ಜಗತ್ತಿಗೆ ಸೆಡ್ಡುಹೊಡೆದಿರುವ ತಾಲಿಬಾನ್‌ನಿಂದ ಜೆಹಾದ್‌ಗೆ ಫತ್ವಾ ?

ಇಸ್ಲಮಾಬಾದ್‌ : ಪಾಕಿಸ್ತಾನ ಹಾಗೂ ಆಪ್ಘಾನಿಸ್ತಾನದ ಗಡಿಯ ಎರಡೂ ಬದಿ ಶಸ್ತ್ರ ಸಜ್ಜಿತ ಪಡೆಗಳು ಕಟ್ಟೆಚ್ಚರದಲ್ಲಿ ನಿಂತಿರುವ ನಡುವೆ, ಬಿನ್‌ ಲ್ಯಾಡೆನ್‌ನನ್ನು ಅಮೆರಿಕದ ವಶಕ್ಕೆ ಒಪ್ಪಿಸುವಂತೆ ಒತ್ತಾಯಿಸಿರುವ ಪಾಕಿಸ್ತಾನದ ಆಗ್ರಹದ ಕುರಿತು ಚರ್ಚಿಸಲು ಇಸ್ಲಾಮಿಕ್‌ ಸ್ಕಾಲರ್‌ಗಳ ಸಭೆಯನ್ನು ಓಮರ್‌ ಸೋಮವಾರ ಕರೆದಿದ್ದಾರೆ. ಈ ಸಭೆಯಲ್ಲಿ ಪ್ರಸಕ್ತ ಬಿಕ್ಕಟ್ಟಿನ ಸಂದರ್ಭದಲ್ಲಿ ತಾಲಿಬಾನ್‌ ತಳೆಯಬೇಕಾದ ನಿಲುವನ್ನು ಕುರಿತು ನಿರ್ಣಯಿಸಲಾಗುವುದು.

ಈ ನಡುವೆ, ತಾಲಿಬಾನ್‌ ಆಡಳಿತ ಪಾಕಿಸ್ತಾನದ ಒತ್ತಾಯಕ್ಕೆ ಮಣಿಯುವ ಸಾಧ್ಯತೆಗಳು ತೀರಾ ಕಡಿಮೆ ಇವೆಯೆಂದು ಕಾಬೂಲ್‌ ಮೂಲಗಳು ತಿಳಿಸಿವೆ. ಓಮರ್‌ ಅವರು ಜೆಹಾದ್‌ನ್ನು ಜಾರಿಗೊಳಿಸುವ ಫತ್ವಾ ಹೊರಡಿಸುವ ನಿರೀಕ್ಷೆ ಯಿದೆ ಎಂದೂ ಈ ಮೂಲಗಳು ತಿಳಿಸಿವೆ. ಈಗಾಗಲೇ ತಾನು ಪ್ರತೀಕಾರಕ್ಕೆ ಸಿದ್ಧವಿರುವುದಾಗಿ ತಾಲಿಬಾನ್‌ ಆಡಳಿತ ಸ್ಪಷ್ಟಪಡಿಸಿರುವುದನ್ನು ಇಲ್ಲಿ ನೆನೆಯಬಹುದು.

ಇಸ್ಲಾಮಿಕ್‌ ಸ್ಕಾಲರ್‌ಗಳ ಸಭೆಯ ಬೆನ್ನಿನಲ್ಲೇ, ಲ್ಯಾಡೆನ್‌ನನ್ನು ಅಮೆರಿಕಾದ ವಶಕ್ಕೆ ಒಪ್ಪಿಸುವಂತೆ ತಾಲಿಬಾನ್‌ ಸರ್ಕಾರದ ಮನವೊಲಿಸುವ ಪ್ರಯತ್ನಗಳನ್ನು ಐಎಸ್‌ಐನ ಮುಖ್ಯಸ್ಥ ಜನರಲ್‌ ಮೆಹಮೂದ್‌ ಅಹಮದ್‌ ನೇತೃತ್ವದ 6 ಮಂದಿಯ ಪಾಕ್‌ ತಂಡ ನಡೆಸಲಿದೆ.

(ಪಿಟಿಐ)

ಮುಖಪುಟ / ಭಯೋತ್ಪಾದನೆ