ಇದಿನ್ನೂ ಪ್ರಾರಂಭ, ಲ್ಯಾಡೆನ್‌ ಗುರಿ ವೈಟ್‌ಹೌಸ್‌ !

ನವದೆಹಲಿ : ಇನ್ನು ಕೆಲವೇ ದಿನಗಳಲ್ಲಿ ವೈಟ್‌ಹೌಸ್‌ ಚಿಂದಿ ಮಾಡೋಣ- ಹೀಗೆ ಒಸಾಮ ಬಿನ್‌ ಲ್ಯಾಡೆನ್‌ನ ಇಬ್ಬರು ಸಹಚರರು ಮಾತಾಡಿಕೊಂಡಿರುವುದು ಭಾರತೀಯ ಮಿಲಿಟರಿ ಪಡೆಯವರ ಕಿವಿಗೆ ಬಿದ್ದಿದ್ದು, ಈ ಮಾಹಿತಿಯನ್ನು ಭಾರತದ ವಿದೇಶಾಂಗ ವ್ಯವಹಾರಗಳ ಸಚಿವ ಜಸ್ವಂತ್‌ ಸಿಂಗ್‌ ಅವರಿಗೆ ತಿಳಿಸಲಾಗಿದೆ.

ಈ ಮಹತ್ತರ ಮಾಹಿತಿ ಬಗ್ಗೆ ಜಸ್ವಂತ್‌ ಸಿಂಗ್‌ ಸದ್ಯದಲ್ಲೇ ಸಚಿವಾಲಯದ ಭದ್ರತಾ ಸಮಿತಿಯ ಜೊತೆಯಲ್ಲಿ ಚರ್ಚಿಸುವ ಸಾಧ್ಯತೆಯಿದೆ. ನಂತರ ಅಮೆರಿಕೆಗೆ ಈ ವಿಷಯವನ್ನು ತಿಳಿಸಲಾಗುವುದು ಎಂದು ಬೇಹುಗಾರಿಕಾ ಮೂಲಗಳು ತಿಳಿಸಿವೆ.

ವಿಶ್ವ ವ್ಯಾಪಾರ ಕೇಂದ್ರ ಹಾಗೂ ಪೆಂಟಗಾನ್‌ನ ಅಮೆರಿಕಾ ಸೇನಾ ಸಮುಚ್ಚಯ ಧ್ವಂಸ ಮಾಡುವ ಹೆಜ್ಜೆ ಅಮೆರಿಕಕ್ಕೆ ಎಚ್ಚರಿಕೆಯ ಗಂಟೆಯಷ್ಟೆ. ಮುಂದೆ ವೈಟ್‌ಹೌಸ್‌ಗೂ ಇದೇ ಗತಿ ಬಂದೊದಗುವ ಆತಂಕವಿದೆ. ಅಮೆರಿಕಾದ ಫೆಡರಲ್‌ ಬ್ಯೂರೋ ಆಫ್‌ ಇನ್ವೆಸ್ಟಿಗೇಷನ್‌ (ಎಫ್‌ಬಿಐ) ಭಾರತದ ಬೇಹುಗಾರಿಕಾ ದಳಗಳನ್ನು ಬಿನ್‌ ಲ್ಯಾಡನ್‌ ಬಗ್ಗೆ ಏನಾದರೂ ಮಾಹಿತಿ ಇದ್ದಲ್ಲಿ ಅದನ್ನು ಪೂರೈಸುವಂತೆ ಅಧಿಕೃತವಾಗಿ ಕೋರಿದೆ. ಈ ಹಿನ್ನೆಲೆಯಲ್ಲಿ ಭಾರತ ಬೇಹುಗಾರಿಕಾ ದಳ ಪತ್ತೆ ಮಾಡಿರುವ ಮಹತ್ತರ ಮಾಹಿತಿ ಇದು.

(ಇನ್ಫೋ ವಾರ್ತೆ)