ಅಮೆರಿಕ ಮೇಲಿನ ದಾಳಿ : ವಿಶ್ವಸಂಸ್ಥೆಯ ಮಹಾಧಿವೇಶನ ಮುಂದಕ್ಕೆ

ವಿಶ್ವಸಂಸ್ಥೆ : ಅಮೆರಿಕದ ಮೇಲೆ ನಡೆದಿರುವ ಉಗ್ರರ ದಾಳಿಯ ಹಿನ್ನೆಲೆಯಲ್ಲಿ ಈ ತಿಂಗಳ 24 ರಿಂದ ನಡೆಯಬೇಕಿದ್ದ ವಿಶ್ವಸಂಸ್ಥೆಯ ವಾರ್ಷಿಕ ಮಾಹಾಧಿವೇಶವನ್ನು ಮುಂದೂಡಲಾಗಿದೆ. ಈ ವಿಷಯವನ್ನು ಸಾಮಾನ್ಯ ಅಧಿವೇಶನದ ವಕ್ತಾರ ಜಾನ್‌ ಫಿಷರ್‌ ಪ್ರಕಟಿಸಿದ್ದಾರೆ.

ಸಭೆಯ ನಡೆಯುವ ಮುಂದಿನ ದಿನಾಂಕವನ್ನು ಅಮೆರಿಕದ ಸರಕಾರದೊಂದಿಗೆ ಸಮಾಲೋಚಿಸಿದ ಬಳಿಕ ಪ್ರಕಟಿಸಲಾಗುವುದು ಎಂದು ಅವರು ಹೇಳಿದ್ದಾರೆ. ವಿಶ್ವದ 12ಕ್ಕೂ ಹೆಚ್ಚು ನಾಯಕರು ಪಾಲ್ಗೊಳ್ಳಬೇಕಾಗಿದ್ದ ಈ ಅಧಿವೇಶವನ್ನು ಸೋಮವಾರ ಅಮೆರಿಕ ಅಧ್ಯಕ್ಷ ಜಾರ್ಜ್‌ ಡಬ್ಲ್ಯು ಬುಷ್‌ ಉದ್ಘಾಟಿಸುವ ಕಾರ್ಯಕ್ರಮ ಇತ್ತು.

ಸೋಮವಾರದಿಂದ ಅಕ್ಟೋಬರ್‌ 5ನೇ ತಾರೀಖಿನವರೆಗೆ ನಡೆಯಬೇಕಿದ್ದ ಈ ವಾರ್ಷಿಕ ಮಹಾಧಿವೇಶನವನ್ನು ಮುಂದೂಡುವಂತೆ ಅಮೆರಿಕ ಆಡಳಿತ ಕೋರಿರಲಿಲ್ಲವಾದರೂ, ರಾಜ ತಾಂತ್ರಿಕರು ಅಧಿವೇಶನ ನಡೆಸುವಲ್ಲಿ ಇರುವ ತೊಡಕುಗಳನ್ನು ವಿವರಿಸಿದ್ದರು.

ನ್ಯೂಯಾರ್ಕ್‌ ಮತ್ತು ವಾಷಿಂಗ್ಟನ್‌ಗಳ ಮೇಲೆ ನಡೆದ ಆತ್ಮಹತ್ಯಾದಳದ ವಿಮಾನ ದಾಳಿಯ ಹಿನ್ನೆಲೆಯಲ್ಲಿ ಅಮೆರಿಕದ ಎಲ್ಲ ಆಯಕಟ್ಟಿನ ಸ್ಥಳಗಳಲ್ಲೂ ಭದ್ರತಾ ಸಿಬ್ಬಂದಿಯನ್ನು ನಿಯೋಜಿಸಲಾಗಿದೆ.

(ಪಿ.ಟಿ.ಐ)

ಮುಖಪುಟ / ಭಯೋತ್ಪಾದನೆ