ಕಾಬೂಲ್‌ನಲ್ಲಿ ಭಾರೀ ಸ್ಫೋಟಗಳು, ಯುದ್ಧದ ವಾತಾವರಣ ಸೃಷ್ಟಿ

ನ್ಯೂಯಾರ್ಕ್‌ : ಪೆಂಟಗನ್‌ ಹಾಗೂ ವಾಷಿಂಗ್ಟನ್‌ನಲ್ಲಿ ಪರಿಹಾರ ಕಾರ್ಯಗಳು ತ್ವರಿತ ಗತಿಯಲ್ಲಿ ನಡೆಯುತ್ತಿರುವ ಬೆನ್ನಿಗೇ ಬುಧವಾರ ಬೆಳ್ಳಂಬೆಳಗ್ಗೆ ಆಪ್ಘಾನಿಸ್ತಾನದ ರಾಜಧಾನಿ ಕಾಬೂಲ್‌ನಲ್ಲಿ ಕೆಲವು ಸ್ಫೋಟಗಳು ಸಂಭವಿಸಿವೆ. ಆದರೆ, ಈ ದಾಳಿಗಳಿಗೆ ಅಧ್ಯಕ್ಷ ಬುಷ್‌ ಆದೇಶ ನೀಡಿದ್ದಾರೆ ಎನ್ನುವ ವರದಿಗಳನ್ನು ಅಮೆರಿಕ ತಳ್ಳಿಹಾಕಿದೆ.

ಕಾಬೂಲ್‌ನಲ್ಲಿ ಭಾರೀ ಪ್ರಮಾಣದ ಏಳು ಅಥವಾ ಎಂಟು ಸ್ಫೋಟಗಳು ಬುಧವಾರ ಬೆಳಗ್ಗೆ ಸಂಭವಿಸಿದ್ದು , ಈ ಹಿನ್ನೆಲೆಯಲ್ಲಿ ಕಾಬೂಲ್‌ ವಿಮಾನ ನಿಲ್ದಾಣದಿಂದ ವಿಮಾನಗಳು ಹೊರ ಹೋಗದಂತೆ ಕಾಬೂಲ್‌ ಆಡಳಿತ ಸೂಚಿಸಿದೆ. ಕಾಬೂಲ್‌ನಲ್ಲಿ ಯುದ್ಧದ ವಾತಾವರಣ ಮೂಡಿದ್ದು , ಬೆಂಕಿಯ ಜ್ವಾಲೆಗಳು ಗೋಚರಿಸುತ್ತಿವೆ ಎಂದು ಎಎಫ್‌ಪಿ ವರದಿ ಮಾಡಿದೆ.

ಅಮೆರಿಕದ ವಿವಿಧೆಡೆಗಳಲ್ಲಿ ನಡೆದ ಬಾಂಬ್‌ ದಾಳಿಯಲ್ಲಿ ಅಂತರರಾಷ್ಟ್ರೀಯ ಭಯೋತ್ಪಾದಕ ಒಸಾಮ ಬಿನ್‌ ಲ್ಯಾಡೆನ್‌ ಕೈವಾಡವಿರುವ ಬಗೆಗೆ ತಮಗೆ ಮಾಹಿತಿಯಿರುವುದಾಗಿ ಯುಎಸ್‌ ಸೆನೆಟರ್‌ ಒ್ರರಿನ್‌ ಹ್ಯಾಚ್‌ ಮಂಗಳವಾರ ರಾತ್ರಿ ತಿಳಿಸಿದ್ದರು. ಹೆಸರು ಹೇಳಬಯಸದ ಅಮೆರಿಕ ಅಧಿಕಾರಿಯಾಬ್ಬರು ದಾಳಿಯ ಬಗೆಗೆ ಬಿನ್‌ ಲ್ಯಾಡೆನ್‌ನನ್ನು ದೂಷಿಸಿದ್ದು , ತಾಲಿಬಾನ್‌ನ ಮಿಲಿಟರಿಯ ಆತಿಥ್ಯದಲ್ಲಿ ಲ್ಯಾಡನ್‌ ಇರುವುದಾಗಿ ಹೇಳಿದ್ದರು.

1998 ರಲ್ಲಿ ಪೂರ್ವ ಆಫ್ರಿಕಾದಲ್ಲಿನ ಎರಡು ಅಮೆರಿಕ ರಾಯಭಾರ ಕಚೇರಿಗಳ ಮೇಲೆ ನಡೆದ ಬಾಂಬ್‌ ದಾಳಿಯ ಸೂತ್ರಧಾರ ಕೂಡ ಬಿನ್‌ ಲ್ಯಾಡೆನ್‌ ಎಂದು ಭಾವಿಸಲಾಗಿದೆ. ಈ ದುರಂತದಲ್ಲಿ 224 ಮಂದಿ ಪ್ರಾಣ ಕಳೆದುಕೊಂಡಿದ್ದರು.

(ಪಿಟಿಐ)

ಮುಖಪುಟ / ಇವತ್ತು... ಈ ಹೊತ್ತು...