ಅಮೆರಿಕಕ್ಕೆ ನೆರವಾಗುವ ನೆರೆರಾಷ್ಟ್ರಗಳ ಮೇಲೆ ಯುದ್ಧ : ತಾಲಿಬಾನ್ ಎಚ್ಚರಿಕೆ
ಇಸ್ಲಾಮಾಬಾದ್ : ಆಫ್ಘಾನಿಸ್ತಾನದ ಮೇಲೆ ದಾಳಿ ನಡೆಸಲು ಅಮೆರಿಕಕ್ಕೆ ನೆರವು ನೀಡುವ ಯಾವುದೇ ನೆರೆ ರಾಷ್ಟ್ರಗಳ ವಿರುದ್ಧವೂ ತಾನು ಸೇಡು ತೀರಿಸಿಕೊಳ್ಳಲು ಸಮರ ಸಾರುವುದಾಗಿ ತಾಲಿಬಾನ್ ಮಿಲಿಟರಿ ಆಡಳಿತ ಶನಿವಾರ ಎಚ್ಚರಿಕೆ ನೀಡಿದೆ. ಈ ವಿಷಯವನ್ನು ಪಾಕಿಸ್ತಾನ ಮೂಲದ ಆಫ್ಘನ್ ಇಸ್ಲಾಮಿಕ್ ಪ್ರೆಸ್ ವರದಿ ತಿಳಿಸಿದೆ.
ನಮ್ಮ ಯಾವುದೇ ನೆರೆ ರಾಷ್ಟ್ರ ಅಮೆರಿಕದ ಉದ್ದೇಶಿತ ದಾಳಿಗೆ ವಾಯುನೆಲೆ ಅಥವಾ ಸೇನಾ ನೆಲೆ ಒದಗಿಸಿದರೆ, ನಮ್ಮ ಮುಜಾಹಿದ್ದೀನ್ನ ಉಗ್ರ ದಾಳಿಯನ್ನು ಎದುರಿಸಬೇಕಾದ ಸಾಧ್ಯತೆಗಳನ್ನು ತಳ್ಳಿಹಾಕುವಂತಿಲ್ಲ ಎಂದು ತಾಲಿಬಾನ್ ವಿದೇಶಾಂಗ ವ್ಯವಹಾರಗಳ ಖಾತೆ ಸಚಿವಾಲಯದ ಹೇಳಿಕೆಯನ್ನು ಉದ್ದರಿಸಿದ ವರದಿ ತಿಳಿಸಿದೆ.
ತಾಲಿಬಾನ್ ವಿರುದ್ಧದ ದಾಳಿಗೆ ಪಾಕಿಸ್ತಾನವು ತನ್ನ ವಾಯುನೆಲೆಯನ್ನು ಬಳಸಿಕೊಳ್ಳಲು ಅನುಮೋದನೆ ನೀಡಿದೆ ಎಂಬ ಸುದ್ದಿಗಳ ಹಿನ್ನೆಲೆಯಲ್ಲಿ ತಾಲಿಬಾನ್ನಿಂದ ಈ ಹೇಳಿಕೆ ಹೊರಬಿದ್ದಿದೆ.
ನ್ಯೂಯಾರ್ಕ್ ವರದಿ : ಕರಾಳ ಮಂಗಳವಾರ ವಿಶ್ವ ವ್ಯಾಪಾರ ಕೇಂದ್ರದ ಅವಳಿ ಕಟ್ಟಡಗಳ ಮೇಲೆ ನಡೆದ ವಾಯುದಾಳಿಯಲ್ಲಿ ಗಾಯಗೊಂಡಿರುವ 77 ಭಾರತೀಯರು ನ್ಯೂಯಾರ್ಕ್ನ ವಿವಿಧ ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ ಎಂದು ಇತ್ತೀಚಿನ ಅಂಕಿ ಅಂಶಗಳು ತಿಳಿಸಿವೆ.
(ಪಿ.ಟಿ.ಐ)
ಮುಖಪುಟ / ಭಯೋತ್ಪಾದನೆ