರಾಜ್ಯಪಾಲರಾದ ರಂಗರಾಜನ್‌ ಅವರನ್ನು ಭೇಟಿ ಮಾಡಲಿದ್ದಾರೆ.

ಜಯಲಲಿತಾ ಅವರಿಗೆ ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡುವುದು ಈಗ ಅನಿವಾರ್ಯವಾಗಿದ್ದು, ಶನಿವಾರ ಎಐಡಿಎಂಕೆ ಶಾಸಕಾಂಗ ಪಕ್ಷದ ತುರ್ತು ಸಭೆ ಕರೆದಿದ್ದಾರೆ. ಶನಿವಾರದ ಸಭೆಯಲ್ಲಿ ಹೊಸ ನಾಯಕನ ಆಯ್ಕೆ ಮಾಡುವ ಸಂಭವ ಇದೆ.

(ಪಿ.ಟಿ.ಐ / ಇನ್‌ಫೋ ವಾರ್ತೆ)

ವಾರ್ತಾ ಸಂಚಯ
ಮುಖಪುಟ / ಇವತ್ತು... ಈ ಹೊತ್ತು...