‘ಅಮೆರಿಕಾ ಮೇಲಿನ ದಾಳಿ ಯುದ್ಧದ ಅನಿವಾರ್ಯತೆ ಹುಟ್ಟುಹಾಕಿದೆ’

ಅಹ್ಮದಾಬಾದ್‌ : ಯುದ್ಧ ನಡದೇ ತೀರುತ್ತದೆ. ಉಗ್ರರ ದಾಳಿ ಕಿತ್ತುಕೊಂಡಿರುವುದು ಅಮೆರಿಕಾದ ಸಹಸ್ರಾರು ಅಮಾಯಕರ ಪ್ರಾಣಗಳನ್ನ. ಮಾನವೀಯತೆ ಮೇಲಿನ ಈ ದಾಳಿಯಿಂದ ಅಮೆರಿಕಾ ಕ್ರುದ್ಧವಾಗಿದೆ. ಯುದ್ಧವಲ್ಲದೆ ಬೇರೆ ದಾರಿಯೇ ಅದಕ್ಕಿಲ್ಲ.

ಸೋಮವಾರ ಇಳಿಸಂಜೆ ಕೇಂದ್ರ ಗೃಹ ಸಚಿವ ಎಲ್‌.ಕೆ.ಅಡ್ವಾಣಿ, ಸುದ್ದಿಗಾರರಿಂದ ಎರಗಿಬಂದ ಪ್ರಶ್ನೆಗಳಿಗೆ ಕೊಟ್ಟ ಉತ್ತರ ಇದು. ಸೆಪ್ಟೆಂಬರ್‌ 11ರ ನ್ಯೂಯಾರ್ಕ್‌ ಹಾಗೂ ಪೆಂಟಗಾನ್‌ ಮೇಲಿನ ದಾಳಿಗೆ ಅಮೆರಿಕಾ ದಿಟ್ಟ ಉತ್ತರ ಕೊಡಲು ನಿರ್ಧರಿಸಿದೆ. ಈ ಹಿನ್ನೆಲೆಯಲ್ಲಿ ಎಲ್ಲಾ ಪ್ರಜಾತಾಂತ್ರಿಕ ರಾಷ್ಟ್ರಗಳು ಕೈಜೋಡಿಸಿ, ಭಯೋತ್ಪಾದಕರನ್ನು ಬುಡಸಮೇತ ಉಡುಗಿಸುವ ಸಂಕಲ್ಪ ಮಾಡಬೇಕಿದೆ. ತಮ್ಮತನವನ್ನೇ ಕಳಕೊಂಡಿರುವ ಮತಾಂಧರ ಅಮಾಯಕರ ಮೇಲಿನ ಹಲ್ಲೆ ಅಸಹ್ಯ, ಅಕ್ಷಮ್ಯ ಎಂದರು.

ಬಿನ್‌ ಲ್ಯಾಡೆನ್‌ನನ್ನು ಅಮೆರಿಕಾಗೆ ಒಪ್ಪಿಸಲು ಶತಾಯಗತಾಯ ಯತ್ನಿಸುತ್ತಿರುವ ಪಾಕಿಸ್ತಾನ, ಇದಕ್ಕೆ ಪ್ರತಿಯಾಗಿ ಅಮೆರಿಕಾಕ್ಕೆ ಯಾವುದೇ ಕರಾರು ಒಡ್ಡಿಲ್ಲ. ಭಾರತದಲ್ಲಿನ ಅಮೆರಿಕಾ ರಾಯಭಾರಿ ತಮಗೆ ಈ ವಿಷಯವನ್ನು ಪದೇ ಪದೇ ಸ್ಪಷ್ಟಪಡಿಸಿರುವುದಾಗಿ ಪ್ರಶ್ನೆಯಾಂದಕ್ಕೆ ಉತ್ತರಿಸುತ್ತಿದ್ದ ಅಡ್ವಾಣಿ ಹೇಳಿದರು.

(ಪಿಟಿಐ)