ವಿಧಾನಸೌಧ ಪ್ರವೇಶಕ್ಕೆ ನಿರ್ಬಂಧ : ನಗರದಲ್ಲಿ ಬಿಗಿಯಾದ ಭದ್ರತೆ

ಬೆಂಗಳೂರು : ಅಮೆರಿಕದಂಥ ಬಲಿಷ್ಠ ರಾಷ್ಟ್ರದ ಮೇಲೆ ಭಯೋತ್ಪಾದಕರು ದಾಳಿ ನಡೆಸಿರುವ ಹಿನ್ನೆಲೆಯಲ್ಲಿ ಎಚ್ಚೆತ್ತಿರುವ ರಾಜ್ಯ ಸರಕಾರ, ಬೆಂಗಳೂರಿನಲ್ಲೂ ಬಿಗಿ ಭದ್ರತೆಗೆ ಗಮನ ಹರಿಸಿದೆ. ಈ ನಿಟ್ಟಿನಲ್ಲಿ ರಾಜ್ಯದ ಹೆಮ್ಮೆಯ ಆಡಳಿತ ಕಟ್ಟಡ ವಿಧಾನಸೌಧಕ್ಕೆ ಸಾರ್ವಜನಿಕರ ಪ್ರವೇಶದ ಮೇಲೆ ನಿರ್ಬಂಧ ವಿಧಿಸಿದೆ.

ಇನ್ನು ಮುಂದೆ ಸಾರ್ವಜನಿಕರು ಸಲಭವಾಗಿ ಪ್ರವೇಶಿಸಲು ಸಾಧ್ಯವಿಲ್ಲ. ಉದ್ಯೋಗಿಗಳು ಕೂಡ, ತಮ್ಮ ಗುರುತು ಪತ್ರವನ್ನು ಕಡ್ಡಾಯವಾಗಿ ತರಲೇಬೇಕು. ಸಾರ್ವಜನಿಕರಿಗೆ ಮಧ್ಯಾಹ್ನ 3ಗಂಟೆಯಿಂದ 5 ಗಂಟೆ ಒಳಗೆ ಮಾತ್ರ ತಪಾಸಣೆಯ ಬಳಿಕ ವಿಧಾನಸೌಧ ಪ್ರವೇಶಿಸಬಹುದಾಗಿದೆ.

ರಾಷ್ಟ್ರದಲ್ಲಿ ಹೆಚ್ಚುತ್ತಿರುವ ಭಯೋತ್ಪಾದನೆಯ ಹಿನ್ನೆಲೆಯಲ್ಲಿ ಈ ಕ್ರಮ ಕೈಗೊಳ್ಳಲಾಗಿದೆ ಎಂದು ಸರಕಾರಿ ಆದೇಶ ತಿಳಿಸಿದೆ. ಆದರೆ, ವರ್ಗಾವಣೆ ಸಂಬಂಧ ಬರುವ ಸರಕಾರಿ ನೌಕರರಿಗೆ ಸಚಿವರ ಅಥವಾ ಅಧಿಕಾರಿಗಳ ಭೇಟಿಯನ್ನು ನಿರಾಕರಿಸಲಾಗಿದೆ.

ಸಂದರ್ಶನದ ವೇಳೆಯನ್ನು ಹೊರತುಪಡಿಸಿ, ಮಿಕ್ಕ ಸಮಯದಲ್ಲಿ ವಿಧಾನಸೌಧ ಪ್ರವೇಶಿಸಬಯಸುವವರು, ಮುಖ್ಯಮಂತ್ರಿಗಳು, ಮಂತ್ರಿಗಳು ಅಥವಾ ಶಾಸಕರಿಂದ ಪತ್ರ ಪಡೆದು ಪ್ರವೇಶದ ಅನುಮತಿಗೆ ಲಿಖಿತ ಕೋರಿಕೆ ಸಲ್ಲಿಸಿದರೆ ಮಾತ್ರ ಪೂರ್ವ ದ್ವಾರದಿಂದ ಪ್ರವೇಶಾವಕಾಶ ನೀಡಲಾಗುವುದು ಎಂದು ಆದೇಶದಲ್ಲಿ ಹೇಳಲಾಗಿದೆ.

ಶುಕ್ರವಾರ ಗುರುತು ಚೀಟಿ ಇಲ್ಲದೆ ಹಾಗೂ ಸಮವಸ್ತ್ರ ಧರಿಸದೆ ವಿಧಾನಸೌಧ ಪ್ರವೇಶಿಸಲು ಪ್ರಯತ್ನಿಸಿದ ಕಾನೂನು ಇಲಾಖೆ ಕಾರ್ಯದರ್ಶಿಯಾಬ್ಬರ ಕಾರಿನ ಚಾಲಕ ಅಫ್ರೋಜ್‌ ಎಂಬಾತನನ್ನು ಪೊಲೀಸರು ದ್ವಾರದಲ್ಲೇ ತಡೆದಿದ್ದರು. ಇದರ ವಿರುದ್ಧ ವಿಧಾನಸೌಧದ ವಾಹನ ಚಾಲಕರ ಸಂಘದ ಸದಸ್ಯರು ಕೆಲ ಕಾಲ ಪ್ರತಿಭಟನೆಯನ್ನೂ ನಡೆಸಿದ್ದರು.