ಕಾವೇರಿವಿವಾದ:ಕೇಂದ್ರ ಸಂಪುಟಕ್ಕೆ ರಾಜೀನಾಮೆ, ತಮಿಳು ಸಂಸದರಿಗೆ ಕರೆ

ಕರ್ನಾಟಕದಿಂದ ಕಾವೇರಿ ನೀರು ಪಡೆಯುವ ಸಂಬಂಧ ವಾಜಪೇಯಿ ಅವರನ್ನು ಒತ್ತಾಯಿಸಲು ಕೇಂದ್ರ ಸಚಿವ ಸಂಪುಟದಿಂದ ಹೊರಬರುವಂತೆ ತಮಿಳಗ ರಾಜೀವ್‌ ಕಾಂಗ್ರೆಸ್‌ ಪಕ್ಷದ ಅಧ್ಯಕ್ಷ ವಾಝಪಡಿ ಕೆ. ರಾಮಮೂರ್ತಿ ತಮಿಳು ಸಂಸದರನ್ನು ಒತ್ತಾಯಿಸಿದ್ದಾರೆ.

ಉಭಯ ರಾಜ್ಯಗಳ ಅವಶ್ಯಕತೆಗಳನ್ನು ಪೂರೈಸುವಷ್ಟು ನೀರನ್ನು ಕರ್ನಾಟಕ ಹೊಂದಿದ್ದರೂ ನೀರು ಬಿಡಲು ತಗಾದೆ ಮಾಡುತ್ತಿದೆ. ಆದ ಕಾರಣ, ಕರ್ನಾಟಕ ಸರ್ಕಾರದ ಮೇಲೆ ಕಾವೇರಿ ನೀರು ಬಿಡುವಂತೆ ಒತ್ತಾಯಿಸಲು ಹಾಗೂ ತಮಿಳುನಾಡು ರೈತರ ಹಿತಾಸಕ್ತಿ ರಕ್ಷಿಸಲು ತಮಿಳು ಸಂಸದರು ಕೇಂದ್ರ ಸಂಪುಟಕ್ಕೆ ರಾಜೀನಾಮೆ ನೀಡಬೇಕು ಎಂದು ರಾಮಮೂರ್ತಿ ಆಗ್ರಹಿಸಿದರು. ಭಾನುವಾರ ಪಕ್ಷದ ಕಾರ್ಯಕಾರಿ ಸಭೆಯ ನಂತರ ಸುದ್ದಿಗಾರರನ್ನು ಉದ್ದೇಶಿಸಿ ಅವರು ಮಾತನಾಡುತ್ತಿದ್ದರು.

ಸುಪ್ರಿಂಕೋರ್ಟ್‌ ತೀರ್ಮಾನವೊಂದೇ ಕಾವೇರಿ ನದಿ ನೀರು ಹಂಚಿಕೆ ವಿವಾದಕ್ಕೆ ಶಾಶ್ವತ ಪರಿಹಾರವನ್ನು ಕಲ್ಪಿಸಬಲ್ಲುದು. ಈ ಮುನ್ನ ಕೂಡ ತನ್ನ ಪಾಲಿನ ನೀರನ್ನು ಪಡೆಯಲು ತಮಿಳುನಾಡಿನ ಸಚಿವರು ಸಂಪುಟದಿಂದ ಹೊರಬಂದಿರುವ ಉದಾಹರಣೆಗಳಿವೆ ಎಂದು ರಾಮಮೂರ್ತಿ ಹೇಳಿದರು. ಇದೇ ಕಾರಣಕ್ಕಾಗಿ 1992 ರಲ್ಲಿ ಸ್ವತಃ ರಾಮಮೂರ್ತಿ ಅವರೇ ಕೇಂದ್ರ ಸಂಪುಟಕ್ಕೆ ರಾಜೀನಾಮೆ ನೀಡಿದ್ದನ್ನು ಇಲ್ಲಿ ಸ್ಮರಿಸಬಹುದು.

ವಾರ್ತಾ ಸಂಚಯ
ಮುಖಪುಟ / ಇವತ್ತು... ಈ ಹೊತ್ತು...