ಪಾಕ್‌ನಲ್ಲಿನ ಪಾಶ್ಚಿಮಾತ್ಯ ರಾಜತಾಂತ್ರಿಕರು ಭಾರತಕ್ಕೆಬರಲು ತುದಿಗಾಲಲ್ಲಿ

ಇಸ್ಲಮಾಬಾದ್‌ : ಇಲ್ಲಿರುವ ಪಾಶ್ಚಿಮಾತ್ಯ ರಾಷ್ಟ್ರಗಳ ರಾಜತಾಂತ್ರಿಕರು, ಆಪ್ಘಾನಿಸ್ತಾನದ ಮೇಲೆ ಅಮೆರಿಕ ದಾಳಿ ನಡೆಸಿದಲ್ಲಿ ಉಂಟಾಗಬಹುದಾದ ಸಂಭವನೀಯ ತುರ್ತು ಪರಿಸ್ಥಿತಿ ನಿರೀಕ್ಷೆಯಲ್ಲಿ ಭಾರತದಲ್ಲಿ ಆಶ್ರಯ ಪಡೆಯಲು ಮುಂದಾಗಿದ್ದು , ವೀಸಾ ಪಡೆಯಲು ಭಾರತದ ರಾಯಭಾರ ಕಚೇರಿಯನ್ನು ಎಡತಾಕುತ್ತಿದ್ದಾರೆ.

ಅಮೆರಿಕ, ಬ್ರಿಟನ್‌ ಸೇರಿದಂತೆ ಬಹುತೇಕ ಪಶ್ಚಿಮ ರಾಷ್ಟ್ರಗಳು ಕೆಲವು ದಿನಗಳಿಂದ ಭಾರತದ ರಾಯಭಾರಿ ಕಚೇರಿಯನ್ನು ವೀಸಾ ಪಡೆಯಲು ಸಂಪರ್ಕಿಸಿವೆ. ಸ್ವೀಡನ್‌, ಬೆಲ್ಜಿಯಂ, ನಾರ್ವೆ ಮುಂತಾದ ದೇಶಗಳ ರಾಜತಾಂತ್ರಿಕ ಸಿಬ್ಬಂದಿ ಈಗಾಗಲೇ ಭಾರತೀಯ ವೀಸಾಗಳನ್ನು ಪಡೆದಿದ್ದಾರೆ.

ತಾಲಿಬಾನ್‌ ಹಾಗೂ ಒಸಾಮ ಬಿನ್‌ ಲ್ಯಾಡೆನ್‌ಗೆ ಪಾಕಿಸ್ತಾನದಲ್ಲಿ ಹೆಚ್ಚಿನ ಸಂಖ್ಯೆಯ ಬೆಂಬಲಿಗರು ಇರುವುದು, ಪಶ್ಚಿಮದ ರಾಜತಾಂತ್ರಿಕರು ಇಸ್ಲಮಾಬಾದ್‌ ತೊರೆಯಲು ಪ್ರಮುಖ ಕಾರಣವಾಗಿದೆ. ಈ ನಡುವೆ, ವಾಘಾ ಗಡಿ ಮೂಲಕ ಭಾರತವನ್ನು ಪ್ರವೇಶಿಸಲು ಅನುಮತಿ ನೀಡುವಂತೆ ಅನೇಕ ರಾಜತಾಂತ್ರಿಕರು ಪಾಕಿಸ್ತಾನ ಸರ್ಕಾರಕ್ಕೆ ಮನವಿ ಮಾಡಿಕೊಂಡಿದ್ದಾರೆ. ಪಾಕ್‌ ಸರ್ಕಾರದ ಪ್ರತಿಕ್ರಿಯೆ ಇನ್ನೂ ವ್ಯಕ್ತವಾಗಿಲ್ಲ .

ಆಪ್ಘಾನಿಸ್ತಾನದ ಗಡಿ ಭಾಗಗಳಲ್ಲಿರುವ ಉತ್ತರದ ಪ್ರದೇಶಗಳು, ಬಲೂಚಿಸ್ತಾನ ಮುಂತಾದ ಪ್ರದೇಶಗಳಿಂದ ತನ್ನ ನಾಗರಿಕರು ವಾಪಸ್ಸಾಗುವಂತೆ ಬ್ರಿಟನ್‌ ಕರೆ ನೀಡಿದೆ.

(ಪಿಟಿಐ)

Post Your Views

ಮುಖಪುಟ / ಭಯೋತ್ಪಾದನೆ