ಶಿಕ್ಷಕರನ್ನು ಇತರೆ ಕೆಲಸಗಳಿಗೆ ಬಳಸುವುದು ಸಲ್ಲ -ಸರಕಾರಿಆದೇಶ

ಬೆಂಗಳೂರು : ಚುನಾವಣೆ ಸಂದರ್ಭ, ಜನಗಣತಿ ಮತ್ತು ಮಕ್ಕಳ ಗಣತಿಯ ಹೊರತಾಗಿ ಶಿಕ್ಷಕರನ್ನು ಬೇರೆ ಯಾವುದೇ ಕಾರ್ಯಕ್ರಮಕ್ಕೆ ಬಳಸಿಕೊಳ್ಳುವುದನ್ನು ರಾಜ್ಯ ಸರಕಾರ ನಿಷೇಧಿಸಿದೆ.

ರಾಜ್ಯ ಸಚಿವ ಸಂಪುಟ ಸಭೆಯಲ್ಲಿ ಮಂಗಳವಾರ ಈ ನಿರ್ಧಾರ ತೆಗೆದುಕೊಂಡಿರುವುದಾಗಿ ರಾಜ್ಯ ವಾರ್ತಾ ಸಚಿವ ಎಂ. ಶಿವಣ್ಣ ತಿಳಿಸಿದ್ದಾರೆ. ಶಾಲಾ ದಿನಗಳ ಕಡಿತ ಹಾಗೂ ಪಾಠ ಪ್ರವಚನಕ್ಕೆ ತೊಂದರೆಯಾಗದಂತೆ ನೋಡಿಕೊಳ್ಳುವ ನಿಟ್ಟಿನಲ್ಲಿ ಈ ಆದೇಶ ಹೊರಡಿಸಲಾಗಿದೆ.

ಶೈಕ್ಷಣಿಕ ವರ್ಷವೊಂದರಲ್ಲಿ 225 ಶಾಲಾ ಕಲಿಕಾ ದಿನಗಳು ಇರಬೇಕು. ಪ್ರಸ್ತುತ 190 ದಿನ ಮಾತ್ರ ಶಾಲೆಯಲ್ಲಿ ಪಾಠ ಪ್ರವಚನಗಳು ನಡೆಯುತ್ತಿವೆ. ಇದರಿಂದಾಗಿ ಶಿಕ್ಷಕರನ್ನು ಬೇರೆ ಕಾರ್ಯಕ್ರಮಗಳಿಗೆ ಬಳಸಿಕೊಳ್ಳುವುದನ್ನು ನಿಲ್ಲಿಸಲು ನಿರ್ಧರಿಸಲಾಗಿದೆ. ಇದರಿಂದ 20 ಕಲಿಕಾ ದಿನಗಳು ಜಾಸ್ತಿಯಾಗಲಿವೆ.

(ಇನ್ಫೋ ವಾರ್ತೆ)