ಅಮೆರಿಕದ ಮೇಲಿನ ದಾಳಿಗೆ ತಾನೇ ಹೊಣೆ ಎಂದ ಅನಾಮಧೇಯ

ಅಮ್ಮಾನ್‌ : ಅಮೆರಿಕದ ವಿವಿಧ ಸ್ಥಳಗಳ ಮೇಲೆ ಮಂಗಳವಾರ ನಡೆದ ಪ್ರತ್ಯೇಕ ವಿಮಾನ ದಾಳಿಗೆ ತಾನೆ ಹೊಣೆಯೆಂದು ಅನಾಮಧೇಯನೊಬ್ಬ ಹೇಳಿಕೊಂಡಿದ್ದಾನೆ. ಜಪಾನ್‌ನ ಹಿರೋಶಿಮಾ ಮತ್ತು ನಾಗಸಾಕಿಯ ಮೇಲೆ ನಡೆದಿದ್ದ ಪರಮಾಣು ದಾಳಿಯ ಪ್ರತೀಕಾರವಾಗಿ ಈ ದಾಳಿ ಮಾಡಲಾಗಿದೆ ಎಂದು ಆತ ತಿಳಿಸಿದ್ದಾನೆ.

ಜಪಾನ್‌ನ ರೆಡ್‌ ಆರ್ಮಿ ಸಂಘಟನೆಯ ಪರವಾಗಿ ತಾನು ಈ ಸಂಚು ರೂಪಿಸಿದ್ದಾಗಿ ಅನಾಮಧೇಯ ವ್ಯಕ್ತಿ ತಮಗೆ ತಿಳಿಸಿದ ಎಂದು ‘ಅಲ್‌ ವಹೇಬ್‌ ಅರಬ್‌’ ವಾರಪತ್ರಿಕೆಯ ಸಂಪಾದಕ ಫಕ್ರಿ ಕವಾರ್‌ ಮಾಧ್ಯಮ ಪ್ರತಿನಿಧಿಗಳಿಗೆ ತಿಳಿಸಿದ್ದಾರೆ. 1945ರಲ್ಲಿ ಹಿರೋಶಿಮಾ ಮತ್ತು ನಾಗಸಾಕಿಯ ಮೇಲೆ ನಡೆದ ಅಣ್ವಸ್ತ್ರ ದಾಳಿಗೆ ಪ್ರತೀಕಾರವಾಗಿ ಈ ದಾಳಿ ಮಾಡಿದ್ದಾಗಿ ಆತ ಸ್ಪಷ್ಟಪಡಿಸಿದ ಎಂದೂ ಅವರು ತಿಳಿಸಿದ್ದಾರೆ.

ಲೆಡೆನ್‌ ಕೈವಾಡ : ವಿಶ್ವವನ್ನೇ ತಲ್ಲಣಗೊಳಿಸಿದ ಈ ಘೋರ ದಾಳಿಗೆ ಅಧಿಕೃತ ಹೊಣೆಗಾರರಾರು ಎಂಬುದು ಇನ್ನೂ ಪತ್ತೆಯಾಗಿಲ್ಲ ಎಂದು ಅಮೆರಿಕಾ ತಿಳಿಸಿದೆ. ಆದರೆ, ಅಧಿಕೃತ ಮೂಲಗಳ ಪ್ರಕಾರ ಈ ದಾಳಿಯ ಹಿಂದೆ ಅಂತಾರಾಷ್ಟ್ರೀಯ ಉಗ್ರವಾದಿ ನಾಯಕ ಒಸಾಮ ಬಿನ್‌ ಲೆಡೆನ್‌ ಕೈವಾಡ ಇದ್ದೇ ಇದೆ ಎಂದು ಅಮೆರಿಕಾ ಭಾವಿಸಿದೆ.

ಈ ಕುಕೃತ್ಯ ನಡೆಸಿದ ಭಯೋತ್ಪಾದಕರನ್ನು ಬೇಟೆ ಆಡುತ್ತೇವೆ ಎಂದು ತಿಳಿಸಿರುವ ಅಮೆರಿಕಾ ಅಧ್ಯಕ್ಷ ಜಾರ್ಜ್‌ ಬುಷ್‌ ಅಮೆರಿಕದ ಜನರ ರಕ್ಷಣೆಗಾಗಿ ತಮ್ಮ ಪ್ರಾಣವನ್ನೇ ಬಲಿಕೊಡಲು ಸಿದ್ಧ ಎಂದೂ ಸಾರಿದ್ದಾರೆ.

(ಪಿಟಿಐ/ಎಎಫ್‌ಪಿ/ಇನ್‌ಫೋ ವಾರ್ತೆ)

ಮುಖಪುಟ / ಇವತ್ತು... ಈ ಹೊತ್ತು...