ಅಮೆರಿಕಕ್ಕೆ ಸಂಪೂರ್ಣ ನೆರವು ನೀಡಲು ಸರ್ವಪಕ್ಷ ಸಭೆ ಸಮ್ಮತಿ

ನವದೆಹಲಿ : ಅಮೆರಿಕಕ್ಕೆ ಸಂಪೂರ್ಣ ನೆರವು ನೀಡುವ ಕೇಂದ್ರದ ಕ್ರಮಕ್ಕೆ ಸರ್ವಪಕ್ಷಗಳ ಸಭೆ ಶನಿವಾರ ಸಂಪೂರ್ಣ ಸಮ್ಮತಿ ನೀಡಿದೆ. ವಾಜಪೇಯಿ ಅವರ ಅಧ್ಯಕ್ಷತೆಯಲ್ಲಿ 2 ಗಂಟೆಗಳಿಗೂ ಹೆಚ್ಚುಕಾಲ ನಡೆದ ಸಭೆಯಲ್ಲಿ ಈ ಸಂಬಂಧ ನಿರ್ಣಯವನ್ನೂ ಕೈಗೊಳ್ಳಲಾಗಿದೆ.

ಅಮೆರಿಕೆಗೆ ನೆರವು ನೀಡುವ ವಿಷಯದಲ್ಲಿ ಸಂಪೂರ್ಣ ಎಚ್ಚರದಿಂದಿರುವಂತೆ ಎಡಪಕ್ಷದ ನಾಯಕರು ಸರಕಾರಕ್ಕೆ ಸಲಹೆ ಮಾಡಿದ್ದಾರೆ. ಅಂತಾರಾಷ್ಟ್ರೀಯ ಭಯೋತ್ಪಾದನೆಯ ವಿರುದ್ಧ ಸಮರ ಸಾರಿರುವ ಸರಕಾರದ ಈ ನಿರ್ಧಾರದ ಬಗ್ಗೆ ಚರ್ಚಿಸಲು ನನ್ನ ಮನೆಯ ಬಾಗಿಲು ಸದಾ ತೆರೆದಿರುತ್ತದೆ ಎಂದು ಪ್ರತಿಪಕ್ಷ ನಾಯಕರಿಗೆ ವಾಜಪೇಯಿ ತಿಳಿಸಿದ್ದಾರೆ.

ಯಾವುದೇ ಊಹಾಪೋಹಗಳಿಗೆ ಎಡೆಗೊಡಬೇಡಿ. ನಿಮಗೆ ಯಾವುದೇ ಸಂಶಯ ಇದ್ದರೂ ನನ್ನೊಂದಿಗೆ ನೇರವಾಗಿ ಚರ್ಚಿಸಿ. ಅಮೆರಿಕದ ಮೇಲಿನ ದಾಳಿಗೆ ಸಂಬಂಧಿಸಿದಂತೆ ಸರಕಾರ ಪ್ರಶ್ನಾರ್ಹವಾದ ಯಾವುದೇ ಕ್ರಮ ಕೈಗೊಂಡರೂ ನೀವು ನೇರವಾಗಿ ನನ್ನನ್ನು ಪ್ರಶ್ನಿಸಿ ಎಂದು ಪ್ರಧಾನಿ ತಿಳಿಸಿದ್ದಾರೆ.

ಸಭೆಯ ನಂತರ ಮಾಧ್ಯಮ ಪ್ರತಿನಿಧಿಗಳೊಂದಿಗೆ ಮಾತನಾಡಿದ ಸಂಸದೀಯ ವ್ಯವಹಾರಗಳ ಸಚಿವ ಪ್ರಮೋದ್‌ ಮಹಾಜನ್‌ ಈ ವಿಷಯ ತಿಳಿಸಿದರು. ಸರಕಾರದ ನಿರ್ಧಾರದ ಬಗ್ಗೆ ಯಾವುದೇ ಅಭಿಪ್ರಾಯವನ್ನು ವ್ಯಕ್ತಪಡಿಸುವ ಮೊದಲು ತಮ್ಮೊಂದಿಗೆ ನೇರ ಮಾತುಕತೆ ನಡೆಸುವಂತೆ ಪ್ರಧಾನಿ ಮನವಿ ಮಾಡಿದರು ಎಂದು ಮಹಾಜನ್‌ ಹೇಳಿದರು.

ಅಮೆರಿಕ ವಿಷಯಕ್ಕೆ ಸಂಬಂಧಿಸಿದಂತೆ ತಾವು ಪ್ರತಿಪಕ್ಷದ ಒಬ್ಬೊಬ್ಬ ನಾಯಕರೊಂದಿಗೂ ಚರ್ಚಿಸಲು ಸಿದ್ಧ ಎಂದು ಪ್ರಧಾನಿ ತಿಳಿಸಿದ್ದಾಗಿಯೂ ಮಹಾಜನ್‌ ಹೇಳಿದರು.