ಬೆಂಗಳೂರಿನ ಪ್ರಮೋದ್‌ಗೆ ರೇಲು ಮಿಸ್ಸಾಯಿತು, ಪ್ರಾಣ ಉಳಿಯಿತು

ಬೆಂಗಳೂರು : ಇಲ್ಲಿನ ಮೂಲದ, ಈಗ ಅಮೆರಿಕಾದಲ್ಲಿ ಸಾಫ್ಟ್‌ವೇರ್‌ ಎಂಜಿನಿಯರ್‌ ಆಗಿ ಕೆಲಸ ಮಾಡುತ್ತಿರುವ ಎಸ್‌.ಎ.ಪ್ರಮೋದ್‌ ಎಂಬುವರು ಮನೆ ತಡವಾಗಿ ಬಿಟ್ಟದ್ದೇ ಅವರಿಗೆ ವರದಾನವಾಗಿದೆ.

ಮಂಗಳವಾರ ಭಯೋತ್ಪಾದಕರ ದಾಳಿಗೆ ಕುಸಿದ ವಿಶ್ವ ವ್ಯಾಪಾರ ಕೇಂದ್ರದ ಅವಳಿ ಕಟ್ಟಡಗಳಲ್ಲಿ ಒಂದರ 40ನೇ ಮಹಡಿಯಲ್ಲಿದ್ದ ಸಾಫ್ಟ್‌ವೇರ್‌ ಕಂಪನಿಯಾಂದರಲ್ಲಿ ಕೆಲಸ ಮಾಡುತ್ತಿದ್ದರು ಪ್ರಮೋದ್‌. ನಿತ್ಯ ನ್ಯೂಜೆರ್ಸಿಯಿಂದ ನ್ಯೂಯಾರ್ಕ್‌ಗೆ ರೇಲಿನಲ್ಲಿ ಕಚೇರಿಗೆ ಬಂದು, ಹೋಗುತ್ತಿದ್ದರು. ದುರಂತ ಸಂಭವಿಸಿದ ದಿನ ತಡವಾಗಿ ಮನೆ ಬಿಟ್ಟದ್ದರಿಂದ ನಿತ್ಯ ಕಚೇರಿಗೆ ಹೋಗುವ ರೇಲು ಪ್ರಮೋದ್‌ಗೆ ಸಿಗಲಿಲ್ಲ. ನಂತರದ ರೇಲು ಹತ್ತಿ ಕಚೇರಿಗೆ ಹೋಗುವ ಹೊತ್ತಿಗೆ ಒಂದು ವಿಮಾನ ಕಟ್ಟಡಕ್ಕೆ ಡಿಕ್ಕಿ ಹೊಡೆದಿತ್ತು. ಅದನ್ನು ಕಂಡು, ಸಹ ಕೆಲಸಗಾರರಿಗೆ ಫೋನಾಯಿಸಿ ಪ್ರಮೋದ್‌ ವಿಷಯ ತಿಳಿದುಕೊಂಡರು.

ಎರಡನೇ ವಿಮಾನ ಕಟ್ಟಡಕ್ಕೆ ಡಿಕ್ಕಿ ಹೊಡೆದದ್ದನ್ನು ನೋಡಿದವರ ಪೈಕಿ ಪ್ರಮೋದ್‌ ಕೂಡ ಒಬ್ಬರು. ಅವರ ತಂದೆ ಅನಂತ ರಾಮನ್‌ ಮಾಧ್ಯಮಗಳಿಗೆ ಈ ವಿಷಯ ತಿಳಿಸಿದ್ದಾರೆ. ತಾಯಿ ಶಕುಂತಲಾ ಅವರು ಮಗ ಸುರಕ್ಷಿತವಾಗಿದ್ದಾನೆ ಎಂದು ತಿಳಿದುಕೊಂಡ ನಂತರವೇ ಸಮಾಧಾನವಾದದ್ದು.

ಅವರು ಮಾಧ್ಯಮಗಳಿಗೆ ಹೇಳಿದ್ದು ಹೀಗೆ- ಟಿವಿಯಲ್ಲಿ ಅಮೆರಿಕಾ ದುರಂತದ ಚಿತ್ರಗಳನ್ನು ನೋಡಿ ದಂಗಾಗಿಹೋದೆವು. ಪ್ರಮೋದನಿಗೆ ಎಷ್ಟು ಫೋನ್‌ ಮಾಡಿದರೂ ಲೈನ್‌ ಸಿಗಲಿಲ್ಲ. ಕೊನೆಗೆ ಸಂಬಂಧಿಕರೊಬ್ಬರು ಆತ ಕರೆ ಮಾಡಿ, ಕ್ಷೇಮವಾಗಿದ್ದೇನೆ ಎಂದು ಹೇಳಿದ್ದಾನೆ. ಆತಂಕ ಬೇಡ ಅಂದರು. ಅದುವರೆಗೂ ನಮಗೆ ಆಕಾಶ ಕಳಚಿ ತಲೆ ಮೇಲೆ ಬಿದ್ದಂತಾಗಿತ್ತು.

ಪ್ರಮೋದ್‌ ಗೆಳೆಯ ಕಿರಣ್‌ ಕುಮಾರ್‌ ಎಂಬುವರೂ ಬೆಂಗಳೂರು ನಿವಾಸಿ. ಅಮೆರಿಕಾದ ನ್ಯೂಜೆರ್ಸಿಯಲ್ಲೇ ಇರುವ ಈತ ಕೂಡ ನ್ಯೂಯಾರ್ಕ್‌ನಲ್ಲಿರುವ ಸಂಸ್ಥೆಯಲ್ಲೇ ಕೆಲಸ ಮಾಡುತ್ತಿರುವುದು. ವಿಶ್ವ ವ್ಯಾಪಾರ ಕೇಂದ್ರ ಕಟ್ಟಡ ಕುಸಿದಾಗ ಹಾರಿದ ದೊಡ್ಡ ಕಲ್ಲೊಂದು ಕಿರಣ್‌ಗೆ ಬಡಿಯಬೇಕಿತ್ತು. ಸ್ವಲ್ಪದರಲ್ಲೇ ಅವರು ಬಚಾವಾದರು. ಅವರ ತಾಯಿ ಸೀತಾಲಕ್ಷ್ಮಿ ಈ ವಿಷಯ ತಿಳಿಸಿದ್ದಾರೆ.

ಕೌಸಲ್ಯ ಮಲ್ಯ ಎಂಬ ಬೆಂಗಳೂರಿನ ಇನ್ನೊಬ್ಬ ತಾಯಿ ಮಗನಿಂದ ಫೋನು ಬರುವವರೆಗೆ ದೇವರ ಮನೆ ಬಿಟ್ಟು ಎದ್ದಿರಲಿಲ್ಲ. ಮಗ ದೀಪಕ್‌, ನಾನು ಚೆನ್ನಾಗಿದ್ದೇನಮ್ಮಾ ಅಂದಾಗ, ದೇವರ ದೀಪಕ್ಕೆ ಇನ್ನಷ್ಟು ತುಪ್ಪ ಹಾಕಿದ ಕೌಸಲ್ಯ, ಹರಕೆಗಳನ್ನೆಲ್ಲಾ ಬೇಗ ತೀರಿಸುವುದಾಗಿ ನಗುನಗುತ್ತಾ ದೇವರ ಮುಂದೆ ಹೇಳಿದರಂತೆ.

(ಇನ್ಫೋ ವಾರ್ತೆ)